Fundi i një epoke për Ilir Metën? Presidenti i PL-së për Politiko: Këto 30 vite ishin vetëm trajnim, e vërteta do triumfojë në Strasburg

I ndodhur për herë të parë jashtë çdo funksioni publik, as President, as Kryeministër, as deputet dhe madje i izoluar në burg, Ilir Meta e përjashton çdo ide që kjo mund të jetë fundi i epokës së tij politike. 

Politiko.al zhvilloi një intervistë me presidentin e Partisë së Lirisë nga qelia, ku ai flet për fundin e një epoke, për ata që e kanë braktisur, për drejtësinë që sipas tij është kapur nga qeveria dhe për një “betejë finale” që thotë se do të zhvillohet në Strasburg.

I pyetur për ndjenjën e tradhtisë nga njerëzit më të afërt, Meta nuk bën emra, por flet qartë: ata që heshtin, e bëjnë ose nga frika, ose sepse ndihen fajtorë, dhe në të dyja rastet sipas tij  heshtja e tyre më shumë i dëmton vetë ata, sesa i bën dëm atij.

Kur bie fjala për drejtësinë dhe pyetjen se a do ta pranonte një verdikt që e shpallte fajtor, Meta përgjigjet prerë: drejtësi nga "Ramaforma" nuk pret.

Në fund, me një paralelizëm të ashpër historik, Meta thotë se dikur Greqia kishte një juntë kolonelësh. Shqipëria e sotme, sipas tij, ka një juntë prokurorësh, të komanduar nga Edi Rama dhe të mbështetur nga mafia ndërkombëtare.

Pjesa e 1 e intervistës/Nga Neta Fero – Politiko.al

Pyetje: Zoti Meta, për herë të parë në 30 vite nuk jeni as President, as Kryeministër, as deputet, dhe ndodheni në burg.  A është ky fundi i një epoke për Ilir Metën?

Përgjigje: Është vetëm fillimi i një epoke të re. Po të lexoni Çurçillin e shkruar nga Boris Johnson, ka një moment të bukur kur ai thotë se vetëm pak kohë para se të zgjidhesha Kryeministër, të gjithë mendonin se koha ime kishte mbaruar, pasi ai kishte qenë në Qeveri prej gati katër dekadash dhe kishte ndërruar nja dy herë parti. As unë nuk e dija se e gjithë ajo periudhë 40–vjeçare vetëm kishte qenë trajnim për një epokë të re, siç ndodhi. Kështu që nuk ndalojmë njeri të gëzohet para kohe. Por vërtet këto 30 vite po i konsideroj një përvojë shumë të çmuar për të ardhmen.

Pyetje: A ndiheni i tradhtuar nga njerëzit tuaj më të afërt, ata që u pasuruan politikisht dhe tani që jeni në burg, heshtin?

Përgjigje: Ata që kanë arsye të heshtin, më mirë të mos flasin se nuk më ndihmojnë as mua, përveçse rëndojnë veten. Ata që janë të lirë nuk duhet të heshtin, për dinjitetin e tyre dhe të ardhmen e fëmijëve të tyre.

Pyetje: Nëse drejtësia provon fajësinë tuaj, do ta pranoni verdiktin?

Përgjigje: Nga “Ramaforma” nuk presim Drejtësi dhe kjo betejë finale do të jetë në Strasburg. Nuk ka ekzistuar dhe nuk ekziston asnjë fakt apo provë penale për Ilir Metën në 30 vite aktivitet publik. Rrëmbimi dhe pengmarrja ime janë pjesë e një projekti për asgjësimin e sovranitetit të popullit shqiptar dhe shtetit tonë. Ndaj edhe kauzat e mia janë shumë të mëdha dhe do të triumfojnë.

Pyetje: Ju keni thënë shpesh se keni luftuar për demokracinë, për liritë dhe të drejtat e qytetarëve. A mendoni se ajo që po ndodh sot me ju është pjesë e një përplasjeje më të madhe me sistemin që po tenton të kontrollojë çdo pushtet?

Përgjigje: Përplasja ime ka nisur kundër kapjes të plotë të shtetit dhe drejtësisë që në Janar 2017, siç e shpjegova te intervista ime si Autointervistë para pak ditësh. Pra në momentin kur në Kuvend u hodh shorti i parë për zgjedhjen e anëtarëve të Komisionit të Emërimeve në Drejtësi (KED).

Çdo gjë u bë perfekte dhe transparente gjatë gjithë procesit parapërgatitor dhe atë ditë dhe me prezencën e EURALIUS dhe OPDAT- it, kur ditën tjetër Rama, i mërzitur nga emrat që nxori shorti, keqpërdori Ambasadorin Lu për të bërë një deklaratë publike bazuar mbi gënjeshtra, siç e pranoi vetë më vonë.

Kështu u dogj shorti i parë e kështu edhe nja tre herë të tjera duke përdorur ambasadorë e McGonigalë, deri në kapjen totale të Prokurorisë (me 69 vota) dhe gjithë gjykatat, përfshi edhe atë Kushtetuese.

Dikur, në Greqi, kishim një Juntë kolonelësh, tani kemi një juntë Prokurorësh të komanduar nga Rama me regji të plotë dhe me mbështetjen e mafies ndërkombëtare që e përdor Shqipërinë edhe si lavatriçe për pastrim parash edhe si bazë logjistike për trafiqet e kokainës, heroinës etj.