Garo i përgjigjet akuzave për “Malin e Tiranës”: Asnjë qindarkë e Ilir Shtufit për Foltoren, trillim i ulët

Zëdhënësja e Partisë Demokratike, Floriana Garo i është përgjigjur akuzave në media se ndërtuesi i “Malit të Tiranës” ka financuar Foltoren.

Në një postim në Facebook, Garo sqaron se Foltorja nuk ka marrë asnjë qindarkë nga Ilir Shtufi dhe se të gjitha janë trillime si pjesë e luftës së klaneve në PS.

Garo shton se si PD edhe kryedemokrati Berisha janë kundër ngritjes së kullave qiellgërvishtëse dhe se nuk kanë dhënë leje të ndërtohet kullë jo vetëm në Tiranë, por në asnjë qytet.

Garo thotë se është shpifje dhe trillim i ulët pretendimi se PD dhe Berisha kanë heshtur për kullat ndërkohë që në mënyrën më të përsëritur janë shprehur kundër ndërtimit te tyre dhe i kanë denoncuar me qindra herë si monumente të shëmtuara te korrupsionit dhe drogës.

Postimi:

Në malin e shpifjeve të mediave gjobëvënëse, dhe të tjerave të kontrolluara nga qeveria përmes tenderave, këto ditë është përsëritur pa asnjë fakt, dokument, apo provë se pronari i Kullës Mali i Tiranës ka qenë financues i Foltores dhe ka blerë heshtjen e Partisë Demokratike dhe të Sali Berishës.

Lidhur me ketë shpifje Zëdhënësja e Partisë Demokratike deklaron:

1- ndërtuesi i Kullës Mali i Tiranës, biznesmeni Ilir Shtufi kurrë nuk ka dhënë dhe kurrë nuk i është kërkuar qoftë edhe një qindarkë për financimin e Foltores. Ata të cilët paguhen për gjobëvënie me trillime si pjesë e luftës së klaneve brenda PS do të kenë mundësi të “provojnë” shpifjet e tyre në gjykatë.

Partia Demokratike dhe Sali Berisha kanë qenë dhe janë kategorikë kundër ndërtimit të qiellgërrvishtësve, kullave në kryeqytet.

2. Sali Berisha dhe PD në pushtet nuk kanë dhënë asnjë leje dhe nuk kanë lejuar të ndërtohet asnjë kullë në Tiranë apo në ndonjë qytet tjetër të vendit dhe janë zotuar se nesër në pushtet do të mbajnë të njëjtin qëndrim.

Shpifësit e paguar, të zhveshur nga çdo lloj morali e dinë mirë se Plani Urbanistik i Tiranës, i miratuar dhe firmosur ne vitin 2013 nga Sali Berisha, ka të planifikuara në të gjithë territorin e Bashkisë së Tiranës vetem ndërtime 6-8 katëshe dhe asnjë më të lartë se kaq.

3. Është shpifje dhe trillim i ulët pretendimi se PD dhe Berisha kanë heshtur për kullat ndërkohë që në mënyrën më të përsëritur janë shprehur kundër ndërtimit te tyre dhe i kanë denoncuar me qindra herë si monumente të shëmtuara te korrupsionit dhe drogës, si përbindësha që i marrin frymën qytetit dhe përkeqësojnë ndjeshëm mjedisin e jetesës së qytetarëve.

Njësoj edhe për Malin e Tiranës është kërkuar publikisht Edi Ramës anullimi i menjëhershëm i lejes dhe i janë adresuar gjykatës!