Gjekmarkaj ironizon në Kuvend: Pasuria i ka bërë politikanët të mendojnë se janë të pavdekshëm

Deputeti demokrat Agron Gjekmarkaj ka folur me nota ironie në Kuvend teksa diskutohej për projektligjin për rivlerësimin e pasurisë së paluajtshme. Deputeti tha se në Kuvend ndodhet për të mbrojtur bindjet e tij dhe interesat e shqiptarëve, jo të ‘oligarkëve’.

Referuar ndryshimeve të projektligjit, Gjekmarkaj tha se thelbi mbetet i njëjtë: Edi Rama na i ka konfirmuar këtë postulat, qeveria dhe pasuria rrinë si nëna dhe bija, atje lart ku është e ëmbël hija.

Ai theksoi se nuk kushton asgjë të jesh i pasur dhe jo arrogant, ndërsa shtoi se në Shqipëri pasuria e bërë me vjedhje ‘kërcet dhe bërtet’. Sipas tij, kjo dëshmohet në darkat e shtrenjta të “baballarëve”, referuar qeveritarëve.

Gjekmarkaj shtoi se pasuria e ka bërë politikën shqiptare agresive, individët dele dhe shefat ujqër. Gjithashtu theksoi se pasuria i ka bërë politikanët të mendojnë se janë të pavdekshëm.

“Nuk jam eksperti i pasurisë as i asaj që duket dhe as i asaj që nuk duket. Nuk jam i pasur, por jo i mërzitur, por kjo është një zgjedhje që më bënë të tjerët. Shtëpia ime është e vogël, por dritaret hapen në një botë të pafundme.

Prandaj jam këtu, për të mbrojtur bindjet e mia, interesin e shqiptarëve dhe jo bizneset e mia, jo investimet e mia, jo miqtë oligarkë, jo rrugët për ta, jo fshatrat turistik për ta. Jo tokat e grabitura në bregdet, jo taksat e vjedhura, jo përqindjet nga tenderat, jo deputetët apo ministrat dhe kryebashkiakët hajdutë.

Pasuritë e luajtshme dhe të paluajtshme kanë krijuar njerëzit e pushtetit, bizneset dhe mediat afër tyre. Asgjë më të dukshme në Shqipëri nuk ka sesa ajo që është fshehur. Asgjë më të turpshme nuk ka sesa përpjekja për ti bërë moral një shoqërie pasi e ke vjedhur atë.

Më kriminale është që me paratë e saj i blen votën me të cilën i shton pasurinë dhe mban atë të varfër. Të jesh i pasur pa arrogancë nuk kushton asgjë thotë Konfuci, por në vendin tonë pasuria sidomos e bërë me vjedhje me lëpirje bën zhurme, kërcet dhe bërtet.

Atë e demonstrojnë baballarët në darkat e shtrenjta, ku shampanja derdhet tek pishina, aq sa ka dalë edhe kënga “të lagim me shampanjë” Atë e demonstrojnë gratë në parukeri, apo në kafen e lagjes, fëmijët në shkollë apo pasdite me makinat e tyre të shpejtësisë.

Akraballëku i vozitjes së tyre sociale shkëlqen si puçërr me qelb në ballin e një vendi të strukur në hallet e veta. Kjo pasuri e luajtshme dhe e paluajtshme po vret shanset e barabarta për fëmijët, për prindërit për qytetarët që janë të detyruar të japin dhe jo të marrin.

Kjo pasuri e ka bërë politikën shqiptare aq agresive dhe shpesh të poshtër, lufta për të i ka denatyruar asaj thelbin. Kjo pasuri i ka bërë individët dele dhe shefat ujq, kjo pasuri ka modifikuar krenarinë dhe dinjitetin prej saj heshtja triumfon mbi fjalën. Kjo pasuri i ka rinuar politikanët shqiptar, aq sa mendojnë se janë të përjetshëm, të pavdekshëm”, tha Gjekmarkaj.