Gjoba 1 mln lekë fermerëve/ Deputeti i PD-së: Vetëm shtet demokratik nuk mund të quhet!

Deputeti demokrat Beldjon Nallbati ka reaguar lidhur me protestën e sotme të fermerëve në Korçë për shkak të mosmarrjes së subvencioneve dhe mallin po e shesin nën kosto, e Policia e Shtetit i gjobiti me nga 1 milion lekë gjobë për shkak të parkimit të traktorëve në rrugë.

Në një postim në rrjetet sociale, Nallbati shkruan se fytyra e këtij shteti tregohet qartë, ku bën ushtarin me kriminelët dhe gangsterin me fermerët.

Më tej ai shton se fermerët në vend që të përballen me reagimin dhe reflektimin e organeve shtetërore për të zgjidhur hallin e tyre, u përballën me darën e pushtetit.

 Sipas deputetit demokrat, ky shtet vetëm demokratik nuk mund të quhet.

Reagimi i plotë:

Ushtarin me kriminelët!

Gangësterin me fermerët!

Kjo është fytyra e këtij shteti!

Fermerët e fshatrave të Maliqit, protestuan për mungesën e tregut dhe prodhimet e pa shitura.

Në vend që të përballen me reagimin dhe reflektimin e organeve shtetërore për të zgjidhur hallin e tyre, u përballën me darën e pushtetit.

Vetëm shtet demokratik nuk mund të quhet!

Protestojnë për djersën e tyre, ndërsa lënguat e pushtetit i gjobisin edhe me nga 1 milion lek se bllokuan rrugët.

Fermerët në gjithë Shqipërinë po përballen me vështirësi, kanë zero mbështetje nga ana e qverisë dhe ato fonde që garantohen nga partnerët europian, vidhen dhe abuzohen. Korrupsioni po mban peng më shumë se 112 milion euro të fondeve IPARD.

Nuk ka subvensione dhe ato pak para që ndahen, i marrin klientët e qeverisë.

Kjo situatë nuk mund të vazhdojë kështu!

I bëj thirrje qeverisë të marrë masa të menjëhershme që të garantojë treg për prodhimet vendase dhe t’i japë fund konkurencës së pandershme.

I bëj thirrje Ministrit të Brendshëm, të tërhiqet nga ato gjoba qesharake, pasi nuk mund të trembë askënd e për më tepër të trembë njërëzit e punës dhe sakrificës.