"Do të kandidoj në Durrës", Floriana Garo: Nga bota e televizionit tek betejat politike. Sfidat e një gruaje të re për një Shqipëri më të mirë

"Shqipëria është vendi im i zemrës", kështu është shprehur Anëtarja e Kryesisë dhe Zëdhenësja e PD e dikur "Miss World Albania 2012", Floriana Garo, e cila la Amerikën dhe Zvicrën për të "përqafuar" vendin e saj pavarsisht realitetit shqiptar.

E bukur dhe me shumë sharm, Garo ka pasur një rrugëtim mjaft të sukseshëm si studente dhe volejbolliste ne SHBA, për të vijuar në botën e televizionit, si prezantuese dhe moderatore, e tashmë një figurë politike e njohur e Partisë Demokratike.

E pyetur nga Politiko.al se si është të jesh femër në politikë, Garo është shprehur se është e vështirë në një ambient të njohur si maskilist dhe të ashpër, por e ka marrë me pozitivitet. 

Ish-missi nuk nguron të jetë falënderuese ndaj bashkëshortit të saj teksa thotë se: Për një grua që është nënë, balanca mes familjes dhe punës nuk është e lehtë. Duhet të ketë një burrë mbështetës dhe me shumë vetëbesim që ta pranojë më thjeshtë një grua në këtë fushë.

Përherë me këmbë në tokë, zëdhënësja e PD-së, e pyetur për ambicien politike shprehet se në këtë moment do të kandidojë në qytetin e saj, në Durrës, teksa vijon se për më vonë nuk i dihet pasi nuk bën plane afatgjata.

"Sfidat e Foltores, 8 Janari. Isha e pamësuar me beteja të tilla, me gaz lotsjellës në protesta, por kanë qenë mësime të jashtëzakonshme për mua", ky është momenti që Garo e cilëson si më të vështirin në karrierën politike.

E thjeshtë dhe vlerësuese, ish misi shprehet se partitë janë të hapura për gratë, edhe pse në rolin e tyre ka ende rezerva për sa i përket vendimmarrjes reale.

"Kur më tregojnë gratë e hekurta të politikës shqiptare eksperiencat e tyre në kohë shumë të vështira të tranzicionit, mes plumbave dhe kushteve aspak të zakonshme, them që tani, për dikë që është e pëlqyeshme dhe e vendosur, është shumë më e thjeshtë", shprehet për Politiko.al, Garo.

Zëdhënësja e Partisë Demokratike, u bën thirrje qytetarëve që të mos i marrin gjërat shabllon, por të vlerësojnë vërtet çfarë është më e mira për vendin. 

Garo shprehet se vetëm një ekonomi e mirë do shërojë plagët e shpopullimit dhe do mundësojë një të ardhme me shpresë për ata që jetojnë këtu dhe nxitje për ata që janë larguar të kthehen. 

Me pozitivitetin që e karakterizon, Garo tregon mbështetjen për çdo vajzë apo grua që synon të hyjë në politikë: Mbështetjen time do ta keni gjithmonë! Nëse doni të kontribuoni, mos hezitoni.

Intervista e plotë

Keni jetuar 12 vite në diasporë, si ishte ripërballja me Shqipërinë? Duke parë ndryshimet, situatat?

GARO: U përshtata shpejt, Shqipëria është vendi im i zemrës. Shkëputja nga Amerika, ku jetova për 8 vjet, ishte në vitin 2010 dhe më pas për 7 vjet pata mundësinë ta ndërtoja karrierën në televizion në Shqipëri, ku edhe u përballa me realitetin shqiptar.

Më pas u largova për në Zvicër për 4 vite, ku krijova familjen dhe prej 4 vitesh që jetojmë këtu, përshtatja ka qenë shumë e mirë. Kur je i angazhuar në një punë që e do, mes njerëzve të dashur dhe në një vend me mot të mirë, përshtatja ndodh natyrshëm.

Kisha merakun e fëmijëve, si do përshtateshin, por ata ishin 3 dhe 1 vjeç kur u kthyem, akoma nuk e kishin nisur kopshtin dhe këto etapa i filluan këtu.

Edhe im shoq u përshtat mirë pas 27 viteve në Zvicër, tashmë teknologjia e mundëson që ai të punojë edhe online.

Tashmë zëdhënësja dhe anëtare e Kryesisë së Partisë Demokratike, si është të jesh femër në politikë?

GARO: E vështirë në një ambient të njohur si maskilist dhe të ashpër, por unë e kam marrë me pozitivitet. Mendoj që pika ime më e fortë është autenticiteti.

Për një grua që është nënë, balanca mes familjes dhe punës nuk është e lehtë. Duhet të ketë një burrë mbështetës dhe me shumë vetëbesim që ta pranojë më thjeshtë një grua në këtë fushë.

Si jeni gjendur në Partinë Demokratike?

GARO: Unë isha një figurë e njohur publike nga televizioni. Kam studiuar në SHBA për marrëdhënie ndërkombëtare.

Pas përmbushjes që ndjeva nga krijimi i familjes time dhe pas vendimit për t’u kthyer në Shqipëri, kisha dy mundësi: të rikthehesha në televizion ose të përfshihesha në një fushë me akoma më shumë impakt, politikë. Një sfidë për dikë si unë, të pamësuar me këtë fushë.

U afrova vetë në PD për të kontribuar dhe m’u ofrua të isha zëdhënëse e fushatës në zgjedhjet e 2021. Kur më pas Doktor Berisha nisi Foltoren, gjithë instinkti im politik më drejtoi t’i bashkohesha.

Deri ku shkon ambicia juaj politike?

GARO: Në këtë moment do të kandidoj në qytetin tim, në Durrës. Më vonë, nuk di ta them. Nuk bëj plane shumë afatgjata.

Cili ka qenë momenti më i vështirë në karrierën tuaj politike?

GARO: Sfidat e Foltores, 8 Janari. Isha e pamësuar me beteja të tilla, me gaz lotsjellës në protesta, por kanë qenë mësime të jashtëzakonshme për mua.

A ka ndodhur ndonjëherë që të keni pasur paragjykime gjinore në punën tuaj?

GARO: Po. Për faktin që jam grua dhe që kam ardhur nga televizioni, por këto janë tejkaluar tashmë. Njeriu arrin ta tregojë karakterin pas një fare kohe.

Si e balanconi jetën tuaj private dhe atë profesionale?

GARO: Me mbështetje nga im shoq dhe nga rrethi i ngushtë familjar.

Edhe Doktor Berisha ka qenë gjithnjë i mirëkuptueshëm për faktin që jam një nënë me dy fëmijë të vegjël.

Po koha ime ndahet vetëm mes familjes dhe punës. Nuk ka më qejfe me shoqërinë dhe udhëtimet i kam reduktuar.

Politika ka kohë më intensive si fushatat dhe kohë më të qeta, kështu që unë jam përshtatur.

Si e shihni të ardhmen e gruas në politikën shqiptare? A ka më shumë mundësi për gratë të arrijnë pozita udhëheqëse?

GARO: Kohët kanë ndryshuar. Tani ka më shumë hapësira dhe më shumë mundësi. Partitë janë të hapura për gratë, edhe pse në rolin e tyre kam ende rezerva për sa i përket vendimmarrjes reale.

Kur më tregojnë gratë e hekurta të politikës shqiptare eksperiencat e tyre në kohë shumë të vështira të tranzicionit, mes plumbave dhe kushteve aspak të zakonshme, them që tani, për dikë që është e pëlqyeshme dhe e vendosur, është shumë më e thjeshtë.

Keni ndonjë thirrje për zgjedhjet e 2025?

GARO: Sa më shumë gra dhe të rinj të ndërgjegjësohen për alternativat e politikës shqiptare! Të mos i marrin gjërat shabllon, por të vlerësojnë vërtet çfarë është më e mira për vendin.

Kush ka mundësinë ta sjellë ndryshimin real e të përmbysë këtë narkoshtet? Partitë e vogla, sado të paprovuara, nuk arrijnë ta bëjnë dot. Partia Demokratike do të fokusohet te mirëqenia e qytetarëve. Ky është premtimi ynë solemn.

Vetëm një ekonomi e mirë do shërojë plagët e shpopullimit dhe do mundësojë një të ardhme me shpresë për ata që jetojnë këtu dhe nxitje për ata që janë larguar të kthehen. Shqipërinë e mrekullueshme duhet ta gëzojnë shqiptarët, pasi për ta, ajo është bërë e papërballueshme. Kjo do marrë fund!

Një mesazh për të gjitha gratë dhe vajzat që synojnë të hyjnë në politikë.

GARO: Partia Demokratike i ka dyert e hapura. Ne jemi parti e dinjitetit dhe njerëzve të lirë.

Mendojeni mirë përfshirjen, jini vetvetja dhe çdo hap hidheni me guxim.

Mbështetjen time do ta keni gjithmonë! Nëse doni të kontribuoni, mos hezitoni!

Intervistoi: Neta Fero