“Hatërmbetjet” për listën e mbyllur dhe të hapur? Alimehmeti dhe Muçollari sfidojnë veten: Nuk i trembemi votës!

Në mbledhjet e Kryesisë së PD dhe të Këshillit Kombëtar, ditën e sotme (12 mars) do të finalizohet ekipi i përfaqësuesve të PD për zgjedhjet e 11 majit, ku përveç vëmendjes pritshmëritë do të jenë të larta.

Teksa “lufta” do të jetë për listat e hapura dhe të mbyllura, anëtari i Këshillit Kombëtar të PD, Ilir Alimehmeti ka thënë se do të dëshironte të garonte në listë të hapur.

Në një intervistë për një media, Alimehmeti deklaroi se nuk i trembet votës.

 Ai theksoi se Partia Demokratike duhet të prodhojë listën më të mirë për të fituar zgjedhjet e 11 majit, dhe jo duke e parë në nivel individual.

“Unë do doja një listë të hapur, nuk i trembem votës. Do doja listë të hapur për të gjithë, por u vendos ndryshe në korrik. Të prodhojmë listën më të mirë për të fituar zgjedhjet e 11 majit, dhe jo duke e parë në nivel individual. Përbërja totale e listës, primarja është brenda PD-së, renditja bëhet nga Kryesia dhe Këshilli Kombëtar. Por do doja që përfundimi të ishte një listë që të jetë e hartuar me personat që kanë fuqinë më të madhe për të sjellë fitore në 11 maj.”

Po i këtij qëndrimi është dhe anëtari i kryesisë së Partisë Demokratike, Grigels Muçollari i cili në një postim në Facebook shkruan se ka zgjedhur të jetë në listën e hapur.

“Pse kam zgjedhur listën e hapur Sot, në mbledhjet e Kryesisë së PD dhe të Këshillit Kombëtar, do të finalizohet ekipi i përfaqësuesve të PD për zgjedhjet e 11 majit. Është vetëm një nga etapat, pasi Partia Demokratike është tashmë në këtë betejë kudo me njerëzit, strukturat e saj në çdo seksion, grupseksion e degë.

Ka vëmendje, ka pritshmëri dhe patjetër do të ketë edhe debate. Falë Zotit, PD e ka debatin pasuri të saj. Ditën që s'do të ketë debat, s'do të ketë më PD. Këtu jemi shumë ndryshe nga kundërshtarët tanë.

Unë vetë e kam bërë të ditur edhe më herët, madje këtë qëndrim ia kam komunikuar edhe Kryetarit të Partisë, përpara procesit të primareve, dhe i qëndroj këtij parimi: do të jem në listën e hapur. Ky është një moment jetik për vendin, për shoqërinë, për PD-në.

Më pas vjen në rëndësi karriera e secilit. Shqipëria ka nevojë për ndryshimin e qeverisë. Që ndryshimi të vijë, duhet luftuar për çdo votë. Për çdo votë luftohet vetëm në listën e hapur.”

Të dy këto figura pavarsisht se janë të reja, kanë ambicien dhe nuk i tremben votës së popullit, ndërkohë një reagim krejt ndryshe na vjen nga deputeti demokrat, Dashnor Sula.

Me anë të një reagimi në Facebook ai bën me dije se është njoftuar se nuk do të jetë pjesë e listës së Partisë Demokratike për zgjedhjet e 11 majit dhe kjo sipas tij, për arsyen e vetme se është ‘SKAPIST’, duke shfaqur hatermbetje.

Edhe pas përjashtimit nga listat, Sula shprehet qartë se ka mbështetur dhe do të vijojë të mbështesë SPAK e GJKKO, pasi po i bëjnë një shërbim të madh këtij vendi duke futur në burg njerëz me pushtet.

“Sapo jam njoftuar se nuk do të jem pjesë e listës së kandidatëve për deputetë të Partisë Demokratike në zgjedhjet e 11 majit për një arsye të vetme; sepse jam “SPAKIST”.

Për asnjë moment gjatë kësaj legjislature nuk kam vënë në dyshim vetëm një gjë: mbështetjen time në çdo dalje në foltoren e Parlamentit të strukturave të Reformës në Drejtësi, SPAK dhe GJKKO-së.

 Kam besuar dhe besuar dhe vazhdoj të besoj se ato po vazhdojnë ti bëjnë një shërbim të madh këtij vendi, kanë futur në burg njerëz me pushtet, që pak vite më parë as mund të mendoheshin se do të ishin në këtë situatë", shkruan Sula.