HIGHLIGHTS/ Idetë kyçe; çfarë u tha në promovimin e librit historik për genocidin serb në Kosovë

Instituti i Studimeve të Europës Juglindore dhe Partia Demokratike kanë organizuar sot promovimin e librit 'Mos harro kurrë gjenocidin serb ndaj shqiptarëve 1844-1999', me bashkautorë anëtarin e Bordit Ekzekutiv të Ligës Shqiptaro-Amerikane, Agim Aliçkaj dhe Prof. Dr. Nusret Pllana.

Ky promovim vjen një muaj pasi Parlamenti shqiptar "ngriti kartonin e kuq", duke refuzuar njohjen e krimeve serbe në Kosovë përmes një Rezolutet, akt i dënuar nga kryetari i PD, Sali Berisha.

Ai e quajti këtë urdhër të Aleksandër Vuçiç.

Këto janë idetë kyçe të dala sot nga diskutimet në këtë ceremoni promovuese:

Sali Berisha

■ Tirana është sot, në raport me atë çka është më anti shqiptare, është një Beograd i vogël. Tirana e sotme është Tirana e 1945. Beogradi qeveriset nga një udhëheqës dokrinar në genocid. Vuçiç ka thënë në Parlament “për një serb do vrasim 100 muslimanë”. Tani në vend që Shqipëria të përdorë të gjithë forcën diplomatike të saj për ta dërguar në Hagë Vuçiçin, shndërrohet në avokat të tij në çdo takim, përfshi samitin e NATO-s. Çfarë ndryshimi ka udhëheqësi ynë në Tiranë me udhëheqësin e Beogradit? A nuk tha Ana Brnabic të njëjtat fjalë që tha Rama për masakrat në Kosovë? Në qoftë se në 1945 projekti ishte që Kosova është më e sigurt me Jugosllavinë, por edhe ne do shkojmë drejt saj me Titon sekretar të parë, çfarë po ndodh tani? Ballkani i Hapur është asgjësimi i shtetit të Kosovës.

Enver Bytyçi, Drejtori Ekzekutiv i Institutit të Studimeve të Europës Juglindore

■ "Një ushtri e madhe perversësh me pushtet politik e mediatik në Shqipëri dhe në rajon, përpiqen që ne shqiptarëve të na bëjnë kolektivisht të harrojmë të shkuarën... Këta perversë na thoni “harrojini masakrat, harroni eshtrat e shqiptarëve të zhdukur në brigjet e Danubit dhe Savës, harroni ata 1400 fëmijë të vegjël që u vranë barbarisht prej Milosheviçit dhe Ministrit të tij të propagandës, Aleksandër Vuçiç, thjesht se këta fëmijë ishin trashëgimtarë të shqiptarëve".

Agim Aliçkaj, anëtar i Bordit Ekzekutiv të Ligës Shqiptaro-Amerikane

■ "Zonja ambasadore e SHBA, përfaqësuesja ime në vendin tim të dashur, Shqipërinë, t'i publikojë faktet për të ashtuquajturin korrupsion të doktor Berishës, ose t'i propozojë Departamentit të Shtetit ta tërheqë këtë vendim. S'ka tjetër, ose faktet, ose nuk ekziston. Ajo duhet ta kuptojë se miliona përkrahës të zotit Berisha nga të gjitha trojet shqiptare, jo vetëm në Shqipëri, por në të gjitha trojet shqiptare, sidomos në mërgatën shqiptare, i takojnë pjesës më pro-amerikane të kombit, më pro-amerikan në botë".

Nusret Pllana, studiues: 

■ “Ka një garë mes Kosovës dhe Shqipërisë se kush importon më shumë produkte ushqimore nga Serbia. Duhet ta dini se është e provuar se këto produkte ushqimore janë të gjitha të kontaminuara për të na helmuar”.