Homazhet për Arben Tafajn, Berisha: Mirënjohje të thellë për një qeveritar shembullor të Tiranës

Në nderim të figurës të nderuar të komunitetit tiranas, sot po mbahen homazhet për Arben Tafaj, kryetarin e Shoqatës “Tirana”, i cili ndërroi jetë në mënyrë të parakohshme.

Homazhet po zhvillohen në hollin e Pallatit të Kongreseve nga ora 09:30 deri në 11:00.

I pranishëm në homazhe ka qenë dhe kreu i Partisë Demokratike Sali Berisha së bashku me figura të tjera politike nga kjo forcë politike.

Berisha është shprehur se Tafaj ka qënë një njeri i cili i kushtoi jetën e vet, veprimtarinë e tij, mbrojtjes së vlerave të kësaj qytetarie dhe ishte pa diskutim një nga përfaqësuesit më dinjitoz të saj.

"Erdha të shpreh mirënjohjen më të thellë për Arben Tafajn, një qytetar shembullor i Tiranës, një prind, bashkëshort shembullor.

Një qeveritar vendor i ndershëm, i aftë, kompetent.
Një parlamentar i kryeqytetit, i aftë, i ndershëm dhe një përfaqësues dinjitoz i qytetarisë së Tiranës.

Një njeri që i kushtoi jetën e vet, veprimtarinë e tij, mbrojtjes së vlerave të kësaj qytetarie dhe ishte pa diskutim një nga përfaqësuesit më dinjitoz të saj.

I shpreh edhe njëherë ngushëllimet e mia familjes së nderuar Tafaj.
Shpreh ngushëllime për të gjithë qytetarët e Tiranës që kanë humbur një përfaqësues të shquar, për të gjithë miqtë, të afërmit e tij."

Arben Tafaj ka qenë një figurë kyçe e komunitetit tiranas, i njohur për angazhimin e tij të palodhur në ruajtjen dhe promovimin e vlerave të kryeqytetit, si dhe për punën dhe qytetarinë e tij të përkushtuar që nga rënia e sistemit komunist. Ai la pas një trashëgimi të vyer, e cila do të vazhdojë të ndikojë pozitivisht në jetën e qytetit dhe të gjithë shqiptarëve.