Inceneratorët/ Kryemadhi rendit arsyet pse Veliaj duhet të merret i pandehur: Kishte dijeni që në 2016-ën

Ish-kryetarja e LSI, Monika Kryemadhi përmes një deklarate për mediat ka vijuar me denoncimet për të ashtëquajturën aferë të inceneratorëve. Ajo ka renditur disa arsye se përse duhet të merret i pandehur menjëherë kryebashkiaku Erion Veliaj.

Kryemadhi tha se nga verifikimi i dokumentacionit të dosjes së inceneratorit të Tiranës rezulton se:

1. Në 23.06.2016, me shkresën nr. 16/044 Shoqëria “Integrated Energy BV” ka depozituar pranë Ministrisë së Mjedisit një “Letër Interesi”, me anën e së cilës ka paraqitur një propozim të pakërkuar për ndërtimin e venddepozitimeve të reja, mbylljen e atyre ekzistuese, ngritjen e sistemit të riciklimit, përmirësimin e infrastrukturës për të mbajtur nën kontroll situatën ndërtimore, për Qarkun Tiranë.

Shkresa Nr.16/044 i është drejtuar për dijeni edhe Bashkisë Tiranë. Fakt i cili do të thotë se Bashkia Tiranë që në Qershor të vitit 2016, thënë ndryshe “që në krye të herës” është vënë në dijeni të një propozimi të pakërkuar për ndërtimin e inceneratorit të Tiranës.

2. Bashkia Tiranë, në përgjigje të kërkesës së Ministrisë së Mjedisit për shqyrtimin të propozimit të pakërkuar, ka caktuar dy përfaqësues të saj si anëtarë të Komisionit të Dhënies së Koncesionit, dhe konkretisht Z. Taulant Tushe, Drejtor i Përgjithshëm i Bashkisë Tiranë dhe Namik Smixhiu. Ky Komision është përgjegjës për gjithë ecurinë e procedurës koncesionare, deri në firmosjen e kontratës.

Pra Bashkia Tiranë jo vetëm është në dijeni të procesit që ka nisur por tashmë është edhe pjesë e procesit duke u përfaqësuar në Komisionin e Koncensionit me dy drejtorë bashkie.

Ministria e Mjedisit kërkon miratimin e financimit nga Ministria e Financave. Kjo e fundit i kërkon aprovim bashkive të qarkut, miratimin e jep vetëm Erion Veliaj.

Ministria e Mjedisit i ka paraqitur “Financave” planin e pagesave që nevojitet për financimin e këtij projekti nga ku rezulton se: Ky projekt do të financohet nga  qeveria në shumën 130,883,750 eurove dhe bashkitë e qarkut Tiranë në vlerën 91 mln euro për 30 vjet.

Ky fakt provon në mënyrë të qartë dhe shteruese se Bashkia Tiranë dhe Kryetari i saj Erion Veliaj janë në dijeni të plotë të modelit financiar të inceneratorit të Tiranës dhe shumës konkrete që Bashkia Tiranë duhet të paguajë për 30 vitet e ardhshme.

3. Ministria e Financave, i kthen përgjigje Ministrisë së Mjedisit, duke e refuzuar miratimin e financimit të projektit, duke evidentuar disa problematika për të cilat ka kërkuar sqarime shtesë.

4. Ministria e Mjedisit rikërkon nga Ministria e Financave miratim për projektin endërtimit të inceneratorit të Qarkut Tiranë, duke sqaruar problematikat e evidentura nga Ministria e Financave;

5. Ministria e Financave, i kthen përgjigje Ministrisë së Mjedisit, duke kërkuar nga kjo Ministri që, meqënëse financuesi dhe përfituesi kryesor i këtij projekti është qarku Tiranë, të merrej miratimi me shkrim nga ky qark, referuar modelit financiar të propozuar në studimin e fizibilitetit.

6. Ministria e Mjedisit (shkresa e firmosur nga Sekretari i Përgjithshëm Z. Alqi Bllako) kërkon vetëm nga një bashki e qarkut Tiranë dhe konkretisht vetëm nga bashkia Tiranë dhënien e miratimit me shkrim për vazhdimin e procedurave koncesionare, referuar modelit financiar të propozuar në studimin e fizibilitetit. Abuzim i pastër me detyrën, pasi Ministria e Financave kërkon dakordësi nga 5 Bashkitë e Qarkut Tiranë, ndërsa Bllako (sigurisht i koordinuar) ja dërgon vetëm Bashkisë Tiranë.

Kryemadhi vazhdon më tej me argumentet, duke nnëvizuar se Erion Veliaj i dha “OK” projektit pa mbledhur Këshillin Bashkiak.

“Shkelje flagrante e ligjit për Vetëqeverisjen Vendore pasi Kryetari i Bashkisë ka zero tagër ligjor për të vendosur për miratimin e buxhetit të Bashkisë Tiranë. Kjo është kompetencë ekskluzive e Këshillit Bashkiak.Vlen të theksojmë se në të paktën dy projekte të tjera koncesionare ku rezulton se financuese dhe përfituese kryesore e projektit është Bashkia Tiranë, vendimin për dhënien e dakordësisë në parim apo qoftë edhe miratimin e draft kontratës e ka dhënë vetëm Këshilli Bashkiak i Tiranës”, tha Kryemadhi.