“Institucionet kanë dështuar”, Tedi Blushi publikon fotot: Blogerët" kanë hyrë edhe në Pashaliman

Sekretari i Përgjithshëm i Partisë së Lirisë, Tedi Blushi ka reaguar lidhur me ngjarjen e ndodhur dy ditë më parë në Poliçan, ku dy rusë, një ukrainas dhe katër çekë u kapen duke bërë foto në një tunel që të çonte në uzinën e armëve, me pretendimin se po bënin fotografi.

Në një postim në rrjetet sociale, Blushi sjell në vëmendje edhe rastin e Pashalimanit, ku sipas tij dy muaj më parë kanë hyrë të tjerë ‘blogerë’.

Sipas Blushit, kryeministri Edi Rama ia ofroi NATO-s në maj 2022 për bazë të sigurt, ndërsa shton se institucionet kanë dështuar pasi askush nuk i ka ndaluar.

“Vetëm dy muaj më parë "blogerë" të huaj, me shtetësi dhe kombësi të panjohur zyrtarisht, kanë hyrë në bazën ushtarake të Pashalimanit.

Këto foto janë një tjetër dëshmi e kapitullimit të institucioneve!

Janë fotot e turpit dhe të papërgjegjshmërisë ekstreme të Kryeministrit, Ministrit të Mbrojtjes, SHISH, Policisë së Shtetit, Antiterrorit dhe çdo strukture tjetër të ngarkuar me ligj për mbrojtjen e Sigurisë Kombëtare.

Institucionet kanë dështuar për faqe të zezë sepse askush nuk i ka ndaluar, as i ka pyetur dhe as u ka kërkuar sqarime "blogerëve" të huaj që kanë bërë çfarë kanë dashur në Pashaliman, një nga bazat kryesore ushtarake detare të Shqipërisë, vend anëtar i NATO-s.

Kur "blogerë" apo "turistë" janë të aftë të thyejnë në çdo kohë filtrat e sigurisë të bazave tona ushtarake, të filmojnë dhe të marrin prej andej çfarë të duan, imagjinoni ç'mund të bënin armiq të NATO-s, grupet terroriste apo aktorë të tjerë që duan të dëmtojnë Sigurinë tonë Kombëtare dhe të destabilizojnë rajonin.

Skandali thellohet çdo ditë dhe vë përpara përgjegjësisë direkte vet Kryeministrin, që në maj të këtij viti ia ofroi NATO-s, Bazën Ushtarake të Pashalimanit, me garancinë e një baze detare të sigurt!

http://ëëë.evropaelire.org/.../baza-detare.../31870027.html

Shpërdorimi i detyrës duhet t'i vendosë sa më parë para ligjit të gjithë përgjegjësit! Institucionet nuk kanë funksionuar! Qartësisht kanë dështuar!”, shkruan Blushi.

Prokuroria e Elbasanit e ka regjistruar për çështjen e rusëve dhe ukrainasit që hynë në uzinën e Gramshit.

Ata patën përplasje me rojet ushtarake në momentin që  njëri prej tyre tentoi të  futej në godinën ushtarake dhe ta fotografojë.

Si pasojë e përplasjes mbetën të lënduar ushtarakët Ardi Bici dhe Ardjan Xhaka. Gjendja e tyre shëndetësore u përmirësua pas transportimit në Pavijonin e Toksikologjisë në Qendrën Spitalore Universitare “Nënë Tereza”.