Kadilli prezanton nismën e re "Iniciativa Demokratike", fton demokratët dhe qytetarët; çfarë parashikon iDE

Ish-kandidati për kryetari i PD, Fatbardh Kadilli ka prezantuar sot forumin e ri brenda PD, të cilin e ka quajtur "Iniciativa Demokratike"( iDE). Kadilli ka deklaruar për mediat se motoja e tij mbetet një PD e pastër, e hapur, e bashkuar dhe fituese.

Ai thotë se iDE është propozimi që ai iu bën sot demokratëve, në një kohë që situata në PD nuk është e mirë. Opozitarizmi dhe puna për qytetarët jane filozofia e kësaj nisme, sipas tij.

"Grindja e brendshme, kriza e rëndë politike, përplasja mes dy kryetarëve po shpenzon energji, po bjerr moralin tonë politik dhe ka nxjerrë jashtë misionit të saj opozitar PD.

Ne besojmë se asnjëra palë nuk jep zgjidhje të qëndrueshme. Nuk janë zgjidhja as për PD dhe as për të ndërtuar opozitë të pastër. Asnjëri nuk bashkon, nuk forcon, nuk na shton, nuk fiton. Nuk jep një fokus të qartë e të vërtetë opozitar. Një alternativë konkuruese. Pikërisht tek krijimi i alternativës qëndron propozimi ynë. Ne kemi marrë përgjegjësitë tona", tha Kadilli.

Ky i fundit shtoi se me forumin e ri kërkon të bëjë opozitë përballë qeverisë Rama. Sipas Kadillit, kjo lëvizje e re do të ketë propozime të besueshme dhe do të ngjallë shpresë.

Gjithashtu bëri me dije se "Iniciativa Demokratike" është në përputhje me statutin e PD dhe do të veprojë në të gjithë vendin. iDE, sipas Kadillit, do të thotë ballafaqime mendimesh, ndërsa ftoi këdo që ka një qëndrim të bëhet pjesë e kësaj iniciative.

Ai tha se kjo strukturë do të përbëhet nga politikanë me përvojë, por dhe nga njerëz të rinj që kanë dëshirë të japin kontributin e tyre. Kadilli deklaroi se iDE është më e gjerë se anëtarët e PD dhe se është një ftesë për çdo demokrat që nuk është PD-ist dhe për çdo qytetar që nuk është demokrat.

Gjithashtu u shpreh se iDE do të bëjë politikë që sjell dobi për qytetarin. Lartësimi i familjes, ligjshmëria, prona private, tregu dhe meritokracia do të jenë fokusi i saj.

"Do të bëjmë opozitë. Një opozitë të re. Përballë pushtetit abuziv të Ramës, ne do të vijmë si një opozitë e pastër, opozitë konkuruese, opozitë që ngjall shpresë. Kjo opozitë e re do ketë propozime të besueshme, nga njerëz të besueshëm, në dobi të vendit.

Në përputhje të plotë me statutin e PD, ne sot shpallim krijimin e iniciativës demokratike si strukturë e PD-së jo mbi baza territoriale por sociale, profesionale, politike. Me shtrirje dhe veprim në gjithë territorin.

Ne sjellim ide. Në iDE ballafaqohen ide. Kush ka ide, vjen në iDE. Me mendim të ri politik, me sfida të vërteta politike, me aksion të njëmendtë politik. Për beteja politike thelbësore, programore dhe jo beteja rastësore.

iDE do të mobilizojë energjitë dhe talentin e pashfrytëzuar të demokrateve dhe opozitarëve. Opozita nuk është ekskluzivitet i askujt. Partia edhe mund të bëhet monopol. Opozitarizmi jo!

Struktura e re, iDE është e përbërë nga politikanë me përvojë, me karrierë politike dhe administrative, por edhe njerëz të rinj, të shkëlqyer që duan të kontribuojnë

Ajo është vetvepruese. iDE është më e gjerë se anëtarët e PD. Ajo është një ftesë për çdo demokrat që nuk është PD-ist dhe për çdo qytetar që nuk është demokrat.

Tek vetveprimi, tek hapja, tek konkurenca si filozofi e jetës, si dhe tek qytetari qëndron dallimi dhe e veçanta e këtij forumi të pangjashëm deri më sot. iDE do të bëjë politikë që sjell dobi për qytetarin. Që zhvillojnë dhe lartësojnë familjen, ligjshmërinë, pronën private, tregun dhe meritokracinë", u shpreh Kadilli gjatë aktivitetit, ku prezantoi nismën e re.