Kalaja: Si Rama dhe Fidel Ylli falsifikuan firmat në KOKSH dhe përdorën fondet publike për qëllime politike

Kryetarja e Komisionit të Apelimit në PD, Adriana Kalaja ka denoncuar se si kryeministri Rama dhe kreu i KOKSH, Fidel Ylli, falsifikuan firmat dhe përdorën fondet për qëllime politike.

Nga selia blu, Kalaja deklaroi se në vitin 2022, me VKM përveç fondeve të akorduara në fillim të këtij viti, KOKSH iu akordua fondi 250,000,000 lekë për projektin ‘Ekipet sportive në shkolla’.

Sipas VKM këto fonde kalojnë direkt në llogarinë e KOKSH, gjë që bie në kundërshtim me dispozitat ligjore në fuqi.

Kjo është një mënyrë që qeveria, sipas Kalasë, nëpërmjet Yllit, të përdorë fonde publike për punë politike.

DEKLARATA:

Pasi ka kapur të gjitha pushtetet, Kryetari i ‘çetës së babëzisë’ ka filluar punën për kapjen e sportit, konkretisht të Komitetit Olimpik Shqiptar.

Për këtë nuk mund të gjendej shërbëtor më besnik se Fidel Ylli, zgjedhja e të cilit si President, u kundërshtua në gjykatë nga ish-Presidenti, Viron Bezhani.

Pas konstatimit të falsifikimit të firmave në Mbledhjen e Asamblesë së Jashtëzakonshme të KOKSH, Gjykata e Arbitrazhit në Lozanë të Zvicrës ka vendosur:

1. Pavlefshmërinë e vendimit të marrë në mbledhjen e Asamblesë të datës 10.01.2021.

2. Heqjen nga regjistri i organizatave si dhe disa masa në lidhje me pagesat.

Ashtu siç nuk respekton vendimet e Gjykatës Kushtetuese, Kryeministri që e sheh veten mbi ligjin dhe Kushtetutën, nuk njeh as vendimin e Lozanës.

Për këtë qëllim e ka dërguar në Gjykatën e Apelit, ku vendimi është shtyrë plot 4 herë.

 Ndërkohë, Federata Shkollore si dhe Federata Universitare i janë drejtuar MASH, Parlamentit si dhe SPAK për shkeljet ligjore të KOKSH, por asnjë reagim.

Lufta e Ramës dhe Fidelit të tij, me yll në ballë, për ta kapur edhe KOKSH-in, si gjithmonë, bëhet për paratë.

Për të mos patur vonesa apo pengesa në kalimin e milionave Rama dhe Ylli kanë shmangur edhe Thesarin e Shtetit.

Që në krijim, KOKSH ka patur dy forma të ardhurash për realizimin e veprimtarisë: buxheti i shtetit dhe të ardhurat që vijnë si anëtar i organizatave botërore dhe Europiane të lëvizjes Olimpike.

Sa u përket fondeve të buxhetit të shtetit, që nga krijimi i KOKSH e deri në vitin 2020, kalonin nëpërmjet Thesarit të Shtetit. Të ardhurat nga organizatat ndërkombëtare janë menaxhuar nëpërmjet llogarive rrjedhëse të KOKSH në bankat e nivelit të dytë.

Në vitin 2022, me VKM nr.893 datë 27.12.2022, përveç fondeve të akorduara në fillim të këtij viti, KOKSH i akordohet fondi 250,000,000 lekë për projektin ‘Ekipet sportive në shkolla’. Sipas VKM këto fonde kalojnë direkt në llogarinë e KOKSH.

Kjo bie në kundërshtim me dispozitat ligjore në fuqi.

Kjo është një mënyrë që qeveria, nëpërmjet Yllit Olimpik të partisë, të përdorë fonde publike për punë politike, të mbushë sallat e takimeve të Ramës, siç ndodhi në takimin me të rinjtë në Pallatin e Koncerteve, që u mbush me fëmijë shkollash, që i nisnin për ekskursion në Tiranë e përfunduan duke parë ‘arushën e Rilindjes’. 

Organet e drejtësisë duhet ta hetojnë sa më parë këtë shkelje të ligjit dhe aferë korruptive, duke proceduar gjithë personat përgjegjës!