Këlliçi takon kongresmenin amerikan në SHBA: Vlerësoi raportet me PD si një forcë politike aleate

Deputeti demokrat Belind Këlliçi ka ndarë në Facebook foto nga takimi në SHBA me kongresmenin Republikan Tim Walberg.

Këlliçi shkruan se në fokus të diskutimit kanë qenë zhvillimet e fundit në rajonin e Evropës, kryesisht lufta që po zhvillohet në Ukrainë. Deputeti demokrat shkruan se kongresmeni amerikan vlerësoi raportet me Partinë Demokratike si një forcë politike aleate dhe e besueshme në trajtimin e këtyre problematikave dhe si një partner i besueshëm i shtetit Amerikan.

Postimi i Këlliçit:

Një takim mbresëlënës me Kongresmenin Republikan të Michigan, Z. Tim Walberg dhe vizitë në sallën e mbledhjeve të Komisionit të Marrëdhënieve me Jashtë të Kongresit Amerikan.

Me Kongresmenin Walberg për më shumë se 1 orë ndamë shqetësimet për zhvillimet në Europë, Ballkan, dhe për gjendjen jo të mirë të demokracisë dhe Shtetit të së Drejtës në Shqipëri.

Kënaqësi të dëgjosh nga afër këshillat e një njohësi kaq të mirë të rajonit tonë si Z. Walberg, 7 herë Anëtar i Kongresit për përfaqësimin e Michiganit.

Qëndrimi i Shqipërisë si vend anëtar i NATO, një arritje e madhe kjo gjatë qeverisjes së PD, krah aleatëve në sfidat e pushtimit të Ukrainës apo kërcënimeve të tjera si sulmet kibernetike nga Irani, janë një moment për t'u vlerësuar.

Por nuk ka rrezik më të madh për sigurinë dhe partneritetin me NATO dhe SHBA se sa korrupsioni qeveritar dhe drejtësia e kontrolluar.

Në këtë kuadër, pata dakordësinë e zotit Walberg se këto çështje duhen adresuar sa më shpejt dhe me energji.

Kongresmeni Republikan vlerësoi raportet me Partinë Demokratike si një forcë politike aleate dhe e besueshme në trajtimin e këtyre problematikave dhe si një partner i besueshëm i shtetit Amerikan.

Edhe nga z. Ëalberg mora garanci se ai do ta rrisë monitorimin ndaj zhvillimeve në vendin tonë dhe se vetëm qëndrimet objektive e të bazuara mbi faktet reale, të partnerëve dhe institucioneve, janë ndihmë për të dalë nga kriza që po përjetojnë shqiptarët prej keqqeverisjes dhe korrupsionit madhor.

Fenomenet e abuzimit, kapjes së shtetit dhe të drejtësisë nga qeveria në Shqipëri, meritojnë të trajtohen pa kompromis dhe me objektivitet.

U largova nga takimi me z. Walberg i befasuar nga njohjet e tij për rajonin e vendin tonë, dhe i prekur nga dashuria e tij për Shqipërinë, e dëshira që ne të ecim sa më shpejt drejt anëtarësimit në BE dhe drejt konsolidimit të demokracisë.