Këlliçi thirrje publike SPAK-ut: Mos pluhurosni dosjet e korrupsionit në Bashkinë Tiranë

Drejtuesi politik i PD për Qarkun e Tiranës, Belind Këlliçi, ka theksuar sot akuzat ndaj drejtuesve të lartë të Bashkisë së Tiranës.

Këlliçi kujtoi se disa javë më parë ishte paraqitur në Prokurorinë e Tiranës për të dhënë shpjegimet e tij si kallëzues për rehabilitimin e rrugës "Xhon Belushi", një ndërhyrje e kryer natën, ndërkohë që procedura tenderuese për shtrimin e kësaj rruge vijonte ende të ishte e hapur.

Sipas Këlliçit, informacionet e mbledhura në rrugë informale tregonin për një skemë masive të asfaltit elektoral, ku përmes tenderave fiktivë dhe punimeve të pakryera, fondet e Bashkisë Tiranë do të përdoreshin për blerje votash.

"Pas denoncimit tim live në media dhe kapjes në flagrancë të punonjësve të Bashkisë, tenderi u anulua brenda 48 orësh," tha ai, duke shtuar se kallëzimi penal ishte depozituar menjëherë në SPAK.

Këlliçi akuzoi SPAK-un se ia delegoi dosjen Prokurorisë së Tiranës me pretendimin e moskompetencës, edhe pse, sipas tij, çështja përfshinte drejtues të lartë të Bashkisë.

Ai përmendi gjithashtu përpjekjet e pretenduara për të fshehur përgjegjësinë e ministrit Maznikut, të cilin e cilësoi si "dirigjentin e asfaltit elektoral" dhe e akuzoi për rol qendror në skemat korruptive që përfshijnë edhe Inceneratorin e Tiranës dhe projektin Tirana DC.

Në fund të deklaratës, Këlliçi i bëri thirrje publike SPAK-ut që të mos lejojë që dosjet e korrupsionit të pluhurosen:

"Sado të përpiqeni ta amnistoni Biftekun, fundi i tij dihet!", theksoi Këlliçi, duke nënkuptuar se, sipas tij, është vetëm çështje kohe që drejtësia të veprojë.

Postimi I plote

Disa javë më parë jam paraqitur në Prokurorinë e Tiranës për të dhënë shpjegimet e mia si kallëzues i një afere flagrante korruptive, të denoncuar gjatë fushatës elektorale të vitit 2023.

Bëhet fjalë për rehabilitimin e rrugës “Xhon Belushi”, gjatë orëve të vona të natës, nga punonjësit dhe mjetet e Bashkisë Tiranë, ndërkohë që vijontë të qëndronte e hapur procedura tenderuese për shtrimin e kësaj rruge.

Informacionet që erdhën në rrugë informale, tregonin përgatitjen e një masakre elektorale, ku parashikohej shtrimi i dhjetra rrugicave me asfalt elektoral gjatë zgjedhjeve, kryerja e procedurave fiktive tenderuese për këto punë, pagesa fiktive e kompanive për punët e pakryera dhe përdorimi i lekëve të buxhetit të Bashkisë Tiranë, për blerjen masive të votave në zgjedhje.

Sigurisht që pas denoncimit tim live në media dhe kapjes në flagrancë të punonjësve të Bashkisë Tiranë, me mjetet dhe asetet e bashkisë, ky tender ANULLOHET brenda 48 orësh.

Menjëherë ne depozituam kallëzimin penal pranë SPAK, për këtë aferë korruptive të paprecedentë dhe të pa dëgjuar më parë.

Afërmendsh SPAK këtë dosje, edhe pse implikonte titullarët më të lartë të Bashkisë Tiranë, vendosi t’ia delegonte Prokurorisë së Tiranës, për moskompetencë!

Marrja në pyetje e një prej arkitektëve të skemës korruptive 5D, tregon dhe njëherë se kallëzimi ynë është i bazuar në fakte dhe se dirigjenti i të gjithë asfaltit korruptiv në Bashkinë Tiranë gjatë fushatës zgjedhore të vitit 2023, mban emrin dhe firmën e Biftek Maznikut!

SPAK u kujdes të fshinte firmat e Maznikut në pjesën më të madhe të tenderave të dhëna për kompaninë e 5 Drejtorëve. U mundua gjithashtu të fshehë firmat e Maznikut tek asfalti elektoral. U mundua të fshehë përgjegjësitë e tij për Inceneratorin e Tiranës, Tirana DC dhe dhjetra milionë euro të tjera të vjedhura në Bashkinë Tiranë.

Sot gjej rastin sërish ti drejtoj një thirrje publike SPAK, për të mos pluhurosur dosjet e korrupsionit madhor të Bashkisë Tiranë.

Sado të përpiqeni ta amnistoni Biftekun, fundi i tij dihet!

Njëlloj siç u gjend Nesti Angoni për likujdimin juridik të Erion Veliajt, do të gjendet dhe një Nest tjetër, sapo Mazniku të mbarojë shërbimin elektoral në qarkun Elbasan!

Partia shtet tashmë e ka marrë vendimin.

Është thjeshtë çështje kohe!