Kërkuan çregjistrimin e tij në zgjedhjet e 14 majit, Tusha i përgjigjet PS: Do më keni përballë!

Partia Socialiste ka kërkuar çregjistrimin e kandidatit “Bashkë Fitojmë” për Shijakun Fatos Tusha.

Në shkresën që mban firmën e sekretarit për çështje zgjedhore në PS, Eridian Salianji, pretendohet se kandidati Tusha rezulton i dëbuar nga Zvicra në vitin 1997 për drogë dhe nuk e ka deklaruar në formularin e dekriminalizmit.

“Në vlerësimin tonë kandidati nuk plotëson kushtet e parashikuara në nenin 45 të pikës 3 të kushtetutës. Kërkojmë që komisioneri të kryejë hetim administrativ të plotë, të gjithanshëm dhe të shpejtë pasi data e zgjedhjeve po afron. Aktualisht KQZ ka rastin që zgjedhësve të Bashkisë Shijak t’u ofrohet për zgjedhje një kandidaturë që të garantojë “besimin e publikut për funksionin e organeve të zgjedhura shtetërore” dhe në këtë kuadër kandidati Rezeart Tusha nuk e ofron aspak këtë garanci. Ndërprerja e kandidimit duke bërë çregjistrimin e në këtë fazë, në një eventualitet, mbron dhe garanton mirëfunksionimin demokratik të organeve të qeverisjes vendore”, thuhet në shkresën drejtuar KQZ-së.

Në një dalje për mediat, Tusha u shpreh se e ka deklaruar kundravajtjen në Zvicër teksa u shpreh i bindur se nuk do të tërhiqet nga gara e 14 majit.

Deklarata

Të nderuar bashkëqytetarë të Shijakut dhe rrethinave.

Të dashur vëllezër e motra shqiptarë!

Siç mund ta keni parë, mediat pranë pushtetit, me porosi qeveritare, kanë nisur kundër meje një seri sulmesh bazuar në shpifje e shtrembërime.

Së pari, kjo dëshmon se i ka kapur paniku për humbjen pritshme më 14 maj, dhe shpresojnë ta mundin Partinë Demokratike dhe kandidatin e saj në tavolinë. Përpjekja për të më skualifikuar mua si kandidat të koalicionit “Bashkë fitojmë”, nuk bëhet se u intereson e vërteta, por se e dinë se çfarë i pret në Shijak këto zgjedhje.

Së dyti, unë dua të sqaroj opinionin publik në lidhje me atë që qeveria dhe mediat pranë saj quajnë “dënim”.

Fakt ky që ndodhet vetëm në imagjinatën e tyre, jo në dokumente zyrtare.

KQZ më ka regjistruar për zgjedhjet e 14 majit, për arsye se e kam dorëzuar formularin përkatës ku deklaroj se kam një kundravajtje në Zvicër, për shkelje të lejes së qendrimit.

Këtë e kam deklaruar edhe në formularin për zgjedhjet e vititi 2021, kur kam qenë në listat e Partisë Demokratike, si kandidat për deputet.

Në 2021, kur u ngrit ky pretendim për ‘dënim’, KQZ e çoi formalisht ne Prokurorinë e Përgjithshme për verifikim të thelluar nga sektori i dekriminalizimit dhe mora dritën jeshile të kandidimit.

Kjo është e vërteta me dokumente, të cilat do t’i vë në dispozicion të medias dhe publikut bashkë me këtë deklaratë.

Kjo është pjesë e luftës politike, përpjekje amorale e qeveisë për të më skualifikuar nga zgjedhjet. Nuk u vë faj, se u është bërë huq që, ose i vjedhin zgjedhjet, ose i fitojnë pa asnjë kundërshtar përballë.

E kanë kot. Do të më kenë përballë më 14 maj, jo vetëm si kandidat por edhe si gardian të votës së lirë.

Për shijakasit e mi kam vetëm një thirrje: mos u trembni! Bashkë fitojmë!