Koalicion me PS pas zgjedhjeve? Basha i prerë: Propagandë e dëshpëruar e Ramës

Selia e PS dhe PD

Kreu i Partisë Demokratike Lulzim Basha ka komentuar zërat për një koalicion të madh pas zgjedhjeve me Partinë Socialiste, duke i quajtur propagandë të kryeministrit Edi Rama.

Ai tha se socialistët janë të zhgënjyer nga partia e tyre.

"Kjo është propagandë e Partisë Socialiste e që tregon, e Edi Ramës, që tregon se sa të dëshpëruar, me qëllim për të motivuar bazën e pamotivuar socialiste e që ndihet po kaq e tradhtuar si shumica dërmuese e shqiptarëve që kërkojnë ndryshim. Shikoni, kur shohin 80% apo 82% apo 85%, varësisht nga sondazhet e ndryshme që botohen dhe që duan ndryshimin, padiskutim në këtë përqindje të madhe ka dhe shumë socialistë, të cilët janë të neveritur jo thjeshtë sepse janë lënë jashtë tepsisë së pushtetit, por sepse partia tek e cila kanë besuar dhe kanë investuar apo më mirë të themi kupola e kësaj partie ka braktisur vendin, ka braktisur shqiptarët", deklaroi Basha në 'Kjo Javë'.

Kryedemokrati nënvizoi se 25 Prilli do të jetë ditë e një ndryshimi të madh, duke theksuar se sfida e PD-së është programi që do ti paraprijë.

"Sfida jonë është që këtij ndryshimi të madh, këtij votëbesimi të madh që do të derdhet në kutitë e votimit në 25 Prill ti paraprijmë me një program që jo vetëm të realizojë ndryshimin por të tejkalojë pritshmëritë e çdo shqiptari", tha Basha.

I pyetër për një kontestim të mundshëm  të zgjedhjeve Basha deklaroi se "Më 25 prill do të ketë vetëm një rezultat, do të ketë një plebishit popullor për të larguar të keqen".

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm