Zgjedhjet në PD, Kraja: Nevojitet një garë planesh, jo individësh. Këto janë çështjet që duan të dëgjojnë demokratët

Ish-këshilltari bashkiak i PD, Akil Kraja ka reaguar për zgjedhjet në Partinë Demokratike. Ai thotë se gara është fokusuar te akuzat personale ndaj kandidatëve dhe programet apo vizionet. Kraja shton se demokratët presin më shumë, ndërsa vë theksin te situata që po kalon vendi.

"Gara në PD duket sikur po rrëshqet drejt denigrimeve personale e jo shpalosjes së platformave, rindërtimit të një vizioni fitues apo konsolidimit të ekipeve. Shqiptarët, anëtarët demokratë dhe çdo opozitar në vend, presin më shumë.

Ditë pas dite studimet europiane e rajonale e nxjerrin vendin si më të varfërin në europë, apo atë me më shumë vdekje Covid-19 për frymë, vendin me krimin e organizuar e korrupsionin më të lartë, e në paralel me investimet e huaja më të ulëta.

Shqiptarët vijojnë ende të largohen masivisht ndërkohë standartet e jetesës në Tiranë e anembanë vendit vazhdojnë përkeqësimin. Uji i kryeqytetit shpallet me vendim gjykate si i dëmshëm për shëndetin, po na vrasin!!!"-shkruan ai në rrjetet sociale.

Kraja rendit disa pika, pasi sipas tij, këto janë çështjet të cilat duan të dëgjojnë demokratët dhe qytetarët nga kandidatët që garojnë për drejtimin e PD. Ai ngre disa pyetje ndaj kandidatëve, duke marrë parasysh se janë çështje që kanë interes dhe kërkojnë fokusin e tyre.

Pyetjet që ngre Kraja lidhen me fuqizimin e platformave të komunikimit në PD, afrimin e intelektualëve në PD, krijimin e forumeve të reja, planin për mbështetjen e kandidatëve për bashkitë, ndryshimet strukturore, rishikim të strategjisë së denoncimeve, rikonceptimin e administratës së partisë dhe planin e punës dhe përgatitjen e projektligjeve për në Parlament.

Sa i përket pikës së fundit, Kraja evidenton të nevojshme: rishikimin e hartës territoriale dhe sistemit zgjedhor si dhe kufizimin e pushtetit të kryeministrit.

"- a do të ketë një afrim me figurat e klerit, botën e artit dhe të sporteve, intelektualët, akademikët, arsimtarët dhe qytetarinë e vendit për t'i bërë ballë futjes së krimit në politikë dhe art? Modeli i një shoqërie kapitaliste ndërtuar mbi tregun e lirë e meritokracinë po zëvëndësohet nga modeli i një shoqërie kriminale ndërtuar mbi trafiqet e drogës dhe realizmin e artit kriminal. Shit-blerja e votës është vetëm një aspekt i krizës së thellë morale që po kalon vendi - 25 prilli e rikonfirmoi më së miri këtë gjë.

- a do të fuqizohen platformat e komunikimit duke përfshirë krijimin e një PDtv, ristrukturimin e RD-së, gjallërimin e pd.al, ndërtimin e një agore publike ku idetë e djathta për një ekonomi më të begatë e një shtet më të fortë dhe pse më i vogël, të kuptohen më mirë nga masat?

- a do të mbetemi me dy forume, gruaje & rinie apo do te krijohen forume të tjera si për pensionistët apo fermerët në mënyrë që sfidat e këtyre grupimeve sociale të pasqyrohen më mirë? Mosha e tretë është një rezervuar votash tek e majta që duhet patjetër të përfaqësohet më mirë dhe tek e djathta.

- a do të identifikohen dhe mbështeten më herët (minimalisht mbi 6 muaj) kandidatët për bashkitë dhe a do të ketë primare dhe mekanizma konsultimi që programi dhe figurat që do ti shërbejnë qyteteve të jenë produkt konsultimesh me bazën?

- a do të ketë një ndryshim të burimeve në dispozicion për marrëdhëniet me jashtë dhe të degëve të PD në diasporë për të mbështetur në mënyrë më intensive komunikimet tona me ndërkombëtarët? Demokratët kanë krijuar perceptimin sikur nuk po dëgjohemi mjaftueshëm as në Ëashington e as në Bruksel.

- a do të ketë një rishikim të strategjive të denoncimeve publike për korrupsion? Reforma në drejtësi po vonon pa rezultate, opinioni publik po bëhet gjithmonë e më i paduruar. Pedagogjia nr.1 është ripërsëritja dhe njerëzit nuk duhet të harrojnë.

- a do të forcohen kriteret për përfshirjen në Këshillin Kombëtar në mënyrë që aty të ketë diskutime reale, gjenerim ideshë e votime pse jo 'referendare' në mënyrë që të dalim nga paraliza e batutës "kur po mbaron mbledhja"?

- cfarë do të bëhet me administratën e partisë, kryetarët e degëve, drejtorët e departamenteve, anëtarët e kryesisë të cilet në shumicën e rasteve, kanë bërë ose shumë më shumë sec u kërkohej, ose aspak nga ajo cfare pritej nga ata. Duhet një rikonceptim të qenësishëm...

- së fundmi, futja në parlament duke e paevitueshme. Të mos fshihemi më dhe të fillojmë sa më parë të mendojmë për planin e punës dhe projekt ligjet potenciale : denoncimi lokal e ndërkombëtar i masakrës së 25 prillit, rishikimi i hartës territoriale dhe i sistemit zgjedhor, kufizimi i pushtetit të KM-së, ri-votimi i ligjit të vetimit të politikanëve... të bëjmë gjithcka që të nxisim zgjedhje të parakohshme sa më parë por mbi të gjitha, të bëjmë gjithcka që agendën politike të vendit pas shtatorit ta vendosë opozita...", shkruan Kraja.