Kriza ekonomike/ PD del me dy propozime, Berisha-Ramës: Revolta qytetarë do të vendosë për këto 2 kërkesa

Partia Demokratike ka dalë me disa propozime, referuar situatës së vështirë ekonomike të qytetarëve dhe ekonomisë së vendin. Në një deklaratë për mediat nga selia, kryedemokrati Sali Berisha tha se krizën e rëndë po e vuan turizmi.

“Për shkak të përdorimit të të ardhurave buxhetore nga Edi Rama dhe qeveria e tij në funksion të vjedhjes dhe shpërdorimit të tyre masiv, siç është rasti i disbursimit të vazhdueshëm të fondeve publike mbi veprën e krimit, të cilësuar të tillë, djegësat e Fierit dhe Tiranës.

Siç është rasti i ligjit të parlamentit për të financuar me qindra milionë euro, klientelën e Edi Ramës, me të cilën ai ndan paratë. Siç është rasti i prokurimeve të Korridorit Blu, apo korridorit të hajnisë. Të gjitha këto po rrënojnë me shpejtësi ekonominë shqiptare, po rrënojnë buxhetet familjare. Ajo që po e ndjen në mënyrën më të fuqishme, është sektori më kryesor i ekonomisë së vendit, turizmi”, tha Berisha.

Ky i fundit kërkoi subvecionimin urgjent të biletave të transportit urban dhe interurban. Kryedemokrati mori si shembull Gjermaninë, e cila e ka marrë tashmë këtë masë.

“Në këto rrethana emergjente, PD kërkon vendosjen e menjëhershme të subvencionimit të plotë të të gjitha biletave të transportit urban dhe interurban në territorin e Shqipërisë.

Ky propozim i PD nuk është i pabazuar, por i bazuar te një seri vendesh evropiane. Ju kujtoj këtu se në Gjermani, me një biletë mujore prej 9 eurosh, lëviz në mbarë vendin”, deklaroi Berisha.

Një tjetër propozim i PD-së është përgjysmimi i taksimit të naftës, që me vlerën 1.1 euro ëhtë më i larti në botë. Berisha argumentoi se kjo do të sillte më pas uljen e çmimit të naftës.

“Përgjysmimi i kësaj barre fiskale, do të shoqërohej me një ulje korresponduese po kaq të rëndësishme të çmimit të naftës. Ata që mendojnë se arka do boshatiset, kjo nuk është e vërtetë.

Mjafton që qeveria të zhdoganojë naftën që kalon jashtë sistemit doganor në Shqipëri. Nuk ka asnjë mundësi që nafta të jetë kontrabandë, veccse kur patronohet nga dora e zezë e qeverisë”, shtoi ai.

Berisha paralajmëroi kryeministrin Edi Rama se revolta e qytetarëve do të vendosë për këto kërkesa.