Lindita Metaliaj: Edi Rama ka diskriminuar veriun, sot Lezha është boshatisur

Deputetja e PD-së, Lindita Metaliaj  në fjalën e saj në seancën e sotme parlamentare ka replikuar me ministrin Balla.

Ajo u shpreh se sot Lezha është braktisur për shkak se qeveria nuk ka investuar.

Lindita Metaliaj: Unë jetoj aty dhe nuk kam nevojë të shkoj. Unë e bëj vajtje ardhje Lezhë-Tiranë, dhe e di shumë mirë se sa kohë më duhet ta bëj Lezhë-Tiranë, se sa kohë ju duhet atyre turistëve që ju trumbetoni ta bëjnë Milot-rrethrrotullimi i Shëngjinit-Rana e hedhun.

E dimë të gjithë shumë mirë se sa bëhet Shkodër-Lezhë, apo Lezhë-Milot apo Lezhë-Fushë Krujë. Nëse ju keni ndërtuar 1 metër rrugë në këtë aks që unë përmenda, unë e tërheq fjalën time.

Kjo harta nuk të lë të gënjesh. 3.4 miliardë lekë në të gjithë veriun, 55 miliardë lekë në të gjithë jugun. Dhe nëse këtu është dikush që ka diskriminuar veriun dhe është antiverior, ai është Edi Rama.

Përsa i përket turizmit që përmendët. Po në Maj do të sillni turistë të rinj ju, edhe në Shëngjin edhe në Gjadër, sepse me atë kampin e përqendrimit dhe të izolimit që po bëni, nuk po bëni gjë tjetër, veç se po largoni shqiptarët dhe doni ti plotësoni me qytetarë fatkeqë në fakt, të cilët nuk po kërkojnë Shqipërinë, por një vend të BE-së, dhe po largoni shqiptarët se ju nuk ju keni siguruar asnjë kusht.

Dhe që sot Lezha është boshatisur ky është fakt, që sot ka më pak fëmijë në çerdhe, më pak fëmijë në shkolla është fakt, që bujqësia dhe blegtoria ka falimentuar ky është fakt.

Që spitali është në atë gjendje të mjerueshme dhe unë e tregova me fakte që nuk ka medikamente, shtretër, çarçafë e dyer në urgjencën e Lezhës, ky është fakt.

Dhe që të sëmurët, po i degdisni sa në Tiranë dhe Shkodër dhe sa të shkojnë në Tiranë dhe Shkodër, kanë ndërruar jetë fatkeqësisht.

Dhe të thuash realitetin, është për gënjeshtër, kjo ndodh vetëm me ju.

Dhe unë ju ftova miqësisht që pas fjalës time, të jepni mundësinë për zgjidhje problemeve, dhe jo të bëni replika me fakte e argumente që nuk qëndrojnë, sepse i madh dhe i vogël e dinë situatën.

Ata që jetojnë atje e dinë situatën, dhe jo ju që kaloni transit.