Loja me fake-vakancat në Kushtetuese, sulm për rrëmbimin korruptiv nga korporatizmi dhe politika!

Nga Petrit Vasili

Gjykata Kushtetuese nuk po gjen aspak stabilitet dhe integritet për të kryer funksionin e saj dhe është sërish nën sulmin e korrupsionit korporativo-politik dhe medias së paguar prej tij.

Ka ndryshuar vetëm mënyra dhe forma e sulmit, por jo qëllimi i tij, këtë herë përmes fake-vakancave antiligjore.

Korrupsioni i korporatës këtë radhë po përdor copa mediash të akaparuara për të mbjellë lojën e fake-vakancave me qëllimin e vetëm kontrollin e plotë okult të Gjykatës Kushtetuese dhe përfitimin e interesave korruptive, që rrjedhin nga ky kontroll.

Loja me vakancën e gjyqtares së larguar Toska dhe loja me fake-vakancat e tjera, që po duan të shpiken gjoja me fake-sebepin e rotacionit, qelben erë me kilometra larg.

Gjykata Kushtetuese, përmes vendimesh tërësisht të manipuluara, të falsifikuara dhe absolutisht të pavotuara, po synon në mënyrë mafioze të legjitimojë këtë rrëmbim ditën për diell e mbështetur nga copa mediash që bëjnë hapur lojën e korporatës dhe të korrupsionit.

Situata faktike pas ndryshimeve kushtetuese të korrikut 2016 e bën të pamundur respektimin e rregullit të rotacionit. Kjo u shkaktua nga vonesa në zgjedhjen e gjyqtarëve të rinj, të cilët sipas Kushtetutës u zgjodhën për një mandat të plotë në dhe pas vitit 2019, mandat i cili mbaron pas 9 vitesh, në vitin 2028 dhe më pas.

Në situatën aktuale natyrshëm që është jetik të aplikohet parimi kushtetues, që është kohëzgjatja e mandatit të plotë dhe ndalimi i kufizimit të tij përballë rregullit kushtetues, përtëritja e përbërjes së Gjykatës Kushtetuese.

Edhe në praktikën institucionale të kësaj gjykate që prej krijimit të saj, rotacioni nuk ka qenë e mundur të respektohet plotësisht për shkak të vonesave dhe procedurave të zgjedhjes.

Në praktikën institucionale, në asnjë rast gjyqtarët nuk janë zëvendësuar menjëherë dhe gjyqtari që i ka mbaruar afati ka qëndruar në detyrë deri në zgjedhjen e pasardhësit (neni 125/7 i Kushtetutës) dhe referuar vendimeve të gjykatës për deklarimin e mandatit ai është llogaritur vetëm nga momenti i betimit, që është dhe fillimi i detyrës, dhe nga asnjë moment tjetër.

Edhe referuar qëndrimit të Komisionit të Venecias, arrihet në të njëjtin konkluzion.

Komisioni i Venecias ka qenë shumë i qartë dhe shterrues në Opinionin No. 978/2020 CDL-AD(2020)010 “On the appointment of judges to the Constitutional Court” states in its paragraph 107 as follows:

"Për emërimin e gjyqtarëve në Gjykatën Kushtetuese” thuhet në paragrafin 107 të saj si më poshtë:

"Modeli kushtetues i miratuar në vitin 2016 është tepër kompleks dhe në terma afatgjatë do të rekomandonte thjeshtimin e tij, në radhë të parë duke hequr rregullin e sekuencës. Kuotat e tre organeve emëruese mund të ruhen duke i caktuar automatikisht rinovimin e mandatit të njëjtit autoritet që kishte caktuar gjyqtarin në largim.

"Së dyti, duhet të hiqen vitet fikse të fillimit dhe mbarimit të mandateve nëntëvjeçare. Gjyqtarët kushtetues duhet të gëzojnë gjithmonë një mandat të plotë nëntëvjeçar, edhe nëse janë zgjedhur me njëfarë vonese ose nëse marrin një mandat që është ndërprerë para kohe; ky ndryshim nuk duhet të krijojë probleme pasi të hiqet sekuenca. Ky ndryshim do ta bënte pozicionin e gjyqtarit kushtetues më tërheqës për kandidatët e kualifikuar, por edhe më kuptimplotë. (paragrafi 107)."

KONKLUZION:

Kontrolli okult i Gjykatës Kushtetuese është qëllimi i vetëm i lojës me fake vakancat. Përdorimi i copave të medias është pak të thuash qesharak për realizimin e këtij qëllimi.

Copat e medias së përdorur, po të kishin nje gram integritet dhe të benin zanatin e tyre duhet të shqetesoheshin se pse: Gjykata Kushtetuese në vënd të vendimarrjeve të mëdha, që lidhen me mbrojtjen e Kushtetutës, që dhunohet çdo ditë nga qeveria, ka si çështje themelore të saj vetëm pazaret e pështira korporatiste për shitblerjen e mandateve të gjyqtarëve të saj përmes lojës korruptive së kohezgjatjes së mandateve dhe të gjoja rifreskimit të saj.

Por është shumë e qartë se këto pazare mandatesh, të sponsorizuara edhe mediatikisht lidhen qartazi me një trafik influence të dukshëm dhe një synim të qartë për një kontroll total edhe ekstrapolitik të Gjykatës, që lidhet me interesa financiare shumë të mëdha, që vijnë erë dhe që kanë rrëzuar përtokë integritetin ligjor e moral të kësaj Gjykate.

BE dhe SHBA nuk duhet të lejojnë kurrsesi që loja korporatiste dhe politike të realizoje rrëmbimin dhe rrënimin përfundimtar të Gjykatës Kushtetuese dhe Reformës në Drejtësi në trësi e cila aktualisht është në një moment kritik dhe thuajse në zhbërje totale të saj dhe kthimin e kesaj reforme në një plaçkë tregu të gjithfarë interesash korruptive të çdo lloji.

Çështjet kritike sot janë aferat miliardere të Qeverisë, dhunimi i të drejtave kushtetuese të qytetarëve dhe subjekteve politike, moszbatimi i vendimeve të vetë kësaj gjykate, kërkojne detyrimisht qëndrimin shumë të vendosur dhe pa kompromis të saj, por kjo Gjykatë peng i interesave të qeverisë dhe korporatizmit korruptiv i ka munguar totalisht misionit të saj.