"Maskaradë politike e Ramës", Nallbati për incidentin në Korçë: Prokurorja ish-vartëse e Peleshit inskenoi ngjarjen

Bledjon Nallbati ka reaguar ndaj incidenti të fundit të ndodhur në qytetin e Korçës në lidhje me akuzat ndaj tij, duke theksuar se prokurorja që po trajton çështjen është ish-vartëse e Niko Peleshit.

Sipas tij, kjo është një pjesë e një inskenimi politik që ka si qëllim të krijojë një rast të rremë, i cili nuk qëndron në bazë të provave.

Nallbati ka akuzuar se kjo ngjarje është orkestruar për të shmangur përgjegjësitë e kryeministrit Edi Rama dhe për të goditur opozitën në prag të zgjedhjeve, duke e cilësuar gjithçka si një përpjekje për të manipuluar procesin zgjedhor dhe për të dëmtuar ata që janë kundër qeverisë.

Deklarata e plotë:

"Sikundër e dëgjuat, prokurorja e çështjes, ish-vartëse e Niko Peleshit, pohon se u mor personalisht me inskenimin dhe falsifikimin e kësaj akuze që nuk qëndron. Ajo shkruan para gjykatës dhe thotë që nuk i kam marrë ende pamjet, por them të caktohet një masë sigurie. Ajo thotë: “Vlerësova si të drejtë arrestimin në flagrancë për vepra që nuk qëndrojnë dhe kërkoj që të caktohet një masë sigurie kundër një personi, pavarësisht se ende nuk i kam administruar këto akte.” Më vjen keq që gjyqtarja u bë pjesë e kësaj maskarade dhe inskenimi politik.

Kuptohet pse, sigurisht. Ju e dëgjuat dje kryeministrin Rama në Devoll. Ai erdhi për t’i kërkuar votën devollinjve, foli një orë e ca dhe nuk përmendi asnjë gjë se çfarë ka bërë për Devollin dhe devollinjtë, por u mor vetëm me këtë rast. Kjo u inskenua që Edi Rama të shmangte përgjegjësinë e tij për keqqeverisjen 12-vjeçare dhe të merrej me një tallava të tillë, siç merret gjithmonë.

E pyes prokuroren dhe gjyqtaren, a ma justifikojnë dot pse, me urdhër të drejtorit të policisë, dhe këtë e ka pranuar prokurorja në sallën e gjyqit, drejtor i policisë delegoi çështjen në Korçë, ndërkohë që ka kompetencë territoriale Komisariati i Devollit.

Që këtu duket që është marrë personalisht dhe është e inskenuar.

Unë e kuptoj drejtorin e policisë, Niko Peleshin, janë eunukë, të paburrë që marrin dhe zbatojnë urdhëra të vetbër nga shefi i tyre, Edi Rama. Unë atyre do ua jap përgjigjen ligjërisht pasi kjo çështje sapo ka filluar.

Kanë marrë në qafë një punonjës që ka firmosur shkresat mbi këtë akt-akuzë, me urdhër, dhe ata e dinë mirë. E ftoj atë të shkojë pa qenë nevoja ta çoj unë në SPAK.

Sot i them Edi Ramës, këtij skërfyelli dy metra të gjatë, hajdutit më të gjatë që ka njohur ndonjëherë politika, që nuk më tremb dot me këto lloj inskenimesh. Unë e di që je djali i Kristaqit dhe nipi i Spiros, që jo vetëm kanë burgosur, por kanë marrë vendime për t’i varur në litar. Pas datës 11 maj, ti mund të shërbesh vetëm për një punë për të trembur gallofët nëpër arra, sepse je fiks për atë punë, por as këtë s’do mund ta bësh, sepse do jesh në burg për çdo gjë që ke bërë në këto 12 vjet.

Unë dhe vëllai im as jemi trembur dhe as do trembemi asnjëherë.

Vëllai i Bledjon Nallbatit, një njeri gjysëm metër i gjatë, është kapo. Jo ai as është gjysëm metër i gjatë dhe nuk është kapo, është kapedan sepse pret e përcjell këdo dhe e ndihmon me çfarë mundet. Ndërkohë që vëllai yt, dy metërsh, dihet botërisht i akuzuar nga agjencitë ndërkombëtare të inteligjencës si kryemafiozi, narkotrafikanti i kokainës në Shqipëri.

Pra, vëllai im dhe jot janë ndryshe, ashtu si unë dhe ti ndryshojmë shumë. Ti je frikacak dhe burracak, ndërsa unë dhe vëllai im nuk jemi si ti. Do e marrësh përgjigjen nga ne dhe qytetarët e Devollit pas datës 11 maj".