Mbyllja e ‘Mehmet Akif’, Berisha: Akt i turpshëm i qeverisë! Sinan Idrizi mos të luajë me interesa kombëtare

Kreu i PD, Sali Berisha e ka cilësuar një kat të turpshëm dhe poshtërues vendimin e qeverisë shqiptare për mbylljen e shkollës private turke ‘Mehmet Akif’.

Në fjalën që mbajti në mbledhjen e Këshillit Kombëtar të PD, Berisha tha se mbyllja e shkollave dhe kopshteve në Shqipëri është bërë me urdhër të Turqisë, teksa e quajti kryeministrin Rama njeri i pa atdhe.

Po ashtu, Berisha përcolli edhe një mesazh për biznesmenin Sinan Idrizi, i cili rezulton të jetë blerësi i godinës së shkollës së mbyllur “Mehmet Akif” në Tiranë.

“Unë e kuptoj se ka qytetarë që e interpretojnë si të veçantë qëndrimet e presidenti të Turqisë, por ato janë absolutisht në kundërshtim flagrant me miqësinë dhe bashkëpunimin që ka ekzistuar mes dy vendeve sovrane.

Së pari i rikujtoj çdo shqiptari që kurrë nuk duhet të harrojë se për ne kombi është i pari dhe ne jemi komb plureligjoz.

Ne nuk mund të pranojmë ndikime politike nga askush në raportet tona fetare. Ata që e thanë se ‘feja e shqiptarit është shqiptaria’, ishin besimtarë të Zotit. Ata e thanë këtë se fetë nuk duhet ti përçajnë shqiptarët.

Në një anë kërkon të emërohet kreu i Komunitetit Mysliman, i cili zgjidhet me votë nga xhemati i tij.

Tani na del se do të na hapë dhe mbyllë shkollat kur të dojë.

Nuk ka akt më të turpshëm, poshtërues, të shpifur se sa të mbyllësh shkolla e kopshte fëmijësh, se gjoja janë të lidhura me terroristë dhe puçistë në Turqi.

Pa asnjë fakt. Fakti i vetëm që gjejnë një oligark të klientelës për të thënë se e kam blerë unë godinën, Sinan Idrizi. I them Sinan Idrizit, mos e bëj veten në këtë mënyrë se do të përgjigjesh, mos luaj në interesa kombëtare.

Nëse Turqia do të respektojë Shqipërinë si vend sovran nuk do të mundet të diktojë mbyllje shkollash dhe kopshtesh.

Me asnjë manovër dhe ne këtë do të ua themi shqiptarëve kudo që janë. Ne nuk mund të pranojmë një individ si ky, për të lejuar që vendimet për ne të merren në Beograd dhe Stamboll. Kanë ikur ato kohëra”, tha Berisha.