Mes reflektimit për Kryemadhin dhe aleancës me Berishën, Meta: Jemi në vijën e parë kundër regjimit

Nga qelia ku ndodhet i izoluar, Meta flet gjerësisht për situatën e tij, për gabimet e së kaluarës, për raportin me bashkëshorten Monika Kryemadhi dhe për të ardhmen e Partisë së Lirisë.

I pyetur për marrëdhënien me Monika Kryemadhin, me të cilën ka ndarë jo vetëm jetën personale, por edhe betejat politike për dekada, Meta shmang emocionet personale dhe ndalet tek pasojat e një vendimi politik që, sipas tij, ka kushtuar shumë: djegia e mandateve të LSI në vitin 2019.

Lidhur me fatin e Partisë së Lirisë, Meta thotë se reflektimi ka nisur që me Konventën e 27 prillit 2024. Për të, ajo ishte një pikë kthese ku forca politike u çlirua nga nepotizmi – një plagë që e shoqëroi LSI-në dhe që, siç pranon ai, e dëmtoi rëndë në sytë e qytetarëve.

Ndërkohë, përballë një situate të rëndë personale e politike, Meta shprehet se është më i motivuar se kurrë. Ai flet për karakterin dhe bindjet e tij si shtysa të brendshme për të mos u dorëzuar.

Sa i përket marrëdhënies me Sali Berishën, Meta nuk e fsheh se bashkëpunimi me të ka qenë konstant dhe, siç thotë, gjithmonë në funksion të kauzave të përbashkëta.

Ai përmend rastin e vitit 2005 kur bashkëpunimi ndodhi për të rrëzuar një qeveri që kishte bllokuar integrimin europian, dhe vitin 2009 kur u arrit një marrëveshje që çoi në liberalizimin e vizave.

Për Metën, aleanca me Berishën nuk është thjesht një marrëveshje politike, por një domosdoshmëri përballë një regjimi që, siç e përshkruan ai, po përqendron pushtetin në një dorë të vetme.

Pjesa e 2 e intervistës/ Nga Neta Fero – Politiko.al

Pyetje: Monika Kryemadhi ka qenë bashkëshorte dhe bashkëluftëtare në politikë. A keni një mesazh për të sot, në këtë situatë të veçantë?

Përgjigje: Tani është koha për t’u përqëndruar te e Ardhmja, se fajet e së shkuarës, e sidomos djegia e 19 mandateve të LSI, ç’ekuilibruan gjithë garancitë që ekzistonin dhe lehtësuan kapjen totale të shtetit.

Pyetje: A është ky një moment reflektimi për të ardhmen e Partisë së Lirisë? E shihni ende këtë forcë si një aktor të rëndësishëm në mbrojtje të pluralizmit dhe të lirive themelore në vend?

Përgjigje: Padyshim! Reflektimi nisi që me Konventën e 27 Prillit 2024, që ç’rrënjosi nepotizmin, i cili u kthye në mallkim për ish–LSI. Po kështu edhe me programin tonë shumë të qartë, 5 prioritete për 4 milionë shqiptarë plus.

Nuk mund të ketë rivendosje të lirive themelore në vend, të demokracisë e llogaridhënies pa fuqizimin e Partisë së Lirisë.

Mos harroni se pa LSI nuk do kishin ndodhur dy rotacionet paqësore e demokratike në 2005 dhe në 2013.

Ndaj duhej eleminuar LSI, për ta kthyer jetën politike nga 3 polare në “One man shoë”.

Pyetje: Çfarë ju motivon sot të qëndroni i palëkundur, përballë një goditjeje kaq të fortë politike e personale?

Përgjigje:  Kjo ka të bëjë me bindjet e mia, por edhe me karakterin. Goditjet e forta, e sidomos të pabesa, të zgjojnë energji edhe më motivuese. Pa goditjen e pabesë në Pearl Harbour, SHBA kurrë, ndoshta, nuk do ishte fuqizuar aq shumë.

Pyetje: Nëse do të kishit një mesazh për shqiptarët që besojnë tek ju – çfarë do t’u thoshit sot, nga vendi ku ndodheni?

Përgjigje: Jam më i motivuar se kurrë për të mbrojtur të ardhmen e tyre dhe të fëmijëve të tyre në vendin tonë, që duhet ta mbrojmë me çdo cmim. Ata të jenë të sigurt se rasti kur rrethanat thyejnë njerëzit, nuk ka lidhje me Ilir Metën.

Fare shkurt do u thosha: Malet tona më të larta.

Pyetje: Zoti Meta, në momente të vështira politike, keni bashkëpunuar shpesh me Sali Berishën. A vazhdon ky raport besimi edhe sot?

Përgjigje: Padyshim që bashkëpunimi me Z. Berisha është bërë gjithmonë në shërbim të vendit dhe kauzave të mia. Në 2005 ishte një bashkëpunim indirekt, pasi Nano kishte bllokuar integrimin europian të vendit dhe duhej rotacion. Në 2009 u bë koalicioni që garantoi liberalizimin e vizave, veç të tjerave. Edhe sot, bashkëpunojmë kundër Narkoregjimit që është kërcënim për çdo shqiptar që ka arsye dhe dinjitet.

Industria shkon pikiatë, bujqësia pikiatë dhe vetëm rrokaqiejt ecin përpjetë dhe resortet që do shtohen, sidomos pas shumë zjarreve të rëna këtë verë.

Pyetje: A është aleanca Meta-Berisha më shumë se një marrëveshje politike? A e konsideroni Berishën një aleat strategjik për të mbrojtur demokracinë, apo një partner përballë një sistemi që po përqëndron pushtetin?

Përgjigje: Cilido që del në vijën e parë kundër Narkoregjimit, është aleati dhe partneri ynë.

Pyetje: Nëse nesër opozita do të duhej të bashkohej përballë qeverisë, a do të ishit ju dhe Berisha gati të udhëhiqnit një front të përbashkët, pavarësisht sfidave personale dhe goditjeve institucionale?

Përgjigje: Goditjet mafioze të Ramaformë të diktuara nga tribuna e Partisë Socialiste ndaj SPAK-ut, janë arsye më të forta për të qëndruar në krye të kësaj beteje që kërkon sakrifica ekstreme, e jo opozitë part – time dhe me zë të mekur.