‘Ministri erdhi sa për show dhe na mashtroi’/ Denoncimi i fermerit në Maliq: Jemi drejt falimentit

Në Maliq, fermeri Julian Guri denoncon vështirësitë e thella në sektorin e bujqësisë, gjatë një takimi me deputeten e PD, Ledina Alolli.

Sipas tij, përmbytjet kanë shkatërruar rreth 200 dynym tokë, ndërsa mungon çdo dëmshpërblim apo reagim nga institucionet.

Ai thekson se rritja e kostove për naftën dhe plehrat kimike, si dhe mungesa e subvencioneve reale, e bëjnë të pamundur konkurrencën me produktet e importit.
“Jemi drejt falimentit,” shprehet Guri, duke akuzuar për premtime të pambajtura dhe mungesë mbështetjeje konkrete për fermerët.

Videodenoncimi i plotë:

Ledina Alolli: Të përshëndes, Juli.
Fermeri: Faleminderit.

Ledina Alolli: Mirë se të gjej.
Fermeri: Mirë se erdhe.

Ledina Alolli: Sot kam ardhur për të biseduar me ty në lidhje me problematikat që ekzistojnë sot në sektorin e bujqësisë. Ju jeni ndër ata fermerë të cilët keni pasur problematika edhe nga përmbytjet që kanë ndodhur pikërisht në këtë zonë. Cili është realiteti sot? Sepse në krahun tim shoh qepë të hedhura dhe të lëna, prodhim të pashitur, që tregon që mundi, djersa juaj sot ndodhet në tokë.

Fermeri: Po, realiteti është që nga përmbytjet pësuam të paktën nja 200 e ca dynym që u kalbën fare. Kjo pjesë na shkaktoi dëme të parikuperueshme. Edhe reagimi i shtetit ka qenë zero. Si për përmbytjet, ashtu edhe për mbështetjen në pjesën e subvencioneve ka qenë zero. Është me fakte. Në qoftë se unë kam marrë 1000 lekë të vjetra nga shteti, le ta nxjerrin që unë i kam tërhequr. Madje më ka ardhur edhe ministri aty, na ka mashtruar. Po, e theksoj këtë: na ka mashtruar. Erdhi aty dhe tha: “Do ju dëmshpërblejmë.” Nuk është bërë asnjë lëvizje. Kam kontaktuar me kryetarin e bashkisë dhe i kam thënë: “Çfarë është bërë deri tani?” Thotë: “Juli, nuk është bërë gjë, nuk kanë marrë masa.”

Ledina Alolli: Pra asnjë reagim, asnjë mbështetje.

Fermeri: Asnjë lloj mbështetjeje.

Ledina Alolli: Nga ana e ministrisë dhe nga ana e qeverisë.

Fermeri: Na premtoi që do merrnim kredi të butë 2%, siç thonë në televizor. Atje i japin bukur këto premtime, por për t’i dhënë nuk japin. Pra premtimet janë vetëm në letër dhe asgjë tjetër. Realiteti flet ndryshe.

Fermeri: Na kanë lënë si një ushtar në luftë pa pushkë. Ne fermerët kemi mbetur të mbaruar nga të gjitha anët. Nuk na lënë vendet e rajonit, sepse Kosova merr subvencione reale. Për një hektar marrin 700 euro, kurse ne marrim 70.000 lekë të vjetra. Si mund të konkuroj unë me rajonin? S’ka kuptim.

Ledina Alolli: Ndërkohë që sot kjo qeveri flet për subvencione për fermat mbi tre hektarë. Realiteti është që 85% e fermerëve shqiptarë zotërojnë ferma nën dy hektarë, që do të thotë se shumica nuk përfiton. Pra ky shtet mendon për pakicën dhe jo për shumicën.

Fermeri: Jo.

Ledina Alolli: Ndërkohë që çmimi i naftës është 2100 lekë të vjetra. Një kosto e rritur për prodhimet tuaja, dhe nga ana tjetër hiqet edhe subvencioni për naftën. Sa ju kushton kjo dhe si ndikon te kostoja?

Fermeri: Kostoja rritet pothuajse edhe një herë tjetër. Nafta ishte 1500, tani ka shkuar 2100. Ne vaditim deri në 10 herë, sidomos për pataten. Është kosto shumë e madhe, sepse nafta duhet ditë e natë. Është e papërballueshme. Do rriten çmimet dhe qytetarët duhet të përgatiten që perimet do kenë çmime shumë të larta. Nuk mund ta mbajmë më këtë situatë. Na shkatërruan.

Ledina Alolli: Ndërkohë që edhe çmimi i pesticideve dhe i lëndëve bazë është shumë i lartë.

Fermeri: Shumë i lartë. DAP-i ka qenë rreth 65, tani është 100. Urea ka qenë 50, tani është 85-90. Janë rritur me 30-40%. Ku të mbytemi? Si ta ul koston unë? Në Kosovë i gjen më lirë dhe ke subvencione më të mëdha. Këta na flasin për 10%-shin, por ajo është tallje. Një dynym grurë prodhon katër kuintalë, që bëjnë 100.000 lekë të vjetra. 10% janë vetëm 10.000 lekë të vjetra. Në një hektar bëhen 100.000 lekë të vjetra. Ndërsa në Kosovë marrin 700 euro për hektar. Duhet të ndryshojnë politikat ndaj fermerëve. Me 10%-sha nuk bëhet gjë.

Ledina Alolli: Pra ju si fermer nuk gjeni treg për produktet tuaja.

Fermeri: Nuk e gjej dot tregun. Jo se s’jam i zoti, por nuk konkuroj dot.

Ledina Alolli: Nuk e konkurron.

Fermeri: Jo. Nafta në Kosovë është 1 euro. Si ta konkurroj unë me 2100 këtu? Subvencionet nuk i kam. Më thuaj si të konkurroj.

Ledina Alolli: Pra produktet e importit shiten më lirë sepse fermerët në ato vende mbështeten. Ndërsa ju jeni në një situatë shumë të vështirë.

Fermeri: Po, është e vërtetë. Na konkurrojnë sepse kanë subvencione dhe ulin çmimet. Ne nuk i ulim dot sepse nuk kemi mbështetje. Jemi drejt falimentit. Unë jam drejt falimentit, nuk mund ta vazhdoj më. Kjo është situata reale e bujqësisë dhe e fermerit shqiptar. Prodhimet mbeten pa u shitur sepse shteti nuk krijon politika mbështetëse. Fermeri nuk kërkon ndihmë, por kërkon që të mos pengohet. Sot është lënë pa asnjë mbështetje. Ky është një realitet i hidhur. Kur shteti braktis fermerin, braktis ekonominë e vet.

Ledina Alolli: Çfarë do t’i thoje sot ministrit të bujqësisë?

Fermeri: Do t’i them që nuk ka mbajtur asnjë premtim dhe të mos tallet me ne fermerët, me djersën tonë dhe me familjet tona. Të mbajnë premtimet dhe të mos vijnë për shfaqje. Ne nuk kemi nevojë për shfaqje.