"Na duhet bashkëpunimi me Kosovën", Berisha për aksionin opozitar: Nis etapa e dytë e një rëndësie jetike për demokracinë

Berisha tha se Rama i trajton kryeministrat e Kosovës si të ishin kryebashkiakët e Vlorës. Sipas Berishës, Samiti i Procesit të Berlinit u kthye nga Rama në një samit anti-Kosovë.

“A mund të ketë imagjinatë normale, a mund të ketë njeri që mund ta pranojë që çdo javë kryeministri i këtij vendi të vërsulet, nuk po dua të prish gojën, kundër gjysmës së kombit, të lakojë, mallkojë, denigrojë kundër udhëheqjes politike të një vendi të pavarur. Ai i trajton kryeministrat e Kosovës, sikur të ishin kryebashkiakë të Vlorës.

Pra, ai është kthyer në një altoparlant të Beogradit! Çfarë duhet të bëjë ai më shumë se kaq që ne të pranojmë këto qëndrime të tij?Ne duhet ta kemi të qartë se jemi dy shtete të pavarura, sovrane. Këtu u bë samiti evropian. Bëri gjithçka të tregojë se ky ishte samiti anti-Kosovë. Po ndodh në botë kjo? I erdhi presidenti francez, çështja më kryesore ishte Kosova. Vizat për qytetarët e Kosovës.

Më thoni ju, a mund të ndodhë që një vend fqinj, normal, të shndërrohet në një platformë propagande kundër vendit fqinj tjetër? Ndërkohë kur atje nuk ekziston asnjë propagandë antishqiptare”, deklaroi Berisha.

Kryedemokrati u ndal tek aksioni opozitar i cili nis të enjten nga Parlamenti. Ai tha se është koha që opozita të hidhet në veprim kundër regjimit Rama.

“Deputetët në mbledhjen e tyre dje, në të gjitha diskutimet kanë qenë të mendimit që beteja të fillojë në parlament. Nuk shkohet më kështu. Unë në mënyrën më të përsëritur i kisha thënë kryetares së parlamentit: këto që bën ti janë banditeske, janë të turpshme, këto nuk i bën kurrë një kryetare parlamenti.

Nuk ndalemi këtu, se ju i keni dëgjuar dhe ka një moment këtu që çfarë do të thuash, merr nga lista e atyre që janë thënë për aktet e tij. Dhe nuk ia vlen më të konsumojmë kohën me akuza ndaj tij, por të hidhemi në veprim. Të hidhemi në veprim!

Ndaj dhe pa diskutim që dega e Tiranës, në të gjithë këtë përpjekje ka peshën më të madhe. Degët e Tiranës, qarku i Tiranës ka peshën absolute më të madhe në të gjithë përpjekjet tona dhe unë kam shumë besim te drejtuesit e degës së PD, tek anëtarësia dhe mbështetësit tanë se do ta shndërrojnë Tiranën në epiqendrën e lëvizjes opozitare më të fuqishme”, shtoi Berisha.

Kryedemokrati udhëzoi strukturat e Tiranës të nisin punën për të paraqitur me fakte se sa dramatike është situate në Shqipëri. Ndër të tjera, Berisha nënvizoi rëndësinë e bashkëpunimit me Kosovën kur tha se është gjysma e kombit.

“Pas kësaj mbledhje, unë kërkoj nga ju që të mblidhni të gjitha strukturat, të gjitha seksionet dhe të paraqisni gjendjen dramatike të demokracisë shqiptare. Askush përveçse ne nuk mund të sjellë ndryshimin dhe shpresën. Flitet shumë për shpresë dhe ajo është mungestarja e madhe, nuk mund ta mohojmë këtë.

Por a e dini pse është mungestare? Se ne nuk kemi vepruar. Se nëse ne do ishim në këmbë të gjithë, absolutisht, shpresa do ishte në këmbë bashkë me ne.

Dhe sa më shumë të qëndronim ne kundër Edi Ramës, aq më e madhe do ishte shpresa e shqiptarëve ndaj nesh. Pra, kemi bërë punë të madhe këto dy vite, kemi luftuar për ekzistencën tonë. Ia kemi dalë! Ia kemi dalë në të drejtën tonë. Tani është beteja, kapitulli i dytë, etapa e dytë e një rëndësie jetike për demokracinë shqiptare.

Ne na duhet bashkëpunimi me Kosovën. Është gjysma e kombit. Kosova sot është një vend shumë më demokratik se Shqipëria. Në Kosovë nuk vendos krimi. Nuk vendosin familjarët e Edi Ramës dhe ministrave, vendos ligji, ky është problemi. Ndaj dhe e nisim këtë betejë me bindjen më të thellë në fitoren tonë të padiskutueshme. Kjo betejë do të shtrihet në të gjithë Shqipërinë”, vijoi Berisha.