Nafta drejt 200 lekë litri, Këlliçi: Rama nuk mbron qytetarët, por Ballukun

Deputeti i Partisë Demokratike, Belind Këlliçi, ka reaguar pas rritjes së çmimit të karburanteve në vend, duke akuzuar qeverinë se nuk po merr masa për të mbrojtur qytetarët.

Në një postim në rrjetet sociale, Këlliçi deklaron se ndryshe nga Shqipëria, qeveritë në vendet e rajonit kanë ndërhyrë me masa konkrete për të zbutur ndikimin e rritjes së çmimeve të karburanteve, të shkaktuara nga zhvillimet e fundit në Iran.

Sipas tij, qytetarët në vendet fqinje nuk janë prekur ndjeshëm në ekonominë e tyre, pasi qeveritë kanë ulur akcizën dhe taksa të tjera mbi karburantin.

Këlliçi thekson se kjo nuk është hera e parë që, sipas tij, kryeministri Edi Rama nuk ndërmerr masa për të mbrojtur qytetarët.

Deputeti i PD-së shton se ndërkohë që vendet e rajonit kanë reaguar shpejt për të mbrojtur ekonominë e qytetarëve, në Shqipëri qeveria po përdor shumicën parlamentare për të mbrojtur, sipas tij, aferat korruptive.

Mesazhi:

Qeveritë në rajon mbrojnë qytetarët nga rritja e çmimit të karburanteve, Edi Rama mbron Belinda Ballukun!

Siç raportohet në media qeveritë në gjithë rajonin tonë kanë marrë masa konkrete për të mbrojtur qytetarët e tyre nga rritja e çmimit të karburanteve për shkak të ngjarjeve në Iran. Dhe rezulton se qytetarët në rajon, nuk janë prekur në ekonominë e tyre.

Tek ne, qeveria nuk ka bërë asgjë dhe çmimi i naftës po arrin në 2 mijë lekë litri. Parashikimet e ekspertëve janë se do të shtrentohet edhe më shumë.

Ky nuk është rasti i parë ku Edi Rama nuk bën asgjë për të mbrojtur qytetarët. Kjo tanimë është një e vërtetë e njohur nga të gjithë. Ai është aty për të mbrojtur Belinda Ballukun dhe njerëzit e tij, jo qytetarët.

Sot, Shqipëria ka karburantin më të shtrenjtë në Europë, kjo krahasuar edhe me fuqinë blerëse.

Në vendet e rajonit, qeveritë kanë marrë masa të shpejta, kanë ulur akcizën dhe taksa e tarifa të tjera dhe jeta e qytetarëve vijon njësoj, e pacënuar nga zhvillimet në botë.

Edi Rama po ndryshon ligjet dhe po përdor fuqinë e kartonave për të mbrojtur veten e tij, për të mbrojtur aferat korruptive.

Kjo është diferenca.

Për këtë qytetarët duhet të thonë fjalën e tyre.

Nesër në orën 10:00 para Parlamentit është dita për të qendruar përballë krimit e korrupsionit, përballë padrejtësive.