Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

Ndryshimet në ligjin mbi të ardhurat, Tabaku: Krijon pabarazi dhe godet shtresën e mesme

Politiko 25 Qershor 2022, 09:41

Ndryshimet në ligjin mbi të ardhurat, Tabaku: Krijon pabarazi dhe

Deputetja e Partisë Demokratike, Jorida Tabaku, tha për “Monitor” se projektligji “Për tatimin e të ardhurave” krijon pabarazi fiskale mes bizneseve dhe qytetarëve.

“Drafti i propozuar nga qeveria në lidhje me taksimin e profesioneve të lira, që tani po bëhet edhe më i gjerë, konfirmon atë thënien e famshme popullore “duke dashur të heqësh vetullat, nxjerr sytë!”.

Për mua nuk është e habitshme, pasi për vite me radhë, në Kuvend kam parë se si mazhoranca socialiste ka prodhuar politika fiskale, që nuk ofrojnë as barazi dhe as eficiencë në raport me qytetarin dhe sipërmarrjen. Po ta kujtojmë, mazhoranca në paketën fiskale 2014, implementoi parimin e politikës fiskale progresive, e kishin si marketing karshi elektoratit dhe për t’ia shitur të huajve si një qasje ideologjike.

Për vite me radhë, kanë vazhduar ta pompojnë si një ndarje ideologjike kur, në fakt, realiteti ishte dhe është tërësisht i ndryshëm. Politikat fiskale të qeverisë as nuk përmbushin 5 parimet bazë të taksimit; pra nuk janë neutrale, nuk janë eficiente, nuk janë të thjeshta, efektive dhe nuk mundësojnë fleksibilitet.

Fakti që sot qeveria ka sjellë një draft që përpiqet të rregullojë problemet që ka katranosur këto 8 vite është një dëshmi e gjallë e gjithë mençurisë së politikës së saj fiskale. Pasi tani mazhoranca po përpiqet të mbyllë hapësirat dhe mundësitë që ka krijuar nga përjashtimet populiste dhe politikat fiskale klienteliste”.

Znj. Tabaku thekson se vendosja e taksës progresive ishte indicie që qeveria Rama (në fakt të gjitha) do të taksonte punën dhe do të godiste atë shtresë të mesme që kishte investuar fort në zhvillimin e aftësive dhe dijeve të saj. Deputetja e Partisë Demokratike thotë se kjo politikë fiskale nëntëvjeçare ka shkatërruar në themel një nga shtresat më vitale të shoqërisë kudo në botë, shtresën e mesme.

“Kështu u goditën pikërisht ajo shtresë që merrte një pagesë mbi 150 mijë lekë, të cilët me plot të drejtë i dhanë vetes mundësinë të hapnin NIPT-e dhe të krijonin sipërmarrje, duke vendosur në një tjetër sferë veprimi dijet e tyre.

Pastaj po e njëjta mazhorancë solli në jetë taksimin e punës së unifikuar, pra një qytetar që punon në dy punë, për të mbushur të ardhurat e tij minimale, do të taksohet jo për të dy rrogat e tij veç e veç, por për të dy rrogat e tij së bashku. Çfarë solli kjo? Një tjetër siklet të shtuar për shtresën e mesme, që shpëtimin e pa te krijimi i NIPT dhe hapja e një sipërmarrje.

Ndërsa mazhoranca aplikonte këtë politikë ndaj kësaj shtrese të mesme, pra politikën e ndjekjes me bukë në trastë të tyre, nga ana tjetër ofronte lehtësi të pamendueshme për një shtresë tejet të privilegjuar. Ligje speciale dhe lehtësi të mëdha fiskale për bizneset e kompanive që fitojnë tendera publikë dhe PPP, ndërkohë që nga ana tjetër ofron taksa ekstra dhe speciale për shtresën e mesme dhe ata që punojnë dy punë.

Sikur të mos mjaftonte kjo erdhëm në pikën aktuale ku edhe atyre që kanë gjetur një mënyrë për të gëzuar frytet e tyre, qeveria mendon t’ua marrë përmes një takse të sajuar. Edhe një herë, propagandon taksa 0 për biznesin e vogël dhe nga ana tjetër, u merr sipërmarrësve të vegjël TAP në formë takse, por me një emër tjetër. E gjitha kjo sepse nuk mundet që të ofrojë barazi tek ajo që ne e shohim si oligarki politike dhe ekonomike.

Në të vërtetë, këto ndryshime fiskale e kanë zhdukur këtë shtresë të mesme që, ose ka emigruar, ose është rrënuar ekonomikisht dhe kanë polarizuar edhe më tej shoqërinë tonë, në kuptimin ekonomik dhe social. Arsyeja se përse sot në Shqipëri nuk ka meritokraci është dhe si pasojë e zhdukjes së kësaj shtrese të mesme, si pasojë e politikave fiskale dhe ekonomike të qeverisë”, pohoi ajo. Monitor