Nën hetim nga SPAK, Këlliçi: Kërkojnë të na intimidojnë, por kemi dokumente të reja

Anëtari i kryesisë së PD-së, Belind Këlliçi ka folur pas lajmit se ndaj tij ka nisur një hetim nga SPAK.

I ftuar në Syri tv, Këlliçi deklaroi se janë përpjekje për intimidim, ndërsa tregoi se grupi i ekspertëve në PD ka në dorë dokumente dhe informacione të reja që do të verifikohen.

‘Kanë kohë, që nga fillimi i këtij viti që me forma nga më të ndryshme të tentojnë të më intimidojnë mua, bashkëpunëtorët e mi.

Ju e shikoni që unë flas përherë për një grup ekspertësh pranë PD, por prap unë jam i vetmi që firmos dhe flas publikisht.

Kjo sepse kemi bërë një pakt që në fillim që duhet të ruajmë identitetin e të gjithë bashkëpuëntorëve që punojnë me këto dokumente sepse të gjithë kanë familje, njerëz të afërt që nuk duan që të dëmtohen.

Dhe këtë përgjegjësi e kam marrë unë si anëtar i kryesisë së PD, si person politik dhe mbi të gjitha si kandidat deri para 8 muaj për të drejtuar bashkinë e kryeqytetit.

Deri në këtë moment, sado që duan të më intimidojë, që jo më kanë vënë në përgjim, kanë nisur hetim pasurore, nuk më intereson fare. Nuk ka asnjë problem. Gjithçka është transparente.

Ta bëjnë vetingun tim nga dita që kam lindur e deri më sot.

Kjo do të thotë që nuk do të ndaloj, përkundrazi. Sot kemi bërë publike arrestimin e personit në SHBA, që qenka një 29-vjeçar që do të na jepte 100 mln euro kompanisë së inceneratorit për të ndërtuar inceneratorin në Sharrë. Po ka qytetar budalla që i ha këto gënjeshtra, a ka njeri që i beson këto përralla.

Nëse mendojnë se na kanë intimiduar, e kanë të kotë, na kanë motivuar.

Po shqyrtojmë një sërë dokumentesh të reja.

Po e them për herë të parë, jo e gjithë administrata publike është e korruptuar, jo të gjithë punonjësit në Bashkinë e Tiranës janë të korruptuar, ka njerëz të ndershëm që duan të bëjnë detyrën e tyre dhe nuk abuzojnë me taksat e qytetarëve, që na sjellin informacion’, tha Belind Këlliçi