Nënshkruhet marrëveshja PD-PL për zgjedhjet lokale, çfarë parashikojnë 6 pikat e saj

Partia Demokratike dhe ajo e Lirisë kanë nënshkruar marrëveshjen e koalicionit për zgjedhjet vendore të 14 majit 2023.

Marrëveshja mes Sali Berishës dhe Ilir Metës vjen teksa evidentohet se korrupsioni po shkatërron vendit, pluralizimi është drejt asgjësimit, shpopullimit masiv, krizës dhe keqqeverisjes.

Marrëveshja parashikon daljen me një kandidat të përbashkët në zgjedhje, emri i të cilit do të burojë nga primaret në PD. Angazhimi për të ndërmarrë referendum për çdo çështje që i shqetëson, në nivel qendror apo lokal. Pra pritet që PD dhe PL të ndërmarrin të gjitha nismat ligjore dhe aksionet publike të nevojshme për realizimin e kësaj të drejte kushtetuese.

Sa i përket këshillave bashkiake, PD dhe PL kanë vendosur që do të drejtohen nga përfaqësues të propozuar nga Partia e Lirisë, në rastet kur këshilltarët e kësaj të fundit rezultojnë përcaktues në sigurimin e shumicës në këta këshilla.

Berisha dhe Meta angazhohen për realizmin e transparencës së plotë në lidhje me menaxhimin dhe përdorimin e të gjitha fondeve publike dhe vendimeve të Këshillave Bashkiake që lidhen me to, për realizimin e vazhdueshëm të seancave publike të hapura të Këshillave Bashkiake dhe për ndalimin e betonizimit të qyteteve.

MARRËVESHJA E PLOTË

Ndërmjet Partisë Demokratike dhe Partisë së Lirisë, për zgjedhjet vendore të 14 majit 2023

Sot, me datë 27 tetor 2022, ne, përfaqësuesit e Partisë Demokratike dhe Partisë së Lirisë, firmosim marrëveshjen që vijon, pas konstatimit se Shqipëria është në momente kritike:

- për shkak të korrupsionit shkatërrimtar;

- të asgjësimit të pluralizimit politik në nivel vendor;

- të shpopullimit masiv dhe tragjik;

- të krizës ekonomike, që po çon në kolaps vendin;

- të qeverisjes së kapur peng nga trafiqet, paraja e pisët dhe korrupsioni.

Në këto kushte, Partia Demokratike e Shqipërisë dhe Partia e Lirisë, dakordësohen që t’i ofrojnë Shqipërisë një alternativë fituese  në zgjedhjet vendore të 14 Majit 2023, që përfaqëson vetëm interesat e qytetarëve dhe interesin më të lartë publik.

Vendosin:

1. Konkurrimi për Kryetarët e Bashkive do të bëhet me kandidatë të përbashkët, të cilët vendosen nga rezultati i konkurrimit në primare, që do të organizohen nga Partia Demokratike e Shqipërisë.

2. Referendumi, si forma e shprehjes direkte të vullnetit të qytetarëve, për çdo çështje që i shqetëson, në nivel qendror apo lokal, do të jetë angazhim madhor dhe i patjetërsueshëm, për të cilin PDSH dhe PL do të ndërmarrin të gjitha nismat ligjore dhe aksionet publike të nevojshme për realizimin e kësaj të drejte kushtetuese të mohuar prej 25 vjetësh.

3. Këshillat Bashkiake, si institucionet më të rëndësishme të përfaqësimit të qytetarëve, do të drejtohen nga përfaqësues të propozuar nga Partia e Lirisë, në rastet kur këshilltarët e kësaj të fundit rezultojnë përcaktues në sigurimin e shumicës në këta këshilla.

4. Të angazhohen për realizmin e transparencës së plotë për menaxhimin dhe përdorimin e të gjitha fondeve publike, si edhe të gjitha vendimeve të Këshillave Bashkiake dhe të Bashkive që lidhen me to, përfshirë organizimin e seancave të hapura publike, me lidhje live në televizionet kombëtare dhe rrjetet sociale, në funksion të llogaridhënies para qytetarëve.

5. Të angazhohen, me prioritet të veçantë, për realizimin e vazhdueshëm të seancave publike të hapura të Këshillave Bashkiake, me lidhje live në televizionet kombëtare dhe rrjetet sociale, ku qytetarët të dëgjohen në mënyrë të drejtpërdrejtë në seancat plenare.

6. Të angazhohen përmes nismave të përbashkëta institucionale, për ndalimin e betonizimit kriminal dhe korruptiv të qyteteve, duke i dhënë përparësi në vendimmarrjen lokale shëndetit të qytetarëve dhe gjelbërimit të qyteteve.

Për Partinë Demokratike

Sali BERISHA
Kryetar

Për Partinë e Lirisë

Ilir META
Kryetar

Tiranë, 27 Tetor 2022