Nga çmimet e apartamenteve te pagat, Xhaferri: Rama s’do qytetarët, por fitimet e ndërtimit

Deputeti demokrat Besart Xhaferri u shpreh se thirrja e kryeministrit Edi Rama për të blerë prona nuk kishte lidhje me interesin e qytetarëve, por me fitimet e tij përmes pastrimit të parave në ndërtim.

Ai theksoi se këtë shqetësim e kishte ngritur prej dy vitesh në çdo dalje televizive dhe përmes kauzës “Një çati për çdo çift të ri”, por tashmë këtë e konfirmonte edhe një investigim i revistës ekonomike Monitor.

Sipas Xhaferrit, studimi tregonte qartë se fëmijët e shqiptarëve, pavarësisht bindjeve politike apo statusit shoqëror, nuk do të kishin mundësinë të blinin një shtëpi në Tiranë me pagën e tyre, qoftë duke punuar në shtet apo në privat.

 Ai nënvizoi se një apartament 70 metra katror kushtonte aktualisht 147 mijë euro, nga 56 mijë euro që kushtonte një dekadë më parë, dhe për këtë fajësoi taksat e vendosura nga qeveria si dhe pastrimin e parave në ndërtim.

POSTIMI I PLOTE

Për të gjithë ju që shtroni pyetjen se ç’më duhet mua se Edi Rama ka vendosur të pastrojë paratë e karteleve të drogës në ndërtim…

Përgjigjen unë ua kam dhënë prej dy vitesh në çdo dalje televizive dhe përmes kauzës që ngrita: "Një çati për çdo çift të ri." Por tani po ua thotë edhe një investigim i revistës ekonomike Monitor.

Studimi thotë qartë se fëmija juaj, qofshi socialist, qofshi demokrat, i pafe apo pa parti, nuk do ta ketë mundësinë të blejë një shtëpi në Tiranë me pagën e tij, ndonëse mund të punojë në shtet apo në privat.

Një apartament 70 metra katror kushton 147 mijë euro, nga 56 mijë euro që kushtonte një një dekadë më pare dhe shkak për këtë janë taksat e Edi Ramës dhe pastrimi i parave në ndërtim.

Ndërkohë edhe pse paga mesatare ka arritur në 77.5 mijë lekë/muaj, paga mesatare reale (e indeksuar me inflacionin, çka mat fuqinë reale blerëse) është realisht 66.1 mijë lekë.

Pra, për të blerë këtë apartament 70m2 tashmë duhen gati 19 paga vjetore reale bruto (18.6), ose gati 6 vite më shumë sesa një dekadë më parë, nëse nuk ka para informale.

Mjaftojnë këto shifra për të kuptuar “sinqeritetin” e thirrjes së Ramës për të blerë prona, pasi qartazi nuk ka hallin e rritjes së vlerës së pronës së huaj, por rritjen e fitimeve të tij përmes pastrimit të parave në ndërtim.