Nga prona mbi 500 mijë euro në Australi te apartamentet, garazhe... Ja pasuria e Vjosa Osmanit

Presidentja e Kosovës, Vjosa Osmani ka dorëzuar deklarimin e pasurisë në Agjencinë për Parandalimin e Korrupsionit (AKK).

Ajo ka deklaruar bashkë me bashkëshortin disa pasuri të patundshme dhe të ardhura financiare.

Sipas deklarimit, çifti zotëron:

Një banesë të blerë në vlerë prej mbi 59 mijë eurosh;

Një shtëpi që kushton 170 mijë euro;

Një parcelë toke me vlerë 35 mijë euro;

Një garazh me vlerë 6 mijë euro;

Gjithashtu, janë deklaruar dy prona të tjera të banimit:

Një pronë e përbashkët me vlerë 190 mijë euro;

Një pronë tjetër në Australi, e blerë për 510 mijë euro.

Presidentja ka deklaruar gjithashtu një automjet në pronësi të bashkëshortit, me vlerë 10 mijë euro, si dhe dy kredi aktive – një prej 40 mijë eurosh dhe tjetra prej 16 mijë eurosh. Në emrin e saj personal, Osmani ka deklaruar një parcelë toke të blerë në vitin 2016 për 35 mijë euro.

Lidhur me pronën në Australi, ajo ka sqaruar se financimi për këtë blerje ka ardhur nga burime të ndryshme: shitja e një shtëpie më të hershme në Australi që ishte në pronësi të bashkëshortit, trashëgimia nga prindërit e tij, kursime familjare dhe ndihmë financiare nga të afërmit.

Të ardhurat vjetore
Të ardhurat neto vjetore të Presidentes kapin shumën prej 33.104 eurosh, ndërsa nga mëditjet për udhëtime zyrtare jashtë vendit, ajo ka përfituar mbi 11.500 euro.

Ndërkaq, bashkëshorti i saj ka deklaruar të ardhura vjetore prej 11.068 euro, 12.500 euro nga qiraja e shtëpisë në Australi, si dhe mbi 19 mijë euro të fituara nga një vendim gjyqësor në Ministrinë e Punëve të Jashtme.

Ai ka përfituar gjithashtu rreth 2.800 euro mëditje për udhëtime jashtë vendit.