Noka “mbërthen” Dumanin para Komisionit të Ligjeve: Keni hapur proces pa prova dhe fakte ndaj Berishës

Sekretari i Përgjithshëm i PD, Flamur Noka i është drejtuar kreut të SPAK, Altin Dumanit, teksa ky i fundit raportonte para Komisionit të Ligjeve.

Noka ka mbërthyer me pyetje Dumanin, ndërsa i tha se kanë hapur një proces ligjor liderit të opozitës, Sali Berisha, pa asnjë fakt dhe provë.

Noka i ka renditur Dumanit skandalet e qeverisë nga inceneratori te dosja “5D”.

“Pyetja e dytë, ju i keni hapur proces ligjor kryetarit të PD dhe opozitës pa asnjë fakt dhe asnjë provë. Sot mbani të burgosur politik atë pa akuzë. Rast unik dhe i pabazuar në ligj. Sigurisht nisët një proces ndaj tij në shkelje të Kushtetutës.

Gjithashtu keni hapur një proces ligjor ndaj Fatmir Mediut, një drejtues tjetër i opozitës, megjithëse çështja e tij është parashtruar.

Proces kundër Ilir Metës, drejtues i një tjetër force opozitare.

Mos vallë po përdoreni politikisht për ët luftuar opozitën ose keni një mision të detyruar nga kreu i këtij regjimi?

E gjitha kjo perceptohet si luftë ndaj opozitës, ndërkohë që korrupsioni, vjedhja dhe krimi bëhen tjetër kund.

Pyetje tjetër, kryetari i opozitës mbahet sot i burgosur dhe ju i keni ndaluar të drejtën e komunikimit. A mund të thoni ku e bazoni në cilin ligj të shtetit shqiptar bazoheni ju pasi ligji që i referoheni është abroguar në vitin 2017?

Ku e bazoni ju ligjërisht pengimin e kryetarit të PD për të marrë pjesë në funksionin e tij kushtetues të deputetit në parlament sepse në bazë të ligjeve të këtij vendi, një vendim i tillë bëhet kur ka vendim të formës së prerë të gjykatës?

Hetimi i inceneratorëve, a mund t’i thoni publikut cili është qëllimi dhe pse janë copëzuar hetimet për inceneratorët dhe 5D-në e Bashkisë së Tiranës? Sepse janë vendime që janë marrë nga grup personash. Janë cenuar dhe abuzuar taksat e qytetarëve shqiptarë. Pse i keni copëzuar hetimet edhe për koncesionet?

Kush është përgjegjësi për 130 milionë euro të inceneratorit të Tiranës dhe 430 milionë eurot e inceneratorët në tërësi? Një invidid apo një grup individësh që nuk e quani grup kriminal?

E njëjta gjë edhe për 5D, nga ju ka hezitim për t’i cilësuar si grup kriminal”, ka deklaruar Noka.