Pak orë para protestës, Këlliçi: Rama është vënë në lëvizje për ta penguar, sot i vjen fundi opozitës së kapur

Partia Demokratike dhe shoqëria civile zhvillojnë sot protestën e thirrur në orën 19:00 para Kryeministrisë.

Deputeti Belind Këlliçi në një deklaratë nga selia blu u shpreh se nga informacionet që kanë mbërritur pranë PD-së, administrate shtetërore është vënë në lëvizje për të penguar valën e protestës që zbret sot në Tiranë.

Sipas Këlliçit, mësuesit janë urdhëruar që të jenë në punë pavarësisht se sezoni shkollor ka përfunduar, aktorëve iu është kërkuar të paraqiten për prova në Teatër ndërsa dyert e Kryeministrisë janë blinduar.

PD i ka bërë thirrje qytetarëve të mos i tremben skenarëve fake të qeverisë duke theksuar se opozitës së kapur nga qeveria i ka ardhur fundi.

Deklaratë e Belind Këlliçit:

Qytetarë nga e gjithë Shqipëria, nga veriu në jug, na kanë dërguar sot mesazhe, duke na siguruar për masivitetin e protestës.

Informacionet tona në rrugë partiake dhe jopartiake, na bëjnë me dije se administrata e Edi Ramës është vënë në lëvizje për të penguar valën e madhe shoqërore që do të zbresë sot në Tiranë.

Mësuesit janë urdhëruar të jenë në punë, edhe pse sezoni shkollor ka mbaruar.

Aktorëve u janë shpikur prova në Teatër, në mënyrë që zëri i tyre të mos gjëmojë në protestën e Frontit për Shpëtimin Kombëtar; dyert e kryeministrisë janë blinduar.

As demokratët dhe as shoqërinë, nuk i ndal asnjë blindë, siç është provuar nga vitet ‘90 e këtej.

Partia Demokratike u bën thirrje qytetarëve të mos tremben nga skenarët fake të qeverisë dhe as nga blindatat.

Ne dalim sot për të dëshmuar se opozita e këtij vendi ekziston, se ajo është e bashkuar me shoqërinë, se ajo është gati për të mbrojtur interesat e qytetarit.

Opozitës së kapur nga pushteti i ka ardhur fundi.

I bëjmë thirrje shqiptarëve, fermerëve, mësuesve, profesionistëve, të rinjve, të papunëve, të na bashkohen sot para Kryeministrisë.

Nëse nuk pastroni para, por mezi u dalin paratë për fundin e muajit, është koha të ngrihemi.

Nëse nafta, ushqimet e shportës, taksat, janë bërë të papërballueshme është koha të ngrihemi.

Nëse kthen kokën dhe sheh se një familjar apo mik të mungon, se ta ka marrë emigrimi, është koha të ngrihemi.

Le t’ia themi dy fjalë sonte njeriut që ka nëntë vite që nuk na dëgjon.

Të bashkuar, për Shqipërinë në rrezik, sonte ora 19.00!