"Paqa fiskale" e Ramës/ Blushi: Intrument i hapur për krimin elektoral dhe pastrimin e parave!

Sekretari i Përgjithshëm i Partisë së Lirisë, Tedi Blushi, ka komentuar këtë të hënë planin për "Paqen fiskale" të propozuar nga kryeministri Edi Rama. 

Në një deklaratë për media Blushi u shpreh se "Paqja Fiskale" e Ramës ishte një instrument i hapur për krimin elektoral dhe blerjen e votave, si dhe një alibi për pastrimin e parave të pista të narkotrafikantëve dhe grupeve kriminale.

Blushi theksoi se kjo nismë, e cila duhej të përfshinte një amnisti fiskale për bizneset, u miratua në mënyrë të njëanshme dhe pa transparencë, duke e shndërruar Shqipërinë në një shtet që rrezikon të bllokojë integrimin e saj në Bashkimin Europian.

Sipas tij, ndërkohë që Rama paraqiti këtë "paqe" si një zgjidhje magjike për ekonominë, ajo ishte një manovër që e dëmtonte rëndë procesin e integrimit dhe e përdorte politikisht për të siguruar mbështetje elektorale, duke dëmtuar bizneset dhe ekonominë e vendit.

Deklarata e Blushit

Në kulmin e fushatës elektorale, kryeministri Edi Rama ju premtoi bizneseve se do të bënte një “Paqe Fiskale”, të paraqitur si një zgjidhje magjike “e frymëzuar nga Roma e lashtë”, që parashikonte fshirjen e 1,6 miliard euro borxhe të bizneseve ndaj shtetit shqiptar.

Kjo “paqe” që do të niste menjëherë pas zgjedhjeve të 11 Majit, ishte jo vetëm një karem dhe krim flagrant elektoral në funksion të blerjes së votave, por edhe një alibi e Edi Ramës për legalizimin dhe pastrimin e parave të pista të narkotrafikantëve dhe kriminelëve gjithëfarësh.

Ishin një alibi pikërisht për ata, që kreu i misionit të vëzhguesve të Parlamentit Europian, Z. Gahler i cilësoi si “struktura të qëndrueshme kriminale” që nuk lejojnë ndryshimin e pushtetit në Shqipëri.

E vendosur në mënyrë të njëanshme, pa asnjë transparencë dhe pa asnjë analizë të ndikimit ekonomik apo ligjor kjo amnisti fiskale klienteliste dhe korruptive do të refuzohej nga Bashkimi Europian, që i ka dhënë së fundmi një tjetër shuplakë të qartë dhe shumë të rëndë Edi Ramës. 

Komisioni Europian ka konfirmuar qartësisht se nuk është pyetur për këtë iniciativë, duke paralajmëruar se nëse nisma miratohet mund të ndikojë negativisht në procesin e anëtarësimit të Shqipërisë në Bashkimin Europian dhe do të trajtohet si çështje serioze gjatë negociatave për kapitujt përkatës të acquis të BE-së.

Kjo është një dëshmi shumeëe qartë se si Qeveria shqiptare në mënyrë të njëanshme, duke anashkaluar standardet europiane dhe duke politizuar çështje të ndjeshme fiskale për përfitime të momentit, përdori “paqen fiskale” për blerjen e votave më 11 Maj duke rrezikuar seriozisht bllokimin e procesit të integrimit europian.

Ndaj dhe vendin e "paqes" menjëherë me mbarimin e zgjedhjeve e zuri “lufta” dhe Rama nxori fytyrën e vërtetë. 

Bizneset raportojnë çdo ditë se kontrollet e inspektorateve, që u zhdukën në muajt e fushatës, kanë rifilluar më vrullshëm se kurrë kontrollet dhe gjobat arbitrare.

Administrata Tatimore ka marrë së fundmi akses të menjëhershëm në informacionin mbi bizneset e regjistruara, që do të mundësojë monitorimin e të dhënave në kohë reale, me qëllim mbledhjen e borxheve tatimore, duke paralajmëruar intensifikim të procesit të mbledhjes me forcë të detyrimeve.
Edi Rama, është një armik i biznesit të ndershëm, plani i të cilit është vetëm rritja e taksave, gjobitja arbitrare dhe humbja e vendeve të punës.

Qeveria nuk ka asnjë plan për të forcuar klimën e biznesit dhe për të krijuar punë, veç prioritetit të saj madhor për të ndarë pasuritë publike me oligarkët dhe klientët e saj që vazhdojnë të zhvatin barbarisht taksat e qytetarëve me shërbime të pakryera dhe të zaptojnë pronat shtetërore e private me statusin e “partneritetit strategjik”.

Në këtë klimë mbytëse për investitorët e brendshëm dhe të huaj, kur koncencsionet, PPP-të dhe tenderat janë përqendruar vetëm në një grusht oligarkësh, kur megaafera e inceneratorit, që nuk ekziston nuk ndalet së bashku me fluksin e madh të të ardhurave të paligjshme nga trafiku i drogës, kontrabanda dhe evazioni fiskal i lartë, si dhe zhvlerësimi dramatik dhe i qëllimshëm i euros, është domosdoshmëri kthimi i ekonomisë në normalitet në funksion të zhvillimit të qëndrueshëm.

Shqipëria meriton një model të qartë ekonomik që mbështetet tek nxitja e prodhimit, tek rritja e eksporteve, tek ekonomia e dijes, tek liria dhe klima miqësore ndaj biznesit, tek ulja e barrës fiskale dhe formalizimi i ekonomisë, tek garantimi i të ardhurave jetike për shtresat më në nevojë dhe sidomos tek konsolidimi dhe zgjerimi i shtresës së mesme të shoqërisë.

Por kjo nuk mund të arrihet kurrë për sa kohë që Edi Rama ka zaptuar karrigen e Kryeministrit dhe telekomandohet nga narkotrafikantët.

Ndaj permbysja e Ramës dhe bandës së tij plaçkitëse me të cilën grabiti edhe zgjedhjet është zgjidhja e vetme për mbrojtjen e bisneseve dhe ndalimin e dramës së madhe të shpopullimit rrënues.