Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

PD alarmon: Rama po kriminalizon qytetarët, burg deri në 3 vite për parkim të dyfishtë

Politiko 26 Janar 2026, 15:22

PD alarmon: Rama po kriminalizon qytetarët, burg deri në 3 vite

Partia Demokratike ka reaguar ashpër ndaj ndryshimeve të propozuara nga qeveria në Kodin Penal, të cilat pritet të kalojnë nesër në Kuvend. Në një deklaratë për media, deputetja e PD-së, Elda Hoti, akuzoi kryeministrin Edi Rama se po përdor ligjin penal si instrument frike dhe kontrolli politik ndaj qytetarëve dhe medias.

Sipas Hotit, megjithëse projektligji prezantohet si një nismë për përafrim me legjislacionin e Bashkimit Evropian, në thelb ai përfaqëson një zhvendosje të rrezikshme drejt penalizimit disproporcional dhe kufizimit të lirive themelore.

Deputetja theksoi se ndryshimet e propozuara ashpërsojnë masat penale, rrisin minimumet e dënimit dhe kufizojnë diskrecionin e gjykatës, duke cenuar parimet bazë të sigurisë juridike dhe proporcionalitetit.

PD e cilësoi si kulmin e absurditetit juridik propozimin për kriminalizimin e parkimit të dyfishtë, me dënim deri në tre vite burg. Sipas Hotit, kjo masë nuk ka asnjë lidhje me sigurinë publike dhe shërben vetëm për të zhvendosur vëmendjen nga dështimet reale të qeverisë.

Ajo theksoi se në një vend ku mungojnë parkimet publike, ku urbanistika është shkatërruar nga ndërtimet pa leje dhe institucionet kanë dështuar të garantojnë hapësira funksionale për qarkullimin, qeveria zgjedh të ndëshkojë qytetarët në vend që të zgjidhë problemet.

Sipas PD-së, është e papranueshme që shkeljet administrative të trajtohen si vepra penale, ndërkohë që korrupsioni i nivelit të lartë, zënia e trojeve publike dhe shkeljet e rënda urbanistike mbeten të pandëshkuara. “Drejtësia e vërtetë nuk ndërtohet me burgosjen e qytetarëve, por me institucione funksionale dhe luftë reale kundër korrupsionit”, u shpreh Hoti.

DEKLARATË PËR MEDIA DEPUTETJA E PD, ELDA HOTI

Edi Rama ka vendosur të kalojë nesër në Kuvend ndryshime të rëndësishme në Kodin Penal, të cilat përfshijnë masa të reja represive ndaj qytetarëve shqiptarë dhe medias. Edhe pse ky projektligj paraqitet si një nismë për përafrim me legjislacionin e Bashkimit Evropian, në thelb përfaqëson një zhvendosje të rrezikshme drejt penalizimit disproporcional dhe kontrollit politik përmes ligjit penal.
Në mënyrë të drejtpërdrejtë, projektligji:
-ashpërson në mënyrë disproporcionale masat penale;
-rrit minimumet e dënimit dhe kufizon diskrecionin e gjykatës;
-krijon paqartësi juridike, duke cenuar parimet themelore të sigurisë juridike dhe proporcionalitetit.

Veçanërisht shqetësuese janë ndryshimet që lidhen me:
nenin 120, i cili hap rrugë për kriminalizim të paqartë të sjelljeve dhe shprehjeve, duke krijuar rrezik real për abuzim dhe ndjekje selektive;
nenin 237, i cili, përmes formulimeve të gjera dhe të paqarta, mund të përdoret si instrument ndëshkues ndaj protestës qytetare dhe mosbindjes civile;
nenin 238, i cili forcon një qasje penale represive ndaj qytetarëve, duke zhvendosur balancën nga mbrojtja e rendit kushtetues drejt mbrojtjes së autoritetit politik.
Në kulmin e absurditetit juridik, këto ndryshime synojnë kriminalizimin e parkimit të dyfishtë me dënim deri në tre vite burg. Ky është një akt i rrezikshëm dhe i padrejtë, pa asnjë lidhje me sigurinë publike, por me zhvendosjen e vëmendjes nga dështimet reale të qeverisë.
Në një vend ku mungojnë parkimet publike, ku urbanistika është shkatërruar nga ndërtimet pa leje dhe ku institucionet kanë dështuar të garantojnë hapësira funksionale qarkullimi, qeveria zgjedh rrugën më të lehtë: burg për qytetarët, amnisti për përgjegjësit.
Sjellje tipike e një pushteti që nuk ndërton shtet, por kërkon të mbulojë paaftësinë e vet përmes frikës penale.
Është e papranueshme që një shkelje administrative të trajtohet si vepër penale, ndërkohë që korrupsioni i nivelit të lartë, zënia e trojeve publike dhe shkeljet e rënda urbanistike mbeten realisht të pandëshkuara.
Kjo cenon drejtpërdrejt parimin e proporcionalitetit: nuk mund të barazohet një parkim i gabuar me vepra penale që rrezikojnë seriozisht rendin shoqëror.
Ligji penal duhet të jetë mjeti i fundit i ndërhyrjes shtetërore, jo një instrument frike për të maskuar dështimin institucional. Në vend të ndërtimit të parkimeve, përmirësimit të infrastrukturës dhe zbatimit korrekt të ligjit administrativ, propozohet burgu. Kjo nuk është reformë, por një precedent i rrezikshëm që hap rrugën për kriminalizimin e përditshmërisë.
Edhe vetë Raporti i Konsultimit Publik dëshmon se një sërë komentesh profesionale dhe shqetësimesh thelbësore janë refuzuar, duke u shtyrë në mënyrë të papërgjegjshme për një “Kod Penal të ri”, ndërkohë që ndryshimet më problematike kërkohet të miratohen me urgjencë.
Në tërësi, ky projektligj e shndërron Kodin Penal nga një mjet mbrojtjeje të shoqërisë në një instrument kontrolli dhe frikësimi, duke goditur qytetarët e zakonshëm, lirinë e shprehjes dhe të drejtën për protestë, ndërkohë që krimi i organizuar dhe korrupsioni qeveritar mbeten të paprekur.
Rritja e dënimeve penale nuk është reformë. Represioni penal nuk zëvendëson shtetin ligjor, institucionet funksionale dhe luftën reale kundër korrupsionit.
Çdo përpjekje për të forcuar pushtetin përmes frikës penale është e papranueshme dhe do të kundërshtohet me vendosmëri.