PD denoncon: Pacientët në spitalin e Fierit prej 6 muajsh pa ushqim, paguajnë 320 mln lekë për hotelin e stafit

Deputetja demokrate Zheni Gjergji ka deklaruar skandalin në Spitalin e Fierit.

Gjergji, në një deklaratë për mediat nga selia blu, u shpreh se prej 6 muajsh pacientëve nuk u jepet ushqim nga spitali, por nga familjarët. Gjergji theksoi se në këto kushte spitali paguan 320 milionë lekë për të akomoduar stafin e spitalit në hotel.

Gjergji i bëri thirrje organeve hetimore të reagojnë para rasteve abuzive që po ndodh me shëndetësinë.

Deklarata:

Çfarë po ndodh në Spitalin e Fierit është tregues se si menaxhohet shëndetësia, si trajtohen pacientët e qytetarët dhe ku shkojnë miliona euro të taksave të shqiptarëve.

Një ditë më parë kolegia Albana Vokshi denoncoi se prej marsit mungon ushqimi për të shtruarit atje. Janë familjarët që e sigurojnë.

Po ashtu, u bë e ditur se 6.6 ton mbetje spitalore janë aty, të palëvizura.

Kjo gjendje nuk e ka penguar aspak Ministrinë e Shëndetësisë të bëjë tenderin e ri për akomodimin e personelit mjekësor për spitalin Memorial të Fierit.

I njëjti subjekt, ka marrë për akomodimin, edhe për një vit tjetër, pa garë dhe me ofertën më të lartë, shumën e 320 mln lek pa tvsh. Për 3 vite, Ministria e Shëndetësisë ka dhënë afërsisht 1 mln euro për fjetjen e personelit në hotel luksoz.

I bie afërsisht 1 mijë euro në ditë si shpenzim.

Pa u ditur mirë numri i personelit që akomodohet. Pa u marrë në konsiderata oferta të tjera me çmim më të ulët.

Nuk ka dyshim se mjekët dhe ekipi mbështetës, duhet të akomodohen. Po a mund të jepen kaq shumë para kur në spital mungon ushqimi për pacientët? A jepen kaq shumë para, kur nuk realizohet heqja e mbetjeve spitalore që përbën një kërcënim serioz?

Tenderi në fjalë është realizuar me 29 korrik. Qeveria e korrupsionit galopant mund të ndërrojë herë pas herë fytyrat e dikastereve, por zakonin e abuzimit askush prej tyre se harron, sepse ky është sistemi.

Ministrja e Shëndetësisë, Albana Koçiu, me sa duket kërkon të ecë në gjurmët e dy paraardhësve të saj, të cilët jo vetëm shkatërruan shëndetësinë dhe rritën shpenzime nga xhepi të shqiptarëve për mjekim, por dhe abuzuan masivisht në tendera e PPP korruptive.

Pas skandalit drithërues të Onkologjikut, dhe mosmbajtjes së përgjegjësive të drejtpërdrejta të Ministres e vartësve të saj të QSUNT, abuzimeve të keqmenaxhimit të situatës së Urgjencës së Tiranës prej 17 milion euro, vjen dhe kjo shkelje e përsëritur me procedurat e tenderimit në mënyrë klienteliste për akomodimin në hoteleri me 4 yje të personelit shëndetësor në Spitalin Rajonal Memorial të Fierit.

Ky është një rast flagrant klientelizmi dhe abuzim me paratë e taksapaguesve shqiptarë, kur në fakt do të duhej të ishte model për shëndetësinë nën të ashtuquajturën menaxhimin autonom të spitaleve publike. Ky “model” jo vetëm nuk ofron transparencë por mbi të gjitha është një mundësi vetëm për abuzime marramendëse me buxhetin.

Kjo në kohën kur mungojnë shumë shërbime spitalore në vend.

Pacientëve si në Onkologjik nuk u sigurohet trajtimi shëndetësor me barnat shpesh dhe jetike, dhe trajtimet imazherike apo kimioterapeutike nuk kryhen pasi mungojnë elementët apo aparaturat janë jashtë funksionit.

Gjej rastin t’i bëj një thirrje publike organeve hetimore të mos bëjnë më veshin e shurdhër përpara skandaleve e abuzimeve të njëpasnjëshme që zhvillohen në shëndetësi.

Ky skandal është një indicie e mjaftueshme për të nisur një procedim penal. Mundi dhe djersa e taksapaguesve shqiptarë nuk mund të nëpërkëmben.

Vjedhjet në shëndetësi janë krimi më i rëndë.