PD depoziton kërkesën për shkarkimin e Begajt, Bardhi rendit 7 shkeljet kushtetuese të Presidentit

Partia Demokratike ka depozituar në Kuvend kërkesën për fillim e procedurave për shkarkimin nga detyra të Presidentit Bajram Begaj.

Në një deklaratë për shtyp nga Kryesia e Kuvendit, Bardhi renditi 7 shkeljet kushtetuese të presidentit duke filluar nga dekretimi i zgjedhjeve në Tiranë, te ministrja virtuale Diella e deri tek përfitimet personale.

“Kërkesa është hartuar me një material voluminoz ku analizohen së bashku me provat përkatëse të gjitha shkeljet e kryera të presidentit. Po ashtu ne jemi të bindur se Begaj nuk mund të vazhdojë më të jetë de juro kryetar shteti dhe përfaqësues i popullit që në fakt de facto e ka humbur prej kohësh. Pas një analize shteruese, kemi arritur në konkluzionin se presidenti ka konsumuar 7 shkelje kushtetuese të rënda. Kërkesa është hartuar me një material voluminoz ku analizohen së bashku me provat përkatëse të gjitha shkeljet e kryera të presidentit”, deklaroi Bardhi.

Kreu i grupit të PD akuzoi Begajn se ka dhënë miliona euro tendera për një kompani sigurimesh, e cila ka punësuar fiktivisht djalin e tij, qysh kur Begaj është emëruar President.

“Përfitimet personale dhe të të birit aq sa për këtë shkelje dyshohet se ka kryer një krim të rëndë të cilin PD do i drejtohet SPAK. Në kundërshtim me nenin 11, 86, 88 dhe 89 të Kushtetutës, ka krijuar gjendje konflikti interesi që cenon konkurrencën e lirë në treg duke i dhënë përfitime të prokurimeve publike të presidencës kompanisë private ku është punësuar i dyshuar në mënyrë fiktive, djali i tij, pas emërimit të Begajt si presidenti. Djali i presidentit të republikës vetëm 23 vjeç, ndërkohë që ndodhet jashtë vendit, sipas dokumenteve tona rezulton me studime dhe i punësuar jashtë Shqipërisë, njëkohësisht, rezulton se është i punësuar në një kompani sigurimesh brenda territorit Shqipërisë, me një pagë që është dyfishi i pagës mesatare që kanë punonjësit në këtë kompani. Vetëm 23 vjeç, por do duhet të verifikoni pagat e kompanisë, ka pagë të barabartë me drejtorin e përgjithshëm të kompani dhe dy drejtorët e departamenteve. I jep tenderët dhe kompania punëson një 23 vjeçar që s’ka lidhje me fushën e sigurimeve. Bëhet fjalë për një vlerë mijëra euro që djali i presidenti përfiton çdo vit nga kjo kompani që nga ana tjetër merr mijëra euro çdo vit nga institucioni i presidentit të republikës", tha Bardhi.

7 shkeljet e Begajt

Dekretoi zgjedhje në Tiranë në shkelje të Kushtetutës;

Ndërhyri në mandatin e anëtarëve të  Gjykatës Kushtetuese, i preku pavarësinë;

Dekretoi në shkelje ligjin për Komisionet Hetimore;

Dekretoi ministren virtuale ‘Diella’;

S’ndali trupën diplomatike nga përfshirja në fushatën e vitit 2025;

Kabineti i tij ndërhyri në procesin e administrimit të zgjedhjeve;

Përfitime personale nga i biri, do i drejtohemi SPAK

Djali i Begajt ndodhet jashtë shtetit me studme, rezulton i punësuar në një kompani sigurimesh