“PD duhet të distancohet”, Jonila Godole kërkon largimin e Berishës, deklarata pasqyrohet edhe te ‘Rilindja Demokratike’

Një ditë pasi mori postin si drejtuese e Sekretariatit për të Përndjekurit Politikë në Partinë Demokratike, studiuesja Jonila Godole ka deklaruar hapur se PD duhet të distancohet nga ish-kryeministri Sali Berisha, i shpallur ‘non grata’ nga SHBA.

Duke folur në ‘News 24’, Godole solli në vëmendje rastin e ish-kancelarit gjreman Helmut Kohl, që sipas saj në një moment të caktuar partisë i është dashur të marrë vendimin të ndahet prej tij, duke respektuar kontributin që ka dhënë deri në fund.

“Vendimi i z. Berisha është vendim personal i tij. Çdo forcë politike tregon pjekurinë e vet pikërisht në këto lloj momentesh të rëndësishme. Kjo do ta çojë PD përpara ose jo, këto janë kosto që do t’i mbajnë ata. Unë kam thënë që bota ka treguar që dhe personalitete të mëdha, të cilët kanë qenë absolutisht të rëndësishëm për gjithë Evropën, ku kam sjellë në vëmendje rastin e ish-kancelarit gjreman  Helmut Kohl, në një moment të caktuar partisë i është dashur të marrë një vendim, që të ndahej prej tij, por duke respektuar kontributin e tij deri në fund.

Këto janë vendime që i marrin partitë vetë. Këto janë modele që unë i kam sugjeruar. Nëse mua do më pyesin sot nga brenda PD, patjetër që do ta sugjeroj këtë dhe do flas hapur. Por kjo është pjesë e PD, duhet të tregojë se është vërtet një parti që e meriton të vijë në pushtet.

Unë shpresoj shumë që PD të bëjë zgjidhjen e tyre. Sa i përket kauzës së të përndjekurve politikë, për fat të keq nuk ka një forcë tjetër politike këtu, përveç PD, që të jetë shprehur hapur dhe qartë se ai regjim ka qenë kriminal. Ai regjim ka qenë kriminal. Unë do mundohem që në pak vite të arrijmë të kemi një lloj paqeje, të kemi një transparencë të plotë për krimet e komunizmit dhe një kërkim faljeje reale”, ka deklaruar Godole.

Deklarata pasqyrohet edhe te ‘Rilindja Demokratike’

Ajo që ka habitur më shumë pas kësaj deklarate të fortë nga sekretarja e porsazgjedhur në Këshillin Kombëtar të PD ka qenë pasqyrimi i saj në gazetën ‘Rilindja Demokratike, organi zyrtar i Partisë Demokratike.

Gazeta nuk ka mbajtur qëndrim, por ka pasqyruar deklaratën e Godoles, e cila kërkon hapur largimin e Berishës nga PD, por shumë shpejt lajmi është fshirë.

Kujtojmë se pas shpalljes ‘non grata’, SHBA kërkon qartë që ish-kryeministri dhe ish-presidenti, Sali Berisha të mos jetë pjesë e deputetëve të PD në parlamentin e ri që fillon punimet në shtator.

Vetë Sali Berisha, i rizgjedhur deputet i PD, në Zgjedhjet Parlamentare 2021, ka deklaruar pas vendimit të DASH ndaj tij se "pret me padurim të jetë në Parlamentin e ri.”

Ndërkohë, kryeredaktori i gazetës RD, Bledi Kasmi ka reaguar pas këtij publikimi, duke shkruar se “Asgjë nuk na lëkund nga besimi se Berisha në funksionet e tij të të bërit shtet dhe opozitar, në të gjithë dimensionin e tij politik mbetet burrë shteti, por fjala e lirë është tjetër, pasqyrimet e saj janë tjetër dhe qëndrimet mbi to krejt tjetër.

Mirënjohje të gjithë lexuesve për sugjerimet e tyre”.