PD nxjerr emrat: Ky është ish-drejtuesi dhe shefi i policisë të lidhur me krimin dhe të angazhuar në fushatën e socialistëve

Përfaqësuesit ligjor të PD, Ivi Kaso dhe Marash Logu

Partia Demokratike, e cila pretendon për manipulime zgjedhore, ka treguar emrat, që sipas saj, janë implikuar në këtë skemë. Përfaqësuesi ligjor Marash Logu, thotë se drejtuesi i fushatës në Gjirokastër, Arianit Arapi ka lidhje me bandën e Shullazit. Sipas Logut, Arapi, i cili ka qenë edhe shef policie është hetuar për drogë.

Ai shton se Arapi në bashkëpunim me Andrea Çaushin, kushëri i ish-ministrit të Brendshëm Saimir Tahirit kanë lejuar kultivimin e bimëve narkotike në fshatin Kalivaç të Tepelenës. Gjithashtu sipas PD, Arapi në bashkëpunim me drejtorin e policisë së Përmetit Ermir Gërxhanin kanë lejuar kultivimin e bimëve narkotike në këtë qytet.

Logu tha se një person tjetër me shkuar kriminale që është përfshirë në fushatën e kandidatit socialist Bledi Çuçit është vëllai i kryetarit të PS në Tepelenë, Dino Selimi. Sokol Feruni dhe Andi Shkurta janë dy emra të tjerë të denoncuar nga Marash Logu, si të hetuar për drogë dhe të angazhuar në fushatën e socialistëve në Gjirokastër.

“PS në qarkun e Gjirokastër kishte drejtues politik Bledar Çuçin, i renditur i katërti në listën shumëemërore. Drejtori i Fushatës ishte shtetasi Arianit Arapi, ish-shefi i Policisë, i hetuar për lidhje me drogën dhe bandën famkeqe të Shullazit. Lidhja mes Çuçit dhe Arapit daton që nga viti 2017, kohë kur Çuçi kandidonte si deputet për qarkun e Gjirokastrës dhe Arapi mbante funksionin e drejtorit të Policisë së qarkut të Gjirokastrës duke u përfshirë drejtpërdrejtë në manipulimin e votave.

Sipas informacioneve zyrtare të SHISH dhe Policisë së Shtetit, ky shtetas në bashkëpunim me Andrea Çaushin, kushëri i ish-ministrit të Brendshëm Saimir Tahiri kanë lejuar kultivimin e bimëve narkotike në fshatin Kalivaç të Tepelenës, madje kanë penguar forcat policore për të monitoruar këtë zonë. Ky shtetas së bashku me persona me rekorde të rënda kriminale nga Fushë-Kruja, të lidhur me bandën e Shullazit, si dhe me bashkëpunimin e drejtorit të Policisë Përmet Ermir Gërxhani kanë lejuar kultivimin e bimëve narkotike në Përmet.

Një tjetër person me rekorde kriminale është vëllai i kryetarit të PS Tepelenë, Dino Selimi, i cili ka shërbyer si transportues për narkotikët nga zonat malore të Tepelenës dhe në qytetin bregdetar të Vlorës. Sokol Feruni është një tjetër person me rekorde të tmerrshme kriminale për kultivimin e narkotike që është përfshirë drejtpërdrejtë në fushatën e Bledar Çuçin.

Ky shtetas në bashkëpunim me vëllain e tij dhe shtetasin Andi Shkurta janë të njohur për lidhjet e tyre kriminale. Për shkak të lidhjeve të mësipërme këta shtetas kanë zbatuar një skemë kriminale të blerjes së votës. Sic jemi në dijeni në kohën kur ministër i Brendshëm ishte Tahiri, prokurorët e Krimeve të Rënda dërguan në gjykatë një pjesë të anëtarëve të grupit, por shpëtuan Arianit Arapi dhe Ermir Grexhani, që ishin drejtues të policisë Gjirokastër dhe Përmet. Në shkurt të 2021 Arianit Arapi pasi ishte larguar nga Policia e Shtetit për shkak të lidhjeve me elementë kriminal, u emërua këshilltar i Ministrit të Brendshëm dhe drejtues i Fushatës së PS në Gjirokastër”, tha përfaqësuesi i PD.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm