PD: Rama i jep të drejtën Korporatës Shqiptare të Investimeve të shesë prona publike për klientët e tij

Partia Demokratike ka reaguar pas vendimit të Këshillit të Ministrave që i jep mundësinë Korporatës Shqiptare të Investimeve, shoqëri tregtare 100% publike, të japë me qira apo të shesë pronat publike tek palët e treta private.

Anëtari i Kryesisë së PD, Eno Bozdo në një deklaratë për mediat shprehet skeptik për këtë vendim.

Ai thotë se bordi i kësaj kompanie, i përbërë në shumicë nga administrata politike e Edi Ramës, do të vendosë se kujt t`ia shesë pronat më të vlefshme publike, sipas tij për klientët e preferuar të kryeministrit.

Deklarata e plotë:

Vendimi i djeshëm i Këshillit të Ministrave i jep mundësinë Korporatës Shqiptare të Investimeve, shoqëri tregtare 100% publike, të japë me qira apo të shesë pronat publike tek palët e treta private, gjithmonë në ‘emër të zhvillimit ekonomik të vendit’.

Me fjalë më të thjeshta, bordi i kësaj kompanie, i përbërë në shumicë nga administrata politike e Edi Ramës, do të vendosë se kujt t`ia shesë pronat më të vlefshme publike.

Dhe kuptohet se për kë do të vendosë ky bord: për klientët e preferuar të kryeministrit.

Krijimi i Korporatës Shqiptare të Investimeve me një ligj specifik të vitit 2019, si një shoqëri tregtare 100% publike, u prit me kundërshti të shumta nga Partia Demokratike, ekonomistë dhe specialistë të fushës, por edhe nga institucionet financiare ndërkombëtare si psh FMN. Thelbi i kundërshtimit ishin kompetencat që kjo shoqëri merrte, si dhe ekspozimi i saj joprofesional ndaj projekteve private që mbartin risk.

Katër vjet pas krijimit të saj, bilanci i punës së kësaj shoqërie është zero. Ajo deri tani thjesht ka shpenzuar miliona euro të shqiptarëve, pa dhënë mbrapsht asnjë produkt.

Në bilancet e fundit të depozituar, vetëm për një vit, korporata me 11 punonjës ka shpenzuar 280 mijë euro për pagat e tyre dhe 200 mijë euro për honorarë shpërblimi për bordin e saj, pavarësisht se nuk ka kryer asnjë punë të vetme.

Pikërisht për këtë ‘standard të lartë koorporativ’ dhe këtë ‘sukses të merituar’,  Edi Rama tashmë i delegon kësaj kompanie shtetërore të drejtën të japë me qira apo të shesë, nëse ia kërkon interesi i saj, pronat publike, ose ndryshe pronat ku të gjithë shqiptarët janë aksionerë. Pra, këtyre njerëzve që paguhen për qokë, tashmë u lihen në dorë pronat tona më të vlefshme!

Është më se e qartë se qëllimi i vetëm është dhurimi i pronave publike tek ‘investitorët strategjikë’, të përzgjedhur nga vetë Rama prej aradhës së oborrit klientelist të tij. Investitorët strategjikë të lidhur ngushtë me qeverinë do të zhvillojnë projektet e tyre në tokat më të mira, përgjithësisht në breg të detit apo liqenit. Do t`i blenë këto prona, për fare pak para dhe do t`i bëjnë të tyret.

Kjo është një skemë e madhe për gllabërimin e pronave më të vlefshme publike si dhe në të njëjtën kohë, pastrimin e parave. Pas projektit të betonizimit të Tiranës dhe qyteteve kryesore te Shqipërisë, objektivi tjetër është gllabërimi i pronave publike, të cilat në fakt do të duhej të ishin përdorur për kompensimin e pronarëve të ligjshëm të shpronësuar nga regjimi komunist.

 Por asgjë nuk ndodh rastësisht në haurin e Edi Ramës. Përpara disa javëve Rama ndryshoi ligjin për Zonat e Mbrojtura, duke i hapur rrugë investimeve në projekte ndërtimore në këto zona.

Por ka një problem jo të vogël: një pjesë e mirë e tokave në zonat e mbrojtura janë prona publike. Që të mbyllet qarku dhe paraja të shkojë atje ku Ramës i intereson,  autorizohet Koorporata e Investimeve që këto prona publike t`i shesë apo ti japë me qira, sipas dëshirës së saj dhe gjithmonë në emër ‘të zhvillimit ekonomik të vendit’.

– Të një zhvillimi ku fitojnë gjithmonë ‘klientët strategjikë’ të Edi Ramës dhe humbasin gjithmonë shqiptarët.

– Të një zhvillimi kur të fortët e drogës kontrollojnë sektorë të tërë të ekonomisë, dhe shqiptarët zgjedhin gjithmonë e më shumë emigrimin.

-Të një zhvillimi ekonomik ku pasurohesh jo për meritë, por sepse je afër me pushtetin, dhe varfërohesh jo sepse nuk je i zoti, por sepse je kritik me këtë qeveri.

Mesa duket, saga e grabitjes së publikes në këtë vend nuk do të rreshtë kurrë përsa kohë Rama bën atë që do dhe di të bëjë më mirë.

Ka vetëm një rrugë për t’u përballur me të dhe aradhën e tij: reagimi i fuqishëm, angazhimi çdo çast për të rrëzuar këtë regjim kleptokrat.

O Sot, O Kurrë, për të shpëtuar Shqipërinë!