Përfitoi 25 mln euro tendera nga Veliaj, Këlliçi padit Mariglen Qaton në SPAK

Dy javë pasi denoncoi publikisht skemën e punësimeve nepotike në bashkinë e Tiranës dhe atë të përfitimeve nëpërmjet tenderave e lejeve të ndërtimit, Belind Këlliçi ka paditur në Prokurorinë e Posaçme, kreun e Inspektoriatit Ndërtimor, Mariglen Qato.

Më 26 prill, Këlliçi denoncoi se Qato ka përfituar miliona euro nga 29 tendera që lidhen personalisht me të në kohën kur drejtonte UKT-në dhe me familjarët e tij, përmes kompanisë “5D”, që është “de facto” në pronësi të tij.

“Mariglen Qato përmes të vëllait të tij dhe të afërmve të lidhur drejtpërdrejt me vëllain e tij nga viti 2016 ka hapur një kompani të cilës në fakt i ka ndërruar 3 emrin. Që quhej fillimisht IGOR ELEKTRIK, më pas V.A.S konstruksion dhe tashmë është e famshmja 5D konstruksion, janë 5 drejtorët e bashkisë me të cilën, do të thoni ju çfarë ka problem, ka marrë plot 29 tendera në vlerën 25.16 mln euro pa TVSH.

Por nga i ka marrë këto tendera, se nuk është se ka bërë biznes të ndershëm. Këto tendera ky zotëri i ka marrë nga Bashkia e Tiranës, plot 15 të tilla në vlerën 10.5 mln euro. Nga UKT-ja ku ka qenë titullar dhe drejtues dhe ku ka familjarët e tij që drejtojnë financat ka marrë 10 tendera në vlerën 9.5 mln euro. Nga OSHEE ka marrë 3 tendera në vlerën 3.2 pothuaj mln euro dhe nga ARRSH-ja 1 tender në vlerën 1.89 mln euro”, denoncoi asokohe Këlliçi.

Për shfrytëzimin e pozicionit të tij në kupolën e administratës duke përftuar 25 milionë euro tendera, kandidati opozitar në zgjedhjet e 14 Majit, ka dorëzuar padinë ndaj Qatos në SPAK dhe BKH, duke i renditur 10 akuza.

Ndër akuzat që Këlliçi ka përfshirë në padinë e publikuar nga Syri.net janë ato për “shkelje të barazisë në tendera”, “korrupsion aktiv dhe pasiv si funksionar publik” dhe “fshehje ose deklarim i rremë i pasurisë.

Ndërkohë, kujtojmë se Këlliçi në denoncimin e tij publik akuzoi Mariglen Qaton se nëpërmjet raportit të ngushtë me Erion Veliajn, ka emëruar njerëz të afërt në poste të rëndësishme në administratën e Bashkisë së Tiranës.

Po ashtu, sipas Këlliçit me milionat e përfituara nga tenderat e “dhuruar” nga Veliajt, kreu I INUV-it dhe dy drejtorë të tjerë (ish-bashkëpunëtorë të tij në UKT), janë shndërruar në biznesmenë që operojnë në fushën e ndërtimit dhe po betonizojnë Tiranën.

Kandidati i koalicionit “Bashkë Fitojmë” renditi disa nga lejet që treshja e drejtorëve të Veliajt ka marrë për ndërtimin e kompleksve të banimit, por “qershia mbi tortë” është një hotel me vlerë 15 milionë euro, që Qato po ndërton në bregdetin e Durrësit.

“Kjo është një nga lejet që ka marrë Mariglen qato në dtë 5 Prill 2022 për ndërtimin e kësaj godine banimi dhe shërbimi në qytetin e Tiranës. Kalojmë te leja e radhës, në datë 2 Shkurt 2021 po kompania ‘5D’ ka marrë këtë leje për një godinë tjetër banimi. Kalojmë te leja tjetër e radhës, në datë 8 Nëntor 2022 ka marrë lejen e ndërtimit për këtë godinë banimi. Ndërkohë dua të ndalem te ‘qershia mbi tortë’ është ky hotel me vlerën 15 milionë euro, vetëm një sekondë me vëmendje ju lutem, 15 milionë euro me sipërmarrës ‘Mediterrinan Investment Group’ dhe subjekt ndërtues 5 drejtorët e Bashkisë, ‘5D’ të cilat ky individ së bashku me Redi Mollën dhe Elvin Tivarin, dy bashkëpunëtorët e tij të ngushtë dikur në UKT dhe tashmë ata janë punonjës të ‘Tirana DC’ dhe të lidhur me Bashkinë e Tiranës këta zotërinjtë sot ndërtojnë hotele në vlerën 15 milionë euro”, zbuloi Këlliçi.

AKUZAT NË PADINË E KËLLIÇIT NDAJ QATOS:

‘ushtrim i ndikimit të paligjshëm ndaj personave që ushtrojnë funksione publike’,

‘shpërdorim detyre’,

‘përfitim i paligjshëm i interesave’,

‘fshehje ose deklarim i rremë i pasurive, interesave private të nëpunësve publikë, ose i çdo personi tjetër që ka detyrim ligjor për deklarim’,

‘shkelja e barazisë së pjesëmarrësve në tendera apo ankande publike’,

‘pastrim i produkteve penale’,

‘përvetësim i parave ose mallrave që rrjedhin nga vepra penale, ose veprimtaria kriminale’,

‘Moskallëxim krimi’,

‘Korrupsion aktiv i personave që ushtrojnë funksione publike’,

‘Korrupsion pasiv i personave që ushtrojnë funksione publike’