Përjashtimi i Berishës nga grupi i PD-së, cilët janë zërat pro dhe kundër vendimit të Bashës

Shpallja ‘non-grata’ e ish-kryeministrit Sali Berisha ngjalli debate dhe polemika, teksa analistë dhe politikanë shfaqen qëndrimin e tyre lidhur me çështjen. I vetmi që nuk kishte reaguar deri para pasdites së djeshme ishte kreu i Partisë Demokratike Lulzim Basha.

Qëndrimi dhe njëherazi vendimi i Bashës për shpalljen ‘non-grata’ të Berishës dhe deklaratën e tij pëe hyrjen në Parlamentin e ri, ishte largimi i ish-kryeministri nga grupi parlamentar i PD-së, derisa të zbardhen dhe të bëhen transparentë të gjithë faktet nga SHBA-ja.

“Për të shmangur çdo keqkuptim dhe për të konkretizuar këtë qëndrim të vetë z. Berisha, kam vendosur që deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje në rrugë gjyqësore, z. Berisha nuk do të jetë anëtar i Grupit Parlamentar të Partisë Demokratike”, deklaroi kreu i PD-së, Lulzim Basha.

Menjëherë pas deklaratë së tij, reagoi edhe ish-kryeministri Sali Berisha. Ish-lideri i demokratëve teksa theksoi se “Basha mund të kishte dhënë 5 herë dorëheqjen para se ta shkelmonte në këtë mënyrë”, nuk përjashtoi as mundësinë e krijimit të një partie tjetër për t’i rikthyer Partisë Demokratike sovranitetin. “Do bëj gjithçka me cdo demokrat e shqiptar për të rivendosur sovranitetin e PD”, deklaroi Berisha.

Por çfarë ndodhi  në selinë blu pas shpalljes së vendimit për përjashtimin e Berishës?

Disa orë pasi deklaroi përjashtimin e Berishës nga grupi i PD-së, Basha mblodhi Kryesinë e grupit parlamentar ku morën pjesë anëtarët e Kryesisë dhe drejtuesit politik të qarqeve.

Basha ka deklaruar gjatë mbledhjes se vendimi i marrë është personal dhe kostot e tij do të bien mbi kreun e PD-së.

“Mora këtë vendim për t’ju çliruar ju. Kosto e këtij vendimi të bien vetëm mbi mua. Jam 100% i bindur, pa ekuivoik, që është në interesin madhor të PD. Qëndrimi i SHBA është i qartë. Ka nisur që me vizitën e Riker. Na është përcjellë vendimi i qartë i SHBA. Sot ishte afati i fundit, kur PD duhet të shprehej. Ky vendim ishte si në interesin e PD, dhe të Sali Berishës. Meqë ia premtova Sali Berishës, dua t’ju komunikoj se ky vendim nuk është i dakordësuar me të, pavarësisht përpjekjes sime për të arritur një dakordësi”, është shprehur Basha.

Përjashtimi i Berishës nga grupi i PD-së, krijoi ‘përçarje; brenda selisë blu. Deputetët u ndanë në dy kahe: në mbështetësit e Bashës dhe në kundërshtarët e tij.

Deputetët që dolën kundër Bashës

Bujar Leskaj e cilësoi “Vendim i gabuar, përçahet PD. Është gabim i rëndë.” Edhe Tritan Shehu ka dalë hapur kundër përjashtimit të Berishës teksa tha : “Kam qenë kryetar i partisë, por të tilla vendime nuk duhet të merren nga 1 njeri, sepse vihet në dyshim ekzistenca e partisë. Këtë vendim nuk e merr dot ti, sepse PD ka forume”.

Për Flamur Nokën, vendimi i Bashës i jep kryeministrit Edi Rama atë ‘që ëndërronte’. “Folëm në zyrë, por do ta shpreh edhe këtu. Mohimi i Sali Berishës, është mohim i PD. Me këtë vendim, po i jepni PD-së goditje të rëndë. Po i jepni Ramës atë që ai ëndërronte. Vendimi duhet të shkojë për referendum në anëtarësi”, ka thënë deputeti Noka.

Sipas Oerd Bylukbashit, vendimi do të sjellë përçarje në opozitë teksa thotë se “Vendimi do të sjellë përçarje, jo vetëm horizontale, por dhe vertikale, nga lart-poshtë. Ne kemi marrë 622 mijë vota, por a na çon ky vendim tek 750 mijë vota nesër, sepse do të ketë pasoja”.

Edhe Albana Vokshi ka dalë kundër kreut Lulzim Basha. Vokshi shprehet se “Është vendim tronditës. Jam kundër vendimit, por mund ta kem subjektiv, për shkak të marrëdhënies që kam prej vitesh me Sali Berishën. Unë nuk jam e bindur si ju zoti kryetar që vendimi është në interes të PD. Nga qindra mesazhet që kam marrë, më rezulton së është vendim i gabuar, pasi shumica e demokratëve janë kundër. Ju thatë që mbani barrën, por barrën duhet ta mbajmë të gjithë dhe vendimi të votohet në forume. Nëse ju dobësoheni, dobësohet partia, ndërsa ne si ekip punojmë për t’ju rritur ju. Ne duhet të shprehemi me vote sepse jemi parti e mendimit të lirë.”

Kreshnik Çollaku e sheh vendimin si vetëkryqëzues. “Pse ta hedhim në votë? Asnjë nuk do ta votonte, kështu që le ta marrë peshën kryetari. Ështe një vendim vetëkryqëzues”.

Deputetë pro vendimit të Bashës

Tre zëra nga selia blu, i kanë dalën ë mbështetje Bashës për përjashtimin e ish-kryeministrit Sali Beriha nga grupi parlamentar i PD-së.

Luçiano Boçi tha se “vendimi është i rëndë, por duhet të shohim çfarë të bëjmë nesër në kuptimin strategjik. Sepse vendimi mund të merrej jashtë partisë. Ta bënte KQZ dhe jo ne”.

Edhe Enkelejd Alibeaj e mbështet largimin e Berishës. Ai shprehet se “Sot nuk është funeral. Nesër do të ndriçojë dielli përsëri. Nuk jam dakord me parafolësit që kundërshtojnë vendimin. Vendimi duhej marrë dhe duhej marrë vetëm nga kryetari. Ky është një moment historik për PD dhe për ju si kryetar. Do të duhet ta kapërdijmë këtë moment, dielli lind përsëri”.

Agron Gjekmarkaj e ka cilësuar vendim të një lideri si një akt të fortë nga ana morale. ”Duket që ka rënë rrufeja në grup parlamentar. Nga procedura demokratike vendimi lë shumë për të dëshiruar, por nga ana morale është akt i fortë. Është i një lideri dhe na çliron ne nga pesha. Si do ta zgjidhim me SHBA është çështja, sepse pa atë nuk jetojmë. A duhet kryqëzuar Sali Berisha për këtë?”, ka thënë Gjekmarkaj.