Përjashtimi i Berishës, VOA: PD nën kërcënimin e një përçarjeje të thellë

Parlamenti i ri shqiptar u mblodh në seancën e tij të parë, ndërsa e gjithë vëmendja ishte mbi Partinë Demokratike, pas vendimit të mbrëmshëm të njoftuar nga kryetari i saj Lulzim Basha për të lënë jashtë grupit parlamentar liderin historik të kësaj force politike, Sali Berishën. Demokratët rikthehen në sallë pas dy vjetësh mungesë për shkak të bojkotit. Por ky rikthim i gjen ata në një situatë tejet të komplikuar dhe nën kërcënimin e një përçarjeje të thellë.

Pavarësisht kundërshtive të shumta që ka patur brenda partisë dhe përplasjeve ciklike, kryesisht pas humbjeve në zgjedhje, zoti Basha ja ka dalë të qëndrojë në krye të partisë, duke gëzuar mbështetjen e ish drejtuesit të saj zotit Berisha. Por pas vendimit të djeshëm, kryetari demokrat tani ka përballë vetë zotin Berisha.

Thyerja e krijuar u vu re që sot, në mënyrë të hapur kur ndërsa zoti Basha hyri në parlament i shoqëruar nga pjesa më e madhe e grupit të tij parlamentar, zoti Berisha, u shfaq më vete, i shoqëruar nga tre deputetët të tjerë, Tritan Shehu, Edi Paloka dhe Flamur Noka. Pranë selisë së parlamentit, një grup mbështetësish të tij e pritën atë me brohoritje dhe me lule.

Zoti Berisha u ul në sallë në rreshtat e fundit të krahut të djathtë. Në dalje, me tone më të ashpra se ato të deklaratave të mbrëmshme, ai sulmoi sërish hapur zotin Basha, por duke folur këtë herë për nëj marrëveshje të kryetarit demokrat me kryeministrin Rama. “Ajo që ndodhi është një marrëveshje Rama-Basha në kurriz të zgjedhësve shqiptarë dhe duhet çmontuar një minutë e më parë”, u shpreh ai duke sfiduar hapur vendimin e mbrëmshëm që e lë atë jashtë grupit parlamentar demokrat. “Unë jashtë çdo lloj diskutimi jam anëtar i grupit të PD. Kompromisi Basha Rama, është nul, nuk ka asnjë mbështetje ligjore, veç fëlliqësisë morale të pazareve prapa shpine ndaj një force politike që qëndron fuqishëm në pozicionin e saj si opozitës”.

Zoti Berisha paralajmëroi sërish se “do marr çdo nismë ligjore e statutore brenda PD për riktihimin e saj në piedestalin që meriton. Në çdo kohë mund të hyj në selinë e PD-së dhe të jeni të sigurtë se do të jetë shumë e afërt dita kur PD të rifitojë të gjithë forcën, vendosmërinë e legjitimitetin për të shporrur një klikë sunduese të bazuar mbi krimin, drogën, dhunimin e votës së qytetarëve shqiptarë dhe pazaret e fëlliquar me ata që e shndërruan PD në një fasadë opozitë”, u shpreh ai.

Zoti Basha evitoi të lëshonte ndonjë deklaratë, duke preferuar t’i përgjigjet vetëm akuzave për pazare mes tij dhe kryeministrit Rama. “Shqipëria, shqiptarët, demokracia shqiptare, e ardhmja e familjeve shqiptare, ka vetëm një armik, Edi Ramën dhe rregjimin e tij të dalë nga zgjedhje të paligjshme të cilat PD nuk i njeh”, tha ai.

Pak para nisjes së seancës së sotme zoti Basha mori përkrahjen e ambasadës amerikane për aktin e mbrëmshëm. “Vendimi i vështirë i shpallur dje nga Kryetari Lulzim Basha meriton respekt. Ky vendim demonstron se, ashtu siç ndodhi 30 vjet më parë dhe në momente të tjera kritike në historinë e Shqipërisë, Partia Demokratike ka kurajon për t’u ndarë nga e shkuara me qëllim që të ndërtojë të ardhmen, për të ndihmuar që ta udhëheqë Shqipërinë përpara”, vë në dukje ambasada në një deklaratë të saj.

Vendimi i zotit Basha pason atë të Departamentit amerikan të Shtetit në muajin maj sipas të cilit ish kryeministrit dhe ish presidentit Berisha e familjes së tij të ngushtë, i ndalohet hyrja në Shtetet e Bashkuara, duke e përfshirë atë në kategorinë e “zyrtarëve të korruptuar që kishin minuar demokracinë”.
Në deklaratën e sotme të ambasadës amerikane i jepet një mbështetje e qartë zotit Basha ndërsa nënvizohet se “Shtetet e Bashkuara kanë pasur një marrëdhënie të veçantë me Partinë Demokratike që nga themelimi i saj dhe presim me kënaqësi të punojmë më ngushtë se kurrë me Kryetarin Basha dhe Partinë Demokratike për të forcuar marrëdhëniet SHBA-Shqipëri”.

Në mbrëmje zoti Basha tha se kishte ndjekur “me dhimbje reagimet e zotit Berisha” dhe se “dhimbja që ndjej në nivel personal dhe njerëzor për vendim që jam detyruar të marrë dje, është dyfishuar sot nga gjuha e përdorur nga zoti Berisha. Shpresoj që koha të jetë ilaçi më i mirë e të gjithë të fokusohemi të armiku i shqiptarëve që është rregjimi i Edi Ramës. Shpreh keqardhjen e thellë që tezat e kundërshtarit tim të vetëm, Edi Rama, sot i kam dëgjuar të artikuluara nga goja e një njeriu vlerësimin për kontributin e të cilit e dhashë dje e i qëndroj”, deklaroi zoti Basha.

Komentet e tij për gazetarët u bënë jashtë sallës së parlamentit të cilën opozita e braktisi, sapo u shpall rezultati i votimit për kryetaren e re të parlamentit, socialistet Lindita Nikolli. Deputetët demokratë grisën në mënyrë publike fletët e tyre të votimit, sipas vendimit të marrë në grup. Por duket se jo të gjithë i janë bindur, duke qenë se zonja Nikolli mori 79 vota nga 77 që numërojnë socialistët së bashku me tre deputetët e partisë socialdemokrate.

Zoti Basha deklaroi se shumë nga depuetët e majtë sot duhet të ishin para drejtësisë, dhe se opozita ka “një dhe vetëm një detyrë, që këtë sallë dhe gjithshka jashtë saj, ta kthejmë në një fushë betejë me dhe për qytetarët shqiptarë deri në mposhtjen dhe largimin e këtij rregjimi që ka marrë peng Shqipërinë e ka dorëzuar gjithshka që shqiptarët meritojnë në duart e një grushti kriminelësh e oligarkësh që me aktet e tyre kanë minuar demokracinë shqiptare janë pasuruar në kurriz të qytetarëve, kanë shpërdoruar fondet publike dhe kanë shkatërruar të vetmin instrument të bashkëjetesës që janë zgjedhjet e lira e të ndershme”, u shpreh kryetari demokrat. VOA