PL denoncon punësimet në administratë para zgjedhjeve të 11-majit: Pse SPAK nuk reagon?

Sekretarja e Përgjithshme e Partisë së Lirisë, Brunilda Haxhiu, ka deklaruar këtë të premte se rritja e punësimeve në administratën publike vetëm tre muaj para zgjedhjeve të 11 Majit 2025 është një krim elektoral i shëmtuar dhe një shkelje e rëndë e demokracisë.

Në një deklaratë për media, Haxhiu theksoi se ky abuzim i hapur me burimet shtetërore për të blerë vota, i denoncuar edhe nga vëzhguesit ndërkombëtarë, ka sjellë një rritje të numrit të punonjësve në administratën shtetërore, përkundër rënies së popullsisë dhe nevojës për një qeverisje më efikase.

Ajo e cilësoi këtë fenomen si një dëshmi të kapjes së shtetit dhe përdorimin e administratës si një instrument elektoral, duke u shprehur se ky është një model qeverisës i dështuar që nuk i shërben interesave të qytetarëve.

Deklarat e plotë:

Rritja e punësimeve në administratë publike tre muaj para zgjedhjeve është një krim i shëmtuar elektoral që vetëm SPAK nuk e sheh.

Ky krim elektoral i konsumuar në funksion të blerjes së votave më 11 MAJ, sic denoncoi edhe kreu i misionit të vëzhguesve të Parlamentit Europian, Z.Gahler është jo vetëm një abuzim barbar i taksave të qytetarëve por edhe dëshmi e qartë për keqpërdorimin e administratës shtetërore për qëllime elektorale.

Në një kohë kur Shqipëria po përballet me një rënie dramatike të popullsisë, me mijëra të rinj që largohen çdo vit për mungesë të mundësive të barabarta dhe perspektivës për të ardhmen, qeveria zgjodhi të mbushë zyrat e shtetit me militantë e klientë politikë, jo për të përmirësuar shërbimin ndaj qytetarit, por për të blerë votën me vendin e punës. Përdorimi kriminal i administratës publike në fushatë dhe zgjedhje është fytyra me e qartë e kapjes së shtetit.

Sipas INSTAT, në tremujorin e parë të vitit 2025, punësimi në sektorin publik është rritur me 2% krahasuar me të njëjtën periudhë të një viti më parë. Por ajo që është edhe më alarmante është fakti se krahasuar me vitin 2019, numri i të punësuarve në sektorin shtetëror është rritur nga 172.900 në 185.400, një rritje prej 7.3% – në një kohë kur shumë shërbime ofrohen online dhe kur popullsia e vendit ka rënë ndjeshëm .

Kujt po i shërben kjo rritje? Popullit që ikën, apo partisë që kërkon të mbajë pushtetin me çdo kusht?
Një administratë që rritet ndërsa popullsia bie është një paradoks tragjik. Kjo nuk është më qeverisje, por pushtet i bazuar mbi klientelizëm, jo meritokraci. Të punësuarit në administratë nuk janë votues të lirë, por viktima të presionit,kërcënimit dhe shantazhit. Ata detyrohen të marrin pjesë në takime elektorale, të sjellin vota apo të raportojnë mbështetës për partinë në pushtet. Kjo është një shkelje e të drejtës së votës dhe e parimeve të demokracisë funksionale.

Nuk mund të ketë zgjedhje të lira dhe të ndershme kur shteti është kthyer në shtab elektoral të Rilindjes.
Përdorimi i burimeve shtetërore, i automjeteve , i fondeve të rindërtimit, i ndihmave ekonomike dhe subvencioneve si mjete për blerje votash është një krim elektoral dhe shkelje e rëndë e standarteve europiane. 

Partia e Lirisë denoncon me forcë punësimet elektorale dhe presionin mbi administratën.  Ky është një abuzim i pastër me burimet njerëzore. Shqipëria ka nevojë për një administratë efikase, të depolitizuar dhe të bazuar në meritë, jo për një aparat shtetëror të përdorur si armë zgjedhore. Rritja e punësimeve për efekte elektorale, ndërkohë që popullsia bie dhe ekonomia ngadalësohet, është simboli më i qartë i një modeli të dështuar qeverisës, që kujdeset për votat e radhës, jo për të ardhmen e vendit. Në vend që shteti të racionalizohet dhe të bëhet më efikas, ai po përdoret si çiflig elektoral për të shpërblyer militantët dhe për të manipuluar vullnetin qytetar.

Shqipëria ka nevojë për një administratë që i shërben qytetarit, jo farsës zgjedhore të Rilindjes . Shqipëria nuk mund të integrohet ne Europë me votë të shantazhuar dhe administratë të kapur nga partia-shtet.