Pogoni: Asambleja Zgjedhore e Komiteti Olimpik Kombëtar Shqiptar është e kundërligjshme

Partia Demokratike ka reaguar ndaj Asamblesë Zgjedhore që pritet të zhvillohet nesër nga Komiteti Olimpik Kombëtar Shqiptar, duke e cilësuar atë si të paligjshëm.

Në një deklaratë për shtyp, drejtuesi i Departamentit të Sportit në PD, Artan Pogoni, ka akuzuar drejtuesit aktualë të KOKSH për shkelje të hapura ligjore.

"Asambleja Zgjedhore që do të mbahet nesër nga Komiteti Olimpik Kombëtar Shqiptar, në kundërshtim me vendimet e gjykatave ndërkombëtare është e kundërligjshme.

Kjo Asamble thirret nga një President i zgjedhur ilegalisht, me mbështetjen e federatave që vetë funksionojnë jashtë ligjit, në kundërvajtje ligjore të certifikuar edhe nga Gjykata e Arbitrazhit Sportiv në Lozanë."

Sipas PD-së, procesi po zhvillohet në fshehtësi dhe me nxitim të pajustifikuar, vetëm 19 ditë para zgjedhjeve politike, çka sipas Pogonit tregon frikë dhe mungesë transparence.

Ai nënvizoi se shumë nga federatat më të rëndësishme në vend, përfshirë atë të Futbollit, Basketbollit dhe sportit universitar, e kanë bojkotuar këtë proces.

"Procesi po zhvillohet në fshehtësi, në një nxitim të pakuptimtë, vetëm 19 ditë para zgjedhjeve politike, një veprim që tregon frikë, jo transparencë.

Shumë nga federatat më të rëndësishme në vend si ajo e Futbollit, Basketbollit, sportit universitar, sportit në shkolla dhe të tjera, e kanë bojkotuar hapur këtë farsë.

Ne i bëjmë thirrje të gjithë anëtarëve të mbetur që të tregojnë ndërgjegje dhe dinjitet, duke refuzuar pjesëmarrjen në një proces të paligjshëm dhe të kontrolluar politikisht.

Partia Demokratike nuk do të njohë asnjë proces zgjedhor apo organizatë që shkel ligjin dhe parimet e sportit të ndershëm.

Sporti shqiptar meriton dinjitet, jo farsë.

Ai meriton të ngjitet në majat madhështore ku i takon, bashkë me Shqipërinë!"