Flash News

Plagosja e djeshme në Durrës, 36-vjeçari ishte me dy të mitur në makinë kur u qëllua

AMP arreston në flagrancë dy punonjës policie dhe pezullon nga detyra një tjetër

Alarmi për bombë në një hotel në Tiranë, çfarë zbuloi policia

Video/ Alarmi për bombë në parkingun e një hoteli në Tiranë, reagon policia

Të shtëna me armë zjarri në Durrës, një i plagosur

Ditari i Opozitës

Policia në Fier godet sërish opozitën, vendos nën hetim xhaxhain e kandidates së PD

Politiko 28 Prill 2025, 14:49

Policia në Fier godet sërish opozitën, vendos nën hetim

Policia e Fierit ka vendosur nën hetim 59-vjeçarin Agim Hasaj, banues në fshatin Peshtan, pas dyshimeve se po kryente veprimtari të paligjshme në lidhje me procesin zgjedhor të 11 majit. Hasaj është xhaxhai i kandidates së Partisë Demokratike për Qarkun e Fierit, Silva Hasaj.

Sipas njoftimit zyrtar të Policisë së Shtetit, mbrëmjen e 27 prillit, rreth orës 19:20, pas informacioneve operative, shërbimet policore kanë ndaluar dhe kontrolluar Agim Hasajn, si dhe automjetin e tij. Gjatë kontrollit, atij iu gjet një bllok me shënime në lidhje me procesin zgjedhor. Pas marrjes në pyetje në ambientet e Komisariatit të Policisë Fier, Hasaj është lënë i lirë, ndërsa materialet procedurale janë referuar në Prokurori për hetime të mëtejshme.

Në lidhje me këtë rast ka reaguar edhe drejtuesi politik i PD-së për Qarkun e Fierit, Gazment Bardhi, i cili akuzoi Policinë e Shtetit për presion dhe intimidim ndaj familjarëve të kandidates demokrate. Bardhi e cilësoi këtë akt si një përshkallëzim të rrezikshëm të shantazhit dhe dhunës institucionale ndaj opozitës.

“Dënoj me forcë çdo akt presioni dhe intimidimi që Policia e Shtetit, nën ndikimin politik të qeverisë, po ushtron ndaj familjarëve të kandidates së PD, znj. Silva Hasaj. Ky është një akt i rëndë që rrezikon demokracinë dhe stabilitetin në vend”, deklaroi Bardhi, duke i bërë thirrje OSBE/ODIHR dhe institucioneve ndërkombëtare të monitorojnë nga afër procesin zgjedhor.

Ndërkohë, Policia e Fierit ka sqaruar se veprimet ndaj Agim Hasajt janë kryer në përputhje të plotë me ligjin dhe se nuk ka pasur asnjë shkelje apo presion politik. Në deklaratën e saj, Policia thekson se është tërësisht e baraslarguar nga subjektet politike dhe e fokusuar vetëm në zbatimin e ligjit dhe garantimin e rendit gjatë fushatës zgjedhore.

Ky është rasti i dytë në Qarkun e Fierit ku përfaqësues të opozitës përballen me akuza për krime zgjedhore. Pak ditë më parë, në Lushnjë, u arrestua Martin Leka, i denoncuar për tentativë blerje vote, duke iu ofruar një shtetasi 500 mijë lekë të vjetra në këmbim të kartës së identitetit.

Qarku i Fierit është nën drejtimin politik të ministres Belinda Balluku, për të cilën opozita ka bërë vazhdimisht denoncime për ndërhyrje dhe manipulime në procesin zgjedhor.

Të fundit