Pollo: PD të bëjë transparencë mbi 500 mijë dollarët rusë të Lulzim Bashës

Anëtari i Këshillit Kombëtar i PD-së, Gec Pollo ka reaguar pasi SHBA bëri me dije se Lulzim Basha ka përfituar rreth 500 mijë dollar nga Rusia.

Pollo thotë se asokohe i ka besuar Bashës, ku deklaronte se PD nuk ishte financuar nga Rusia, por thekson se organeve të partisë, nuk iu paraqit sikurse parashikon Statuti, raporti financiar që mund të hidhte dritë mbi detajet e këtyre pagesave.

Më tej, Pollo shton se këto financime kanë ndodhur jashtë buxhetit zyrtar të partisë dhe se janë përdorur guackat fiskale jashtë vendit, duke nënvizuar se bëhet fjalë për parregullsi administrative, ligjore dhe ndoshta shkelje penale.

Ai thotë se PD nuk ka pse të mbajë njolla të tilla. Ndaj, Pollo propozon që udhëheqja aktuale e partisë të ndërmarrë një audit të plotë të çështjes dhe më pas gjetjet të bëhen publike.

Duke theksuar se çështja është komplekse, pasi nga aksesi në llogaritë bankare deri tek ëebsiti i partisë janë ende të kontrolluara nga Basha dhe njerëzit e tij, Pollo thotë se këto nuk janë arsye që PD “të mos pastrojë plehun e mbetur në Haurin e Avgjisë”.

Reagimi i plotë:

Sipas mediave ndërkombëtare një zyrtar i qeverisë amerikane deklaroi se agjencitë e zbulimit të ShBA po informojnë konfidencialisht disa shtete për financimet e fshehta të Rusisë ne favor të politikanëve të caktuar në më shumë se 24 shtete. Ned Price zëdhënësi i Departamentit të Shtetit të ShBA-së i quajti këto financime të Kremlinit si sulm mbi sovranitetin e këtyre shteteve.

Një zyrtar amerikan anonim i deklaroi Agjencisë France Presse se Rusia shpenzoi afro 500 000 USD për të mbështetur Partinë Demokratike të Shqipërisë në zgjedhjet parlamentare të v 2017.

Si deputet i zgjedhur në v. 2017 i kam besuar shpjegimeve publike të asokohe kryetarit Lulzim Basha se në asnjë mënyrë burimi i financimit nuk ka qenë Rusia ose të tjera shtete apo organizata jo miqësore me Shqipërinë (fatkeqsisht organeve partiake nuk ju paraqit siç parashikon statuti raporti financiar vjetor që mund të hidhte dritë mbi detajet e këtyre pagesave).

Këto financime kanë ndodhur jashtë buxhetit zyrtar te partisë dhe kanë përdorur guackat fiskale jashtë vendit tonë. Këtu mund të kemi të bëjmë me parregullsi administrative e ligjore; mbase edhe me shkelje penale.

Por sot nuk kemi thjesht këto probleme të cilat mbeten pjesërisht të pazgjidhura.

Sot kemi të bëjmë me pohime zyrtare amerikane se Basha mori financime në v. 2017 nga një shtet atëhere jomiqësor  dhe sot, me agresionin e përgjakshëm kundër Ukrainës dhe rendit ndërkombëtar, një shtet armik.

PDSh si partia që historikisht rrëzoi komunizmin dhe e orientoi Shqipërinë drejt Europës e Perëndimit nuk ka asnjë arsye të mbajë të tilla njolla, hije apo dyshime.

Prandaj do të propozoj zyrtarisht që udhëheqja aktuale, përfshi kryetarin Berisha e Sekretarin e Përgjithshëm Noka të ndërmarrin një audit të plotë të çështjes të drejtuar nga një Komision i Posaçëm. Raporti i auditimit duhet t'u prezantohet Kryesisë, Këshillit Kombëtar, Grupit Parlamentar si dhe të publikohet në ëebsitin e partisë.

Unë jam i ndërgjegjshëm se situata është komplekse: për shkak të ndërlikimeve gjyqësore një sërë tagrash nga aksesi në llogaritë bankare deri tek ëebsiti i partisë janë ende të kontrolluara nga Basha e njerëzit e tij. Gjithashtu çfarëdo informacioni amerikan të marrë qeveria Rama mendoj se nuk do përdorë në interesin shtetëror por për të dëmtuar opozitën edhe tashti që Basha ka ikur. E ka provuar këtë edhe duke keqpërdorur ndërkombëtarë të caktuar.

Por këto nuk janë arsye që PD të mos pastrojë plehun e mbetur në Haurin e Avgjisë. Qoftë edhe duke thirrur para Komisionit të Posaçëm të Auditimit të tërë zyrtarët partiakë përgjegjës; përfshi edhe ish kryetarin e partisë. Dhe duke bërë transparencë të plotë mbi çështjen.