Protesta kundër Veliajt, Berisha: I treguat shqiptarëve dhe Europës se nuk pajtoheni me vjedhjen e taksave

Lideri i Partisë Demokratike, Sali Berisha foli nga tubimi në Rrugën e Shpresës, ku u ndal edhe tek protesta e zhvilluar dje para Bashkisë së Tiranës.

Berisha përgëzoi qytetarët që protestuan kundër Erion Veliajt dhe tha se dje, protestuesit, treguan se nuk pajtohen me vjedhjen e parave të tyre.

Kryedemokrati shtoi se Veliaj i ka kthyer paratë e taksapaguesve në hotele luksoze me 5 yje dhe pallate private për veten dhe bandën e tij.

“Në protestën tuaj të fuqishme dje te bashkia përfaqësuat çdo qytetar të këtij vendi që urren këta hajdutë të pamëshirë që vjedhin ditën, natën e në çdo kohë. Që vjedhin gjer në palcë qytetarët shqiptarë. Që vjedhin buxhetin. Pasuritë e tyre kombëtare dhe i shndërrojnë ato në pasuri personale familjare. Misioni juaj është i shenjtë! Beteja pa kthim është beteja e fitores.

Dje ju i treguat shqiptarëve, i treguat kombit dhe mbarë Europës se nuk pajtoheni kurrë me vjedhjen 100 përqind si në asnjë vend tjetër të botës të taksave, parave tuaja.

Se nuk pajtoheni kurrë me Erion Veliajn, këtë monstër që e turpëron emrin njeri. Që i konsideron qytetarët shqiptarë, i konsideron kryeqytetasit si qenie për t’u mashtruar. Si qenie për t’u vjedhur. Si qenie për t’u poshtëruar. Që dy-tre vite me radhë flet për pyllin imagjinar 1 milion pemë vetëm se ka vjedhur koston e 1 milion fidanëve. Që dy, tre vite me radhë, tenderat i merr me drejtorët e tij mostra.

Paratë e taksapaguesve i kthen në hotele luksoze me 5 yje. Paratë e qytetarëve i kthen në pallate private për veten dhe bandën e tij.

Paratë e qytetarëve i dërgon në konto offshore dhe zhduk pa nam dhe nishan mbi 130 milionë euro të paguara nga mundi, djersa e shqiptarëve për djegësin e Tiranës, për të cilin nuk ekziston as gjurmë, as nishan.

A ka protestë me të drejtë se kjo?

A ka protestë dhe revoltë më të merituar se kjo?

Jo dhe jo.

Ndaj dhe përshëndes ju dhe të gjithë ata të cilët dje tronditën themelet e këtij pushteti të kalbur”, deklaroi Berisha.