"Remdesiviri nuk ekziston në farmaci!" Farmacistët ngrenë shqetësimet, Basha: Vaksinimi i plotë anti-grip i popullsisë, të rimbursohet nga shteti

“Nuk duhet të humbasim më kohë, por duhen marrë masa për të garantuar vaksinimin e popullatës nga COVID-19”, është kjo thirrja që ka bërë Presidentja e Urdhrit të Farmacistëve, Diana Toma, gjatë një takimi me kreun e Partisë Demokratike, Lulzim Basha.

Gjatë diskutimeve mbi situatën e pandemisë, Basha ka vënë në dukje mungesën e medikamenteve bazë për të trajtuar koronavirusin, si dhe kërkoi vaksinim të plotë anti-grip të popullsisë i rimbursuar nga shteti.

Përfaqësuesi i Urdhrit të Farmacistëve, Dëfrim Goma, ka konfirmuar se Remdesiviri nuk ekziston në farmaci, por vetëm në tregun e zi, ndërkaq Toma ka ngritur shqetësimin e tregut të disbalancuar.

Presidentja e Urdhrit të Farmacistëve po ashtu është shprehur e paqartë në betejën që duhet të ndjek sistemi farmaceutik me Covid-19, pasi nuk kanë një protokoll të caktuar që duhet të ndjekin.

Pjesë nga biseda:

Diana Toma: Sistemi farmaceutik u përjashtua nga administrimi i pandemisë. Farmacistët nuk e kanë të qartë protokollin e përshkrimit të barit për pacintët me covid, nuk e dimë protokollin se si duhet të shkojë tek qytertari ky ilaç dhe në fund fare kush penalizohet.

Basha: Me thonë që Remdesiviri nuk ekziston tek ju, veç në treg të zi

Përfaqësuesi i Urdhrit, Dëfrim Goma: Po, po barnat antivirale janë sjellë kontrabandë, në rrugë të jashtëligjshme. Ata po e mbysin tregun. Vetëm tarifa e infermierit privat në shtëpi, shkon 100 mijë lekë në ditë.

Diana Toma: Jemi në një situatë tregu të disbalancuar. Duhet të harmonizohet veprimtaria e institucioneve për të përballuar situatën. Mungesa e protokolleve e ngarkon farmacistin me një përgjegjësi të panevojshme.

Basha: Pra, kërkoni që paketa të jetë e rimbursueshme atë që e kemi propozuar edhe në në pakëten tonë me 5 pika.

Diana Toma: Po. Duhet nxjerrë edhe një VKM për t’ju ardhur në ndihmë qytetarëve shqiptarë që Covid të trajtohet si një formë prioritare.

Dëfrim Goma: Barra financiare e rimbursimit të paketës anti-Covid nuk është e madhe për shtetin. Të kemi parasysh se deri tani 950 vaksina antigrip janë importuar dhe tregtuar

Basha: Po sikur do sillte 200 mijë, apo 300 mijë?

Diana Toma: Nuk duhet të humbasim më kohë, por duhen marrë masa për të garantuar vaksinimin e popullatës.

Basha: Duhet vaksinimi i plotë anti-grip i popullsisë i rimbursuar nga shteti.