“S’do më shihni duke u servilosur”/ Gjekmarkaj: Basha të dorëhiqet pa kthim!

Deputeti Agron Gjekmarkaj thotë se PD është në agoni të plotë dhe se po paguan faturën e saj 30 vjeçare. Gjithashtu shton se Lulzim Basha është nën një presion të gjithëanshëm.

Sipas Gjekmarkajt, Basha ka përgjegjësi të madhe, por jo vetëm ai. Deputeti vë thekin edhe te përgjegjësia vetjake, pasi dha dorëheqjen nga funksionet drejtuese të partisë.

Ai thotë se Basha nuk ka ditur të sulmojë e as të mbrohet, duke nënvizuar se ka rënë në kurthe. Gjithashtu thekson se kryedemokrati ka zgjedhur qëndrimet e gabuara për të komunikuar me demokratët.

“Basha nuk është djalli dhe ne engjëjt”, shkruan Gjekmarkaj në rrjetet sociale, ndërsa shton se përderisa është lideri, ai duhet të marrë përgjegjësinë dhe të largohet.

Demokrati thotë se as Sali Berisha nuk ka fituar dhe se duhet të tërhiqet. Gjekmarkaj shton se PD duhet të bashkohet, ndërsa shton se atë vetë nuk do shohin “duke i lepirë këpucët njeriu! Nuk do më shihni duke u zvarritur apo duke u servilosur!”

Postimi i plotë:

Sot PD gjindet ende në agoni të plot!

Lulzim Basha është nën një presion të gjithëanshëm. Moda kerkon që ai të fajësohet për çdo gjë, të anatemohet, të shahet, të fyhet por ky është jakobinizem. Natyrisht humbjet, lodhin, humbjet frustojnë, humbjet prodhojnë urrejtje. Por jemi njerez dhe duhet të mbetemi të tillë, jemi qënie humane e nuk duhet të behemi bisha.

PD po paguan para historisë faturen e saj 30 vjeçare. Ajo ka prekur fundin!

Sigurisht Lulzim Basha ka përgjegjësi të medha, ne të tjeret pas tij po aq. Une e ndjeva atë pergjegjësi dhe u largova. Basha është sulmuar në besueshmeri në menyrë asgjesuese, gati të pakthim.

Basha nuk ka ditur të sulmojë e as të mbrohet. Bashes i janë ngritur kurthe dhe ai ka rënë në to. Politika qënka me kurthe,po re ferkojnë duart s'ta qan kush hallin. Basha ka zgjedhur gjuhen dhe qendrimet e gabuara për të komunikuar me demokratet dhe shoqerinë! Basha nuk është djalli dhe ne engjëjt.

Basha nuk është humbësi i vetëm. Por meqënëse ai është lideri ai duhet të marrë përgjegjësi dhe të prese nyjen gordiane!

Ai duhet të dorhiqet pa kthim dhe të marrë empatinë e opinionit publik dhe të demokratëve.

Sali Berisha pas 30 vitesh që ka dominuar PD dhe skenen publike thotë kam fituar!

Asgjë s'ka fituar. Një mjerim i madh rezultati i tij dhe i yni bashkë!

Sali Berisha duhet të tregojë se, PD nuk e sheh si pronë përshtypje, kjo e krijuar në 30 vjet! Duhet tu tregojë demokratëve që nuk e do atë për fëmijët e tij dhe tarafin nga pas po për Shqipërinë dhe demokratët.

Ai duhet të premtoje terheqjen nga aventura që premton!

Një burrë në moshë të thyer i cili e ka konsumuar historinë e tij me një "non gratta" nga aleati kryesor i kombit shqiptar SHBA nuk mund të jetë e ardhmja e PD dhe as e vendit. Nëse do të kënaqë krenarinë e tij mazokiste mund të thuhet që pjesërisht e ka realizuar atë.

PD duhet të bashkohet.Një komision nga dy anët duhet të ndertojë një platformë bashkimi e rithemelimi të vertete e jo pupulist stadiumesh. Ky komision mund të bëhet drejtimi i përkohshëm i PD për ta çuar atë drejt garës. Gara e vertetë e nxjerr liderin dhe e bashkon partinë!

Personalisht çdo vendim që marr se bëj për t'i hyrë në qejf njeriu apo për të merzitur njeri.

E bëj për vete dhe njerëzit, aq sa janë që mund të përfaqësoj.

Aty që na thonë "ejani po edhe po nuk erdhet bëjmë edhe pa ju", ju them që detyrimin e kam vetëm për demokratet kudo që ndodhen, në veçanti për banorët e Qarkut të Lezhes që më kanë votuar.

Nuk do me shihni kurrë duke i lepirë këpucët njeriu!

Nuk do më shihni duke u zvarritur apo duke u servilosur!

Nuk do më shihni duke i bërë m... marshallah. Për mua politika vlen për aq ditë sa përfaqësoj diçka!

Ajo e humbet kuptimin kur kjo lidhje bie.

PD sot ka nevojë për arsye, për humanizëm , ide dhe vendime të vështira por të fisme!

Kjo pritet nga Basha dhe Berisha.